Wikipedia

The Cure

grup muśicàl ingléś

C'l artìcul chè 'l è scrit in Miranduléś Emiliàn


«
And I laugh as I drift in the wind blind dancing on a beach of stone, cherish the faces as they wait for the end, a sudden hush across the water and we're here again. And the sand and the sea grows, I close my eyes move slowly through drowning waves going away on a strange day.»
(EN)(A Strange Day, 1982)
«
E a rid mènt'r al vènt òrub al m pórta sèg balànd su na spiàgia ad giaròṅ, a tégn in dal cōr i grugn ch'i spètan la fiṅ, un silènsi impruvìś in mèś a l'àqua e a sém incóra chè. E la sàbia e 'l mâr i crésan, mè a sèr i òć muvénd-um piàṅ dènt'r a gl'óndi ch'i m négan, mént'r a vag via in un dè strâṅ.»
(MUD)
Al prim logo dal grup

The Cure (La Cura) 'l è 'l nóm 'd un grup muśicàl ingléś post punk, ch'l à eśurdî in dal 1976, durànt i an dla New Wave, insém a dal bandi cuma i Joy Division, i Bauhaus, i Sisters of Mercy, i Cocteau Twins e i Siouxsie and the Banshees. Da 'l Dicémbar dal 2018 i èṅ stâ sarnî par finìr in dla Rock and Roll Hall of Fame dal 2019[1].

I Cure da 'l viṿ in dal 2004

Al grup, ch'l à cambiâ da spés furmasiòṅ in dal cōrs dal tèmp rivànd a muciàr sù siē elemènt a 'l màsim c'n un mìnim ad dū, 'l à tucâ al punt più grand dal sucès in dal secónda mità di an Utànta, c'n i sìngui Close to Me e Lullaby, in fiṅ a 'l inìsi di an Nuànta. Robert Smith, cantànt, chitarìsta, aṿtōr di tèst e fundadōr dla banda, 'l è 'l ùnic mémbar c'l à sémpar fat part di Cure.

I Cure i èṅ dimóndi da spés mis incòst a i gènar gothic rock e dark, par via dla manéra ad far-as védar, trista e decadènta, specialmènt in di prim an Utànta c'n i disc Seventeen Seconds, Faith e Pornography specialmènt, préda migliàra dabòṅ dal gènar. Robert Smith però 'l à sèmpar parâ via cla definisiòṅ lè, dgénd ch'i Cure i n èṅ mai stâ goth.

«
'L è dimóndi trist quànd «goth» al cuntìnua a èsar tacâ a 'l nóm «The Cure». Nuàtar a n sém minga clasificàbii. Cuma pō't descrìv'r un grup ch'l à fat vgnir fóra 'n àlbum cuma Pornography e anc Greatest Hits, in dua tut al cansòṅ i èṅ andàdi dèntar in di Top Ten ad tut al mónd? Mè a sòṅ sōl la mùśica di Cure, qvéla basta ch'a sia.»
(Robert Smith)

Biugrafìa

I prim an (1976-1982)

Porl in dal 2008

Robert Smith, leader sénsa dubi dal grup, al nas a Blackpool in dal Lancashire, al 21 'd Avrìl dal 1959, ma al crés a Crawley in dal West Sussex. Da pìcul al vliva dvintàr un scritōr e 'l iva garantî ch'al s sarév masâ prima ad cumpìr vint-sinc an, ma pò al s è curèt dgénd:

«
A-j-ò capî ch'a gh 'l ò cavàda a far quèl in cla vita chè e quést chè al m à dâ na carga nóva. A m sènt più cuntènt. Al mè visi più brut 'l è quél ad bévar tròpa bira.»
(Robert Smith)

I sò prim grup i èṅ i The Obelisk e i Malice. In dal 1977 al dà vita a gl'Easy Cure e al dvènta 'l cantànt (prima a gh'éra 'n giurnalìsta ch'al s ciamàva Martin Creasy). La banda l'è furmàda da lò a la chitàra, Michael Dempsey a 'l bas, Lol Tolhurst a la baterìa e Porl Thompson, al fradèl dla muróśa ad Lol.

