Habe ich frúnt die wúnschen ir

Habe ich frúnt die wúnschen ir·
dc si iemer selig mvͤsse sin·
dvr die ich ellú wib verbir·
dú meret vil der froͤide min·
vnd kan mir guͤte sich erwern·
dc man ir valschen niht engiht·
ich entrúwe von leide den lib ernern·
swenne si min ǒge niht ensiht·

Mir gab ein sinnig herze rat·

do ich si vs^{[WS 1]} al der werlte erkos·
ein wib dú menige tvgend begat·
vnd lob mit valsche nie verlos·
dc wc ein seliklichú zit·
von ir ich grosse froide han·
der schonen mv̊s ich den strit·
vil gar an gv̊ten dingen lan·

Min lib von liebe mac ertoben
swenne ich das aller beste wib·
so gar ze gv̊te hoͤre loben·
dú nâhe in minen herzen lit·
verholne nv vil manigen tac·
si túret gar die sinne min·
ich bin noch stete als ich ie pflag·
vnd wil dc iemer gerne sin·

Vil wunneklichen hohe stat·
min herze vf menige froͤide gv̊t·
mir tůt ein ritter sorgen rat·
an den ich allen minen mv̊t·
ze gůte gar gewendet han·
dc ist vns beiden gůt gewin·
dc er mir wol gedienen kan·
vnd ich sin frúnt darvmbe bin·

Anmerkungen (Wikisource)

1. Vorlage: ve.