Alberta Brianti
|
C'l artìcul chè 'l è scrit in
Miranduléś |
L’Alberta Brianti (Sansgònt, 5 'd Avrìl dal 1980, a s lèś [al'bɛrta bri'anti] in Itagliàn) l'è na tenìsta itagliàna emigliàna prufesiunìsta da 'l 2000. La stà a Funtanlé e l'è bòna ad dascórar in Francéś e in Ingléś óltar ch'in Itagliàn ch'la sarés la sò léngua màdar.
L'è élta 165 cm e la péśa 60 chilo. La dróa al bras dèstar e la tira 'l arvèrs cun na maṅ sōla. Al 13 ad Śugn dal 2011 l'è rivàda a èsar la nùmar sinquànta-sinc dal mónd. In dla sò caréra in singulàr l'à purtâ a cà un tìtul WTA in sla tèra rósa ad Fès cóntar la Simona Halep al 24 'd Avrìl dal 2011 e nóṿ ad qvéi ITF. In dópi invéci la s è misa in bisàca 2 tìtui WTA e ùndas ITF.
A gh piàś al śōg dal balòṅ e far dal còmpri. I sò film preferî i èṅ Top Gun e Ghost mént'r al cantànt ch'la scólta vluntéra 'l è Eros Ramazzotti.
Caréra
La parmśàna la taca a śugàr soquànt turnèo ITF in dal 1995. In dal Maǵ dal 2001 la vins al sò prim tìtul a Guimarães. In Śugn, pasànd p'r al qualificasiòṅ, la tōś part a 'l sò prim turnèo WTA a Taškent ma la pèrd a 'l prim tùran. In dal 2002 la pòrta a cà 'n ITF da déś-mila dòlar in dal Régn Unî e àtar dū in Spaggna. In dl'Istâ dal 2003 la và a śugàr 'l ITF da sinquànta-mila dòlar a Oyster Bay. Pasàdi al qualificasiòṅ, la dà la paga subìt a la Varvara Lepchenko par 6-2 5-0 bandòṅ ma pò la pèrd in tri sét cun la padròna ad cà, la Bethanie Mattek-Sands. In Utóbar la pèrd nét, 2-6 0-6, da la Roberta Vinci in dal prim tùran d'l ITF ad Latìna. La sèra 'l an a la puśisiòṅ tarśènt dal mónd.
In dal 2006 la taca a muntàr sù in clasìfica e la 'l fà vinsénd 'n ITF canadéś da vintsìnc-mila dòlar cóntar la Dominika Cibulková e 'n àtar in Rùsia baténd l'Ekaterina Makarova in di quàrt e l'Alla Kudrjavceva in finàl. Faghénd pò finàl in àtar dū ITF la riva a èsar la nùmar 187 dal ranking. In Maǵ la gh'à di punt abàsta par śugàr e pasàr al qualificasiòṅ a 'l Roland Garros anc se pò la céd subìt a l'Aravane Rezaï. In Agóst la vins al sò prim incónt'r in dal sircùit WTA a Montreal cun l'indiàna Sania Mirza c'n al puntéǵ ad 2-6 6-1 6-2. La fà méj incóra a Calcùta in dua la riva in di quàrt. In Utóbar la tōś part a 'l ITF ad San Raflèṅ rivànd anc in semifinàl baténd la Galina Voskoboeva ma pardénd pò cun la Stéphanie Foretz Gacon. In Nuvémbar, par via dla finàla śugàda a Deauville, la fà al sò ingrès in dal primi sènt śugadōri dal mónd.
La tenìsta emigliàna in dal Śnar dal 2007 la pèrd a 'l prim tùran di Australian Open cun la Lucie Šafářová par 3-6 1-6 e pò la finàl dal turnèo ITF 'd Urtiśèi cun la Caroline Wozniacki par 6-4 5-7 3-6. In Favràr a Las Vegas la riva in di quàrt, batùda par la giapunéśa Akiko Morigami. In Mars la pasa 'l qualificasiòṅ a Indian Wells ma la pèrd a 'l secónd tùran da l'Al'ona Bondarenko 5-7 5-7. A Esturìl la bat a 'l prim tùran l'Eleni Daniilidou ma pò la céd, par la sèsta vòlta su siē, a la sò bistiàsa négra, la Lourdes Domínguez Lino, par 1-6 1-6. Da lè in avànti la fà mâl, pardénd sèmpar subìt a Praga (5-7 3-6 da la Viktorija Kutuzova), a Róma (2-6 3-6 da la Galina Voskoboeva), a 'l Roland Garros (1-6 1-6 da la Sania Mirza), in d'l ITF ad Surbiton (2-6 4-6 da la Melanie South), a Birmingham (3-6 1-4 bandòṅ cun la Nathalie Dechy) e a Wimbledon (4-6 0-6 da l'Akiko Morigami). In Agóst la pèrd a 'l prim tùran a Los Angeles da la Viktoryja Azaranka e la fà cumpàgn anc a gl'US Open (2-6 0-6 da la Michaëlla Krajicek). In Utóbar la s tōś l'arvìnsida cun la Stéphanie Foretz Gacon baténd-la in finàl in d'l ITF ad San Raflèṅ ma la finìs listés 'l an crudànd śò in clasìfica a 'l 144śum pòst.