«
Dòp un cuncèrt, a-j-ò girâ a vōd in fiṅ tant ch'a sòṅ rivâ in dal camarèṅ di Generation X par catàr al gabinét, ma qualchidòṅ a 'l us al m à dit ch'a n psiva minga andàr-ag dèntar. Mè a séra dasprâ alóra a-j-ò fat finta ad gnint e a sòṅ andâ dèntar listés e a-j-ò vdû Billy Idol in pē cónt'r al pisatòj cun na ragàsa in na puśisiòṅ da vargugnàr-'s abàsta. Lò al m à fat òṅ di sò ghign famóś ma mè a-j-ò pinsâ: «A n m in ciàva gnint, a n vag minga via», acsè a gh sòṅ andâ davśèṅ e a-j-ò tirâ fóra al mè pistulèṅ. Lò al dgiva sōl: «Minga arliàr-at, minga arliàr-at!». Mè a m sòṅ girâ vèrs ad lò e a-j-ò dit: «OK, Billy...» e pò a gh'ò pisâ adòs!.»
(Laurence Tolhurts)

I nàs'n i The Cure

Robert Smith e Jason Cooper durànt un cuncèrt a Praga in dal Favràr dal 2008

In d'l Avrìl dal stés an, la tedésca Hansa Records la fà 'n cuncōrs par catàr di talènt nóṿ e la i mét sóta cuntàt dand-ag mila starlìni, druàdi par cumpràr i strumènt muśicài e par far i prim demo. Però sōl déś méś dòp gl’Easy Cure i vaṅ par cònt suo parchè i éran stuf ch'la cà discugràfica la gh stis sèmp'r adòs e ch'la vliva sōl dal cover ad braṅ famóś.

«
Pinsànd-'g adès, 'l interès ch'i gh'ìvan nòsc 'l éra sōl p'r al nòstar look [...]. A n créd gnanc ch'i àppian mai scultâ la nòstra caséta - a gh'éra piaśû sōl la foto!»
(Robert Smith)

In Maǵ Porl Thompson al mòla 'l grup parchè al vdiva ch'al stîł muśicàl sarnî 'l éra difarènt ad qvél ch'l arév vlû lò. In cal méntar ch'i àtar tri i càmbian nóm in The Cure.

La prima publicasiòṅ dla banda, par la cà discugràfica Small Wonder, l'è dal Dicémbar dal 1978. A s trata dal sìngul Killing an Arab (Masànd 'n àrab) e 'l sò tèst al tulìva ispirasiòṅ da 'l lìbar Al furastēr 'd Albert Camus. La canta l'à fat sù un muć ad pulèmichi p'r al sò tìtul e, dimóndi vòlti, i Cure i èṅ stâ custrét a far dal dichiarasiòṅ uficiàli par dir ch'a n è minga véra ch'la cansòṅ l'è rasìsta o viulènta. Purtròp cla giustificasiòṅ chè la n è minga abàsta e la cansòṅ la sarà misa da na banda da 'l ràddio americàni in dal perìud dòp 'l 11 ad Setémbar e i Cure, par far in manéra ad casàr via tut al pulèmichi, a s pōl dar, i n l'aṅ più cantàda in fiṅ a l'Istâ dal 2005, quànd l'è turnàda indrē ma c'n un tìtul più alśēr, Kissing an Arab.

