Pajàs
|
C'l artìcul chè 'l è scrit in
Miranduléś |
Al pajàs, cgnusû anc c'n al nóm ingléś ad clown, 'l è 'n persunàǵ ch'al gh'à 'l còmpit ad far rìdar la gint, jutànd-as anc trucànd-as la ghigna o miténd-'s adòs di vistî ridìcui, grand e culurâ. 'L è par cal mutìṿ chè ch'al piàś dimóndi a i putèṅ e ch'i aṅ dâ 'l nóm ad pés pajàs a 'n pés dimóndi culurâ ch'al viṿ in mèś a gl'anèmuni 'd mâr. L'è da spés na figùra impgnàda in di cîrc.
'L è fàcil ch'al nóm pajàs al daśvéggna da la paja in du a s pinsàva ch'al durmìs o da 'l vistî a sac ad paja druâ da di persunàǵ dal teàt'r itagliàṅ ch'i fàvan la part di sèruv siòc.
Dar però dal pajàs a qualchidòṅ a n è mia 'n cumplimènt parchè 'l è 'n sinònim ad bufòṅ e dna parsòna ch'a n gh s pōl minga cuntàr-'g insìma o 'd 'n óm minga tant sèri ch'al càmbia idéa cun gnint e che dònca la sò paròla la n vâl 'n fîg séc.
In di uśdài i clown i èṅ druâ par far rìdar la gint, specialmènt i putèṅ, parchè rìdar a tira sù e a juta a far guarìr prima. Tacànd da soquànt film ad scarésa cuma It, Jolly Killer, Fear of Clowns, The Clown, Clown house, Mockingbird - In diretta dall'inferno, Il tunnel dell'orrore, Killer klowns from outer space, La casa dei 1000 corpi, Fuori nel buio e via dascurénd a s è fat strada la figùra dal pajàs catìṿ e sasèṅ. In dal 2014 in Emìglia, in d'l Arśàṅ e in dal Mudnéś specialmènt, dimóndi gint l'è andàda da i carabinēr dgénd ch'i ìvan vdû di pajàs cun di bastòṅ e dal masi ch'i gh tgnìv'n adrē[1]. Un quèl dal gènar 'l è sucès anc in di Stat Unî in dua in soquànt stat i aṅ bcâ dla gint vistìda da pajàs ch'la saltava fóra 'd nòt cun di curtèi o dal manàri par spavintàr qvéi ch'i pasàvan da 'd lè[2].
Ved anca
Nòti
- ↑ Banda ad pajàs “sasèṅ”, psicóśi in Emìglia: “Sōl dimóndi segnalasiòṅ ma gnanc un caś” Il Fatto Quotidiano, 17 'd Utóbar dal 2014
- ↑ Usa, l'è "clown hysteria": di pajàs inchietànt i spavén't al paéś La Repubblica, 8 'd Utóbar dal 2016
Àtar prugèt
Wikiquote contiene citazioni di o su Pajàs
Wikimedia Commons contiene file multimediali su Pajàs
Wikizionario contiene la voce di dizionario «Pajàs»