Dòp 'n inìsi dal 2008 da schiva cun sinc scunfìti ad fila, la parmśàna la pèrd in tri sét cun l'Arantxa Rus la finàla d'l ITF ad Bari śugàda in Avrìl. In Luj la s qualìfica p'r al turnèo ad Palèrum faghénd fóra in dū sét l'Anastasija Pavljučenkova ma pò la pèrd subìt da la carta salvàdga Corinna Dentoni par 6-4 6-7 5-7. Anc a Pòrtrōś la pèrd a 'l prim tùran da n'itagliàna, la Roberta Vinci, dòp avér pasâ 'l qualificasiòṅ. La n i pasa minga invéci a Stucàrda ma almànc la s cava la sudisfasiòṅ ad bàtar la Mona Barthel par 4-6 7-5 6-2. In Utóbar, baténd lung la via l'Angelique Kerber e la Roberta Vinci, la riva in finàl in d'l ITF ad Barnstaple ma la la pèrd cun l'Anne Keothavong par 4-6 2-6. Dòp n'atra finàl andàda mâl a Saguenay (3-6 1-6 da l'Alexa Glatch), la bat l'Andrea Petković a 'l prim tùran d'l ITF 'd Ismaning ma pò la s férma lè.
La Brianti la taca bèṅ al 2009 pasànd 'l qualificasiòṅ a Auckland (baténd l'Yvonne Meusburger 6-3 6-2) e a Melbourne (baténd la Johanna Larsson, la Michelle Larcher De Brito e la Vania King). In dla Śelànda Nóva però la ciàpa n'imbarcàda subìt da la Caroline Wozniacki, 1-6 0-6, mént'r in di Australian Open la bat almànc la Yanina Wickmayer prima ad cédar a l'Ana Ivanović par 3-6 2-6. A Stucàrda da qualificàda la mòla un 6-0 a la Cvetana Pironkova par pò pèrd'r-ag listés in tri sét. Anc a Róma e a Wimbledon la và fóra subìt, cun dū itagliàni, ciapànd un 3-6 4-6 da la Francesca Schiavone e un 4-6 3-6 da la Tathiana Garbin. In d'l ITF ad Cùneo la bat la śóvna carta salvàdga Nastassja Burnett par 5-7 6-2 7-6 e pò anc la Dar'ja Kustova 6-1 6-3 prima ad lasàr strada a la Stefanie Vögele par 4-6 3-6. In Luj l'è bòna incóra ad mandàr a cà l'Anastasija Pavljučenkova a Palèrum ma minga la Jaroslava Švedova ch'la vins sèg 6-3 6-2. Sèmp'r in cal méś lè, par la prima vòlta in caréra, la śóga na semifinàl WTA a Pòrtrōś, pardénd-la 4-6 3-6 cun la nùmar òṅ dal mónd, la rusa Dinara Safina. In Setémbar la fà 'n pas in avànti cun la finàl a Cantòn śugàda baténd l'Ayumi Morita ma l'è la Shahar Peer a purtàr-'s a cà 'l tìtul par 6-3 6-4. L'emigliàna la finìs la stagioṅ a 'l nùmar stanta-quàtar dal mónd.
In dal 2010 la fà 'n grand Australian Open in dua la bat la Varvara Lepchenko par 6-0 3-6 6-1 e pò la nùmar vint-quàtar dal mónd, la tedésca Sabine Lisicki, par 2-6 6-4 6-4. La pèrd sōl a 'l tèrs tùran cun la padròna ad cà, la Samantha Stosur, nùmar trédas dal ranking dal fémni. A Indian Wells e a Miami però la và fóra subìt cun la Petra Kvitová e cun la Sofia Arvidsson. In Maǵ a Róma la dà al tèrs daspiaśēr in tri an a l'Anastasija Pavljučenkova par 6-4 7-6 ma pò la và a cà a 'l secónd tùran cun la Dominika Cibulková par 3-6 4-6. A 'l Roland Garros, a Birmingham e a 'S-Hertogenbosch la mét in fila tri prim tùr'n ad fila cun la Vera Zvonarëva, la Bethanie Mattek-Sands e l'Alla Kudrjavceva mént'r a Wimbledon l'è l'Agnieszka Radwańska a mandàr-la a cà a 'l secónd tùran sćiancànd-la 6-2 6-0. In Aṿtòṅ la s mét in dal bisachèṅ 'n àtar ITF in Cina da sènt-mila dòlar baténd la Shuai Zhang in semifinàl e la Magdaléna Rybáriková in finàl. In Utóbar la s férma in di utàṿ a Uśàka cun l'Iveta Benešová dòp avér fat fóra l'Ayumi Morita in tri sét.
In dal Śnar dal 2011 la s qualìfica in dal turnèo 'd Auckland vinsénd cun la Mandy Minella, cun l'Elena Bovina e cun l'Heather Watson. A 'l prim tùran però la và a cà cun la Marija Šarapova mént'r a Hobart la vins cun la Carla Suárez Navarro e la pèrd cun la Klára Zakopalová. A gl'Australian Open la bat la Lucie Hradecká 6-4 7-5 ma pò la pèrd a 'l secónd tùran cun la Dominika Cibulková par 1-6 6-4 2-6. Dòp soquànt riśultâ a 'l arvèrsa, la parmśàna la vins al sò prim turnèo WTA in Maròc a Fès baténd in finàl la ruména Simona Halep par 6-4 6-3. In Avrìl a Barcelóna la bat la Cvetana Pironkova 6-1 6-2 e la Varvara Lepchenko 6-0 5-7 6-2 par pò lasàr strada a la Sara Errani par 2-6 3-6. A 'l Roland Garros l'è invéci la Roberta Vinci a bat'r-la a 'l prim tùran par 3-6 6-3 3-6. In Śugn la tōś part a 'l turnèo danéś ad Cupenàghen e l'è bòna ad rivàr in di quàrt vinsénd cun l'Aleksandra Panova e cun la Zuzana Kucová paténd pò un 0-6 1-6 cun la Caroline Wozniacki. A Washington e a Carlsbad la riva a 'l tèrs tùran lasànd pò strada a la Shahar Peer e a l'Ana Ivanović. L'emigliàna la finìs al rèst dla stagiòṅ muciànd sù sōl di prim e di secónd tùran.
Al sò inìsi dal 2012 'l è dimóndi brut c'n i prim tùran a Auckland, a Hobart e a Parì a 'l quèrt e 'l secónd tùr'n a Melbourne. A Memphis la riva invéci in semifinàl ma la la pèrd cun la Sofia Arvidsson par 3-6 5-7. A Acapûlc la bat in tri sét la francéśa Alizé Cornet ma pò la fà 'l valìś subìt dòp cun la Michaëlla Krajicek. A Fès la pèrd tut i punt d'l an prima pardénd a 'l prim tùran da l'Alexandra Cadanțu par 7-5 5-7 1-6 mént'r a Bùdapest la lasa strada a la Sara Errani in di quàrt. Qvéla cun la bulgnéśa l'è la prima 'd òt scunfìti ad fila. La vins incóra 'n incónt'r in d'l ITF ad Bièla ma pò la céd a la Nastassja Burnett in dū sét. La luś la sa śmòrsa par lē ch'la strabùca a la fiṅ d'l an a 'l 130śum pòst.
Al sò 2013 al và anc pèś e l’Alberta la ślìcia śò in clasìfica in fiṅ a la pùśisiòṅ 290 a mità an. In Śugn e Luj, cun na semifinàl e na finàl in dū turnèo ITF da vint-sinc mila dòlar, la tórna a far di punt. In Agóst, baténd la Patricia Mayr-Achleitner, la śóga la finàl d'l ITF da sinquànta-mila dòlar ad Crajòva ma la la pèrd cun la Kristína Kučová par 5-7 6-3 4-6. In Agóst la céd in semifinàl a la Gioia Barbieri in d'l ITF ad Bagnàdiga. In Utóbar la śōga atri dū finàli ITF ma la i pèrd cun la Kateřina Siniaková e cun l'Arantxa Rus. L'emigliàna la sèra pò 'l an cun atri quàtar scunfìti ad fila in sal cupét.