«
Standing on the beach with a gun in my hand, staring at the sea, staring at the sand, staring down the barrel at the arab on the ground, I can see his open mouth but I hear no sound.»
(EN)(Killing an Arab, 1978)
«
A stag in spiàgia cun na pistòla in dla maṅ, guardànd al mâr, guardànd la sàbia, a punt in śò la cana vèrs 'l àrab par tèra, a pòs védar la sò bóca vèrta ma a n sènt gnint.»
(MUD)

Al prim àlbum

Smith e O'Donnell a Bulóggna in dal 2016

'L àlbum ad debùt, vgnû fóra in dal 1979 par la péna nada Fiction Records ad Chris Parry dla Polydor, al s intìtula Three Imaginary Boys (Tri ragàs imaginàri). I èṅ ciàr fin da subìt i riferimènt muśicài dla banda, al punk e 'l art rock ad David Bowie ma anc i trat minimalìsta e persunài.

A s fà nutàr anc la cretinìśia ad So What? (E alóra?), c'n un Robert Smith imbariàg ch'a n gh la cava minga a far-as vgnir in a mènt gnanc un tèst basta ch'a sia e alóra al lèś a 'l micròfun la reclàm 'd un sèt par la decurasiòṅ dal tórti a partìr da na cunfesiòṅ ad sùcar.

In Śugn i faṅ vgnir fóra al secónd sìngul Boys Don't Cry (I ragàs i n piànśan minga) che, insém a 'l canti fati dòp Lullaby e Close to Me, 'l è, a s pōl dar, òṅ di sìngui più cgnusû dal grup.

«
I would break down at your feet and beg forgiveness plead with you but I know that it's too late and now there's nothing I can do so I try to laugh about it, cover it all up with lies, I try to laugh about it hiding the tears in my eyes 'cause boys don't cry.»
(EN)(Boys Don't Cry, 1979)
«
A m butarév a i tò pē e a t dmandarév scuśa par piaśēr ma a sò ch'l è tròp tard e a n pòs più far-ag gnint, alóra a próṿ a rid'r-ag sù, lugànd incòsa cun dal buśìi, a próṿ a rid'r-ag sù, lugànd al làgarmi da i mè òć parchè i baghét i n piànśan minga.»
(MUD)
Un diségn ad Robert Smith

Al méś dòp Robert Smith al regìstra un sìngul c'n un grup tirâ sù in cal mumènt, i «Cult Heroes», c'n al pustèṅ 'd Horley Frank Bell cuma cantànt e 'l sò amìg Simon Gallup a 'l bas. Durànt la sesiòṅ ad registrasiòṅ, i s śóntan via via anc Porl Thompson, la Janet Smith (ch'l'è pò la surèla ad Robert), e àtar dódas parsòni sèmpar 'd Horley, tuti lè a divertìr-as. Al sìngul I'm a Cult Hero/I Dig You al vénd bèn in Cànada: 35.000 còpi.

In cal mèntar i Cure i cuntìnuan a far-'s i ós, sunànd a drē a i Wire, a i Generation X, a i The Police e a i Joy Division. Al 3 'd Agóst dal 1979, in particulàr, Robert Smith al cgnós i mémbar dal grup di Siouxsie and The Banshees e a gh fà subìt amicìsia. Quand a Aberdeen tut 'd un trat al baterìsta e 'l chitarìsta di Banshees i mòlan lè 'l grup, Robert al vèṅ tòlt da Siouxsie (al sècul Susan Ballion) par rimpiasàr-i e psēr acsè cuntinuàr al tour.

Dòp la publicasiòṅ, in Nuvémbar, dal tèrs sìngul, Jumping Someone Else's Train (Dasfrutànd qualchidòṅ àtar), Dempsey al vèṅ rimpiasâ par Simon Gallup parchè al n gh la cavàva minga a supurtàr 'l ategiamènt autoritàri ad Smith.

'L an dòp, p'r al marcâ americàṅ, a vèṅ publicàda na versiòṅ difarénta d'l àlbum intitulàda Boys Don't Cry cun dèntar i tri sìngui (Killing An Arab, Boys Don't Cry e Jumping Someone Else's Train) e àtar dū braṅ (Plastic Passion e World War) a 'l pòst ad Foxy Lady (cover ad Jimi Hendrix), Meathook e It's Not You.

Al perìud dark (1980-1982)

Gallup tòlt śò in dal 2008

Cun 'l ingrès ad Gallup e dal tasterìsta Matthieu Hartley (ex di Magspies cuma Simon), i tôṅ i sa scurìsan, incanalànd-'s in dal melancónig Seventeen Seconds (Darsét secónd, 1980).

«
Mè e Simon a séran càrag parchè l'éra la prima vòlta in studi par nuàtar. Par Robert e Lol l'éra cumpàgn parchè i psiva far quèl ad difarènt - A dir-la tuta, ninsòṅ 'l éra d'l umōr ch'a s sènt in dal disc ch'l è trist a basta.»
(Matthieu Hartley in sla registrasiòṅ d'l àlbum Seventeen Seconds)

'L ùnic sìngul tirâ fóra da 'l àlbum 'l è A Forest, un clàsic dal grup sunâ sèmpar in di cuncèrt e c'n un vìdeo da i tôṅ dimóndi scûr e claustrufòbic. Anc chi atri canti (cuma M, Play For Today, At Night, In Your House o la title track) i sònan cumpàgni.

«
Sunk deep in the night I sink in the night, standing alone underneath the sky I feel the chill of ice on my face, I watch the hours go by, the hours go by.»
(EN)(At Night, 1980)
«
Sprufundâ in dla nòt a vag śò in dla nòt, stand da par mè sóta 'l cēl a sènt al fréd dal giàs in sal gnugn, a guard gl'óri pasàr via, gl'óri pasàr via.»
(MUD)

A cal punt lè i Cure i ìvan bèla tacâ a giràr p'r al mónd in tour: Europa, Stat Unî e Austràglia. Na vólta turnâ a cà però Smith, Gallup e Tolhurst i s réndan cònt che Hartley a n è più adàt a 'rmàgn'r in dal grup e acsè al tastérista al tōś 'l us.

Smith a Singapōr in d'l Agóst dal 2007

'L è acsè ch'i Cure i s càt'n incóra in tri quànd 'l è óra 'd registràr al tèrs àlbum, Faith (Fēd, 1981), un lavōr incóra più trist e vilî dal precedènt, ch'al dascór dla fēd e dla fidùcia e dal rapòrt che la gint la gh'à sèg.

Dimóndi impurtànt in d'l àlbum 'l è 'l braṅ trist e melancònig The Holy Hour dedicâ a 'l cantànt di Joy Division, Ian Curtis, ch'al s éra masâ da pôc. Al sìngul 'l è Primary 'l è stâ sunâ più in présia ch'in dla demo par far in manéra ch'a gh fus quèl ch'a s dastachìs un pôc da 'l rèst, in manéra da psēr èsar trasmìs a la ràddio. 'D atra part The Funeral Party, All Cats Are Grey o The Drowning Man, dedicàda a 'l persunàǵ dla Lady Fuchsia Groan, i n psiva minga èsar sarnìdi par cal scòp lè.

«
She stands twelve feet above the flood, she stares alone across the water, the loneliness grows and slowly fills her frozen body sliding downwards. One by one her senses die, the memories fade and leave her eyes, still seeing worlds that never were and one by one the bright birds leave her.»
(EN)(The Drowning Man, 1981)
«
Lì lē la stà dódas pē insìma a i flut, da par lē la guarda in mèś a l'àqua, la sulitùdin la crés e piàn piaṅ l'impinìs al sò còrp ślâ mént'r al śbliśga vèrs al bas. Oṅ a òṅ i sò sèns i mōran, i arcòrd i sparìs'n e i làs'n i sò òć ch'i cuntìnuan a védar di mónd ch'i n gh'èṅ mai stâ e òṅ a òṅ gl'uśèi luśènt i la bandònan lè.»
(MUD)

In dla versiòṅ in caséta, la banda B al gh'à dèntar 'l inèdit Carnage Visors, un braṅ lung e strumentàł rigistrâ da Robert Smith par la culóna sunòra 'd un curtumetràǵ ad Ric Gallup, fradèl ad Simon. Carnage Visors 'l è stâ mis dèntar sōl adès in dla versiòṅ deluxe ad Faith.

In dal 1982 i Cure i faṅ vgnir fóra Pornography (Purnugrafìa), al tèrs e ùltim àlbum ad na trilugìa tacàda cun Seventeen Second. Però 'sta vòlta chè 'l disc 'l è scûr fòrt e pesimìsta, pîn 'd arlìa (Lol al gh dà dèntar cun la sò baterìa) e disperasiòṅ.

«
Al nichilìśum 'l iva tòlt al cuntròl, a cantàvan: «A n s in ciàva gnint s a murém tut». E 'l éra pròpria quél ch'a pinsàvan in alóra.»
(Robert Smith al dà al sò parēr su Pornography)

Al sìngul 'l è The Hanging Garden ma i s faṅ nutàr anc One hundred years (ch'la dascór dla guèra), The figurehead, Cold e A Strange Day, la stòria 'd 'n óm ch'al s dà la mòrt decidénd 'd andgàr-'s in un dè strâṅ.

«
Stroking your hair as the patriots are shot, fighting for freedom on the television, sharing the world with slaughtered pigs, have we got everything? She struggles to get away. The pain and the creeping feeling, a little black haired girl waiting for saturday, the death of her father pushing her, pushing her white face into the mirror, aching inside me and turn me around, just like the old days, just like the old days. Caressing an old man and painting a lifeless face, just a piece of new meat in a clean room, the soldiers close in under a yellow moon, all shadows and deliverance under a black flag. A hundred years of blood crimson, the ribbon tightens around my throat, I open my mouth and my head bursts open, a sound like a tiger thrashing in the water, thrashing in the water, over and over, we die one after the other, over and over, we die one after the other after the other. It feels like a hundred years»
(EN)(100 Years, 1982)
«
Ta t lis i cavìi mènt'r i partiôt i vènan masâ, cumbaténd par la libertà in televiśiòṅ, sparténd-'s al mónd c'n i ninét maslâ, gh'ém-j-a incòsa nuàtar? Lē la s àgita p'r andàr via. Al dulōr e la sensasiòṅ ad traśamènt, na baghéta da i cavìi négar ch'la spèta 'l Sàbat, la mòrt ad sò pàdar la la cùcia, la gh stablìs la sò fàcia śbiàvda incòst a 'l spèć faghénd-um dal mal dèntar, e arbaltànd-um pròpria cuma in di dè andâ, pròpria cuma in di dè andâ. Dand na carésa a 'n vèć e piturànd na fàcia sénsa vita, sōl un pès ad carna nóva in na cambra pulìda, i suldâ i s davśìnan sóta na luna śala, tuta òri e liberasiòṅ, sóta na bandéra négra. Sènt an ad sangṿ crèmas, al nàst'r al sa strinś a la mè góla, mè a vèr la bóca e la mè tèsta la sćiòpa, un sôṅ cuma na tigra ch'la s rabìs in dl'àqua, la s rabìs in dl'àqua, incóra e incóra, nuàt'r a murém òṅ a drē a c'l àtar, incóra e incóra, nuàt'r a murém òṅ a drē a c'l àtar, i pàran sènt an.»
(MUD)
I Cure a Róma in dal 2008

In cal perìud lè, anc par cólpa dal dròghi e dal strès p'r i tròp impégn (Robert al sòna anc p'r i Siouxsie and the Banshees), i rapòrt a 'l intéran dal grup i s fànan sèmpar più téś. Smith a s pìcia cun Gallup durant al Pornography tour e al basìsta al và via finìda la tournée.

Robert, da 'l cant suo, al s tōś un perìud ad vacànsa ma in séguit al dirà che, in cal mumènt lè, i Cure i s éran finî praticamènt.

Al perìud pop (1983-1986)

Steven Severin

Dòp i prubléma ad Pornography, Robert Smith praticamènt da par lò al regìstra un braṅ par la rivìsta "Flexipop Magazine" ch'al s intìtula Lament. Al parti ad bas i èṅ sunàdi par Steven Severin. A s trata dna cansòṅ ch'la dascór incóra 'd 'n àtar persunàǵ andgâ, dòp The Drowning Man e A Strange Day.

«
Today there was a tragedy underneath the bridge, a man walked cold and blue into La Ment. The sky coloured perfect as the man slipped away waving with a last vanilla smile.»
(EN)(Lament, 1982)
«
Incō 'l è sucès na daśgràsia sót a 'l pònt, 'n óm 'l è andâ déntar, fréd e vilî, a La Mènt. Al cēl 'l iva di culōr parfèt méntar c'l óm lè al śliciàva via faghénd ciào cun 'n ùltim surìś ad vanìja.»
(MUD)

Al prudutōr Parry al próa a cunvìnsar Smith e Tolhurst (pasâ in cal mént'r a sunàr al tastéri) a cambiàr gènar, mulànd al dark p'r al pop e par di cumpunimènt più alégar. 'L è acsè che i dū Cure armàś, insém a 'l turnìsta Steve Goulding, i daṅ vita a Let's Go To Bed c'n al vìddeo dal pès girâ par Tim Pope, un regìsta ch'a s lig'rà a i Cure par dimondi tèmp.

Fra Mars e Maǵ dal 1983, Smith al taca 'n àtar prugèt muśicàl insém a 'l basìsta di Banshees Steven Severin, ciamâ The Glove (Al guànt) dand vita a 'l disc psichedèlic Blue Sunshine (Al Sōl al luśa 'd blù) vgnû fóra in Setémbar c'n i sìngui Like An Animal e Punish Me With Kisses. Smith par via ad probléma cuntratuài al n pól minga ès'r al cantànt e 'l parti vucàli i èṅ òpra dla Jeanette Landray, la muróśa 'd Budgie, baterìsta e marè in séguit dla Siouxsie. Smith al canta sōl in dū braṅ: Mr. Alphabet Says e Perfect Murder.

Finî 'l lavōr c'n i Glove Smith al cuntìnua a muciàr sù di àtar sìngui c'n i Cure: prima The Walk e pò The Lovecats ispiràda a 'l film ad Walt Disney Gli Aristogatti. Insém a Phil Thornalley a 'l bas e a Andy Anderson a la baterìa (Lol 'l armàgn incóra a 'l tastéri), i Cure i tórn'n a far di cuncèrt méntar la Fiction la fa sù i sìngui fat dòp Pornography e l'imbastìs na racòlta ciamàda Japanese Whispers (Bacajamènt giapunéś, 1983) ch'la gh'à dèntar na versiòṅ nóva ad Lament e di atri b-sides.

'L an dòp a vèṅ fóra The Top (La sima, 1984), un lavōr dimóndi difarènt in di pès cun Porl Thompson ch'al tórna in dal grup cuma chitarìsta. Al sìngul 'l è The Caterpillar.

«
Dust my lemon lies with powder pink and sweet, the day I stop is the day you change and fly away from me.»
(EN)(The Caterpillar, 1984)
«
Da śò la pólvra da 'l mè buśìi a 'l limòṅ cun dla pólvra dólsa e ròśa, al dè ch'a m férum 'l è 'l dè ch'at cambi e ch'at vōl via luntàṅ da mè.»
(MUD)
Porl da 'l viṿ a Róma in dal 2008

I Cure i pàsan anc dal nòstri bandi: al 20 ad Maǵ dal 1984 i èṅ a