Il colore della notte
|
C'l artìcul chè 'l è scrit in
Miranduléś |
 Color of Night
| ||
| Il colore della notte | ||
 La Jane March e Bruce Willis in na figùra dal film | ||
| Al culōr dla nòt 1994 | ||
|---|---|---|
| Regìa: Richard Rush | ||
| Scritōr: Matthew Chapman • Billy Ray | ||
| Atōr: Bruce Willis • Jane March • Rubén Blades Scott Bakula • Lesley Ann Warren • Brad Dourif Lance Henriksen • Eriq La Salle • Shirley Knight | ||
| Müsica: Dominic Frontiere | ||
| Léngua: Ingléś | ||
| Dürä dal film: 131 minüt | ||
| Nasiōṅ: Stat Unî | ||
Il colore della notte (Al culōr dla nòt) 'l è 'n thriller eròtic americàṅ dal 1994, girâ a 'l inìsi par Richard Rush, ch'al turnàva a la regìa dòp soquànt an, e pò finî par George Pan Cosmatos quànd c'l àtar 'l à patî un cōlp a 'l cōr.
Al film 'l è stâ 'n fiàsc a i butghèṅ, purtànd a cà a fadìga la mità di quarànta migliòṅ ad dòlar spēś, e 'l à anc vins un Razzie Award par la senegiadùra più bruta dal 1994. Però 'l è anc stâ bòṅ ad dvintar òṅ di vint film più tòlt a nuléǵ in di negòsi ad caséti vìddeo americàṅ in dal 1995 e a 'vér-ag al séni ad sès fati méj par la rivìsta Maxim.
Sunt
Al dutōr Bill Capa (Bruce Willis) 'l è 'n psicanalìsta ad New York ch'al gh'è armàś dimóndi mâl quànd na sò pasiènta la s è butàda śò par la fnèstra dal sò studi davànti a i sò òć. Al shock 'l è stâ acsè grand ch'adès lò al fà fadìga a védar bèṅ al culōr rós, qvél dal sangṿ.
Bill al decìd acsè ad spatìnar a Los Angeles par tōr part a na terapìa ad grup purtàda avànti da 'n sò amìg e culéga, al dutōr Bob Moore (Scott Bakula). I àtar mémbar dal grup i èṅ Casey (Kevin J. O'Connor), pitōr cun di scat ad néruv, Buck (Lance Henriksen), un vèć pîṅ ad mistēr, la Sondra (Lesley Ann Warren), na dóna purcùsa cun di an in sal spali, Clark (Brad Dourif), 'n avucàt patî par 'l órdan e i nùmar e Richie, un ragasōl diśadatâ.
Bob al śibìs a 'l sò amìg 'd andàr a star da lò in dla sò vila ad lus, soquànt dè prima che qualchidòṅ 'l al cupìs a scurtlàdi. Capa 'l è custrét a tōr al sò rōl in dal grup. In cal méntar, par via 'd un buć in màchina, al cgnós la Rose (Jane March), na ragàsa ch'a n s sà briśa in du la staga. Esénd lē dimóndi bèla, lò al n pōl far àtar ch'andàr-'g a lèt vluntéra.
Sōl dòp a s vèṅ a savér che la buciàda la n è minga stada fata sénsa vlér e che la dóna l'è la ciàṿ par saltàr-ag fóra da 'l mistēr 'd un sasèṅ ch'al cópa la gint ligàda a 'l mónd dla psicanàliśi druànd na pistòla sparaciòld.