Scott Weiland
|
C'l artìcul chè 'l è scrit in
Miranduléś |
Scott Richard Kline, cgnusû méj cuma Scott Weiland (Santa Cruz, 27 'd Utóbar dal 1967 - Bloomington, 3 ad Dicémbar dal 2015) 'l è stâ 'n cantànt americàṅ, vinsidōr ad dū Grammy Awards.
'L è stâ 'l cantànt dal grup di Stone Temple Pilots e, in di an Dumìla, di Velvet Revolver. Scott 'l à sèmp'r abû di distùrub bipulàr e ad dròga. 'L è stâ spuśâ dū vòlti e al gh'iva dū fiōi.
Biugrafìa
Nâ in Santa Cruz in dal 1967, a sinc an al và a vìv'r in Ohio par pò turnàr in Califòrgna finî 'l licèo. In dal 1986 a San Diego al cgnós al basìsta Robert DeLeo e insém a lò e a sò fradèl Dean DeLeo a la chitàra e a Eric Kretz a la baterìa i métan sù 'n grup ciamâ „Mighty Joe Young“. In dal 1990 i èṅ custrét a cambiàr nóm in Stone Temple Pilots, qvél ad prima 'l éra bèla druâ da di àtar sunadōr, e i fìrm'n un cuntràt cun la cà discugràfica Atlantic Records.
In dal 1992 a faṅ vgnir fóra 'l sò prim lavōr, Core. C'n al prim sìngul Sex Type Thing i dvènt'n òṅ di grup più impurtànt dal gènar grunge insém a gl'Alice in Chains, a i Soundgarden, a i Pearl Jam e a i Nirvana. In dal 1994 l'è la vòlta ad Purple ch'al gh la cava a rivàr a 'l prim pòst dal clasìfichi americàni. Cun Tiny Music... Songs from the Vatican Gift Shop dal 1996 i tàc'n i prubléma 'd dròga par Weiland tant che dimóndi dati di cuncèrt i vènan scanślàdi parchè lò al gh'iva da 'rmét'r-as in bóla.
Dòp Shangri-La Dee Da dal 2001 e dimóndi litgàdi durànt al tour, al grup al s divìd e Scott al pasa a cantàr p'r i Velvet Revolver ad Slash e ad Duff McKagan, èx di Guns N' Roses. Sèg al gh armàgn par dū disc ma pò al gh'à da bandunàr incòsa par via dal sò cumpurtamènt ch'al s fava mâł da par lò[1].
In dal 2008 al tórna a sunàr c'n i Stone Temple Pilots e insém i dàn'n a la luś un disc umònim in dal 2010. Tri an dòp al vèṅ casâ via c'n al grup ch'al tōś a 'l sò pòst Chester Bennington di Linkin Park. Weiland al gh fà càuśa ma al la pèrd.
Ardùt a sunàr in pòst pìcui e andàr in tour parchè «l'è la sōla manéra ad mét'r-as in bisàca quèl, adès che di disc a n s in véndan briśa»[2], Weiland al vèṅ catâ mòrt in dal Dicémbar dal 2015 mént'r al punsàva su 'l sò tour bus in Minneśòta. Cla sirà lè al gh'iva da sunàr insém a 'l sò grup nóṿ, i Scott Weiland & i Wildabouts, a la Ballroom Medina.
Discugrafìa
da par lò
- 1998 – 12 Bar Blues
- 2008 – "Happy" in Galoshes
- 2011 – The Most Wonderful Time of the Year
- 2011 – A Compilation of Scott Weiland Cover Songs
- 2015 – Blaster (publicâ cuma „Scott Weiland & The Wildabouts“)
c'n i Stone Temple Pilots
- 1992 – Core
- 1994 – Purple
- 1996 – Tiny Music... Songs from the Vatican Gift Shop
- 1999 – No. 4
- 2001 – Shangri-La Dee Da
- 2003 – Thank You
- 2010 – Stone Temple Pilots
c'n i Velvet Revolver
- 2004 – Contraband
- 2007 – Libertad
cun gl'Art of Anarchy
- 2015 – Art of Anarchy
Culóni sunòri
- 1994 – Il corvo, cun Big Empty
- 1998 – Paradiso perduto, cun Lady, Your Roof Brings Me Down
- 2001 – Non è un'altra stupida commedia americana, cun But Not Tonight, cover di Depeche Mode
- 2007 – Bug - La paranoia è contagiosa, cun Learning to Drive
Nòti
- ↑ 'L è mòrt Scott Weiland di Stone Temple Pilots: al s in và 'n àt'r eròe turmintâ dal grunge Corriere Della Sera, 4 ad Dicémbar dal 2015
- ↑ Adìo a Scott Weiland, vóś di Stone Temple Pilots e di Velvet Revolver Repubblica, 4 ad Dicémbar dal 2015