Do der svmer komen was

Do der svmer komen was·
vnd die blv̊men dvr das gras·
wunneklich entsprvngen·
vnd die vogel svngen·
do kam ich gegangen·
vf einen anger langen·
da ein kvͤler brvnne entsprang·
dvr den anger was sin gang·
da dv́ nahtegal wol sang·

Vf dem anger stv̊nt ein bǒn·
da getrônde mir ein tron·
ich wc zv̊ dem brvnnen·
gegangen von der svnnen·
das dv́ linde mere·
mir da schatten bere·
do ich da gesessen was·
miner sorge ich gar vergas·
vil schiere entslief ich vmbe dc·

Do bedvhte mich zehant·
wie mir dienten ellú lant·
vnd wie min sele were·
zehimel ane swere·
vnd doch der lib solte·
hie leben swie er wolte·
da wc mir sanfte vnd niender we·
got bescheide es wie es erge·
wan besser trǒn en wart nie me·

Gerne wer ich iemer da·
wan ein vil vnselig krâ·
dv́ begvnde erschrien·
dc alle kra gedijen·
als ich in des gvnne·
si benam mir michel wunne·
von ir schrienne ich erschrac·
wan dc da kein stein enlac·
es wer gewesen ir endes tag·

Ein vil wunder altes wib·
dú getroste mir den lip·
die begvnde ich eiden·
do begvnde si mir bescheiden·
wc der trǒn betúte·
dc merkent wise lúte·
zwen vnd einer dc sint dri·
ǒch so seite si mir da bi·
dc min dvme min vinger si·