Div werlt noch ir alten sitte

Div werlt noch ir alten sitte·
an mir begat mit nide·
si vert mir wunderliche mitte·
si wellent dc ich mide·
den besten frúnt den ieman hat·
wie sol des iemer werden rat·
sol ich ir lange froͤmde sin·
ich weis wol dc tůt ir we·
dc ist dú meiste sorge min·

Nieman vindet mich dar an·
vnstete mines mv̊tes·
in si der eine· der ir gan·
vil eren vnd gv̊tes·
si kan mir niemer werden leit·
des búte ich mine sicherheit·
also trurig wart ich nie·
swenne ich die wolgetanen sach
min senendes vngemach zergie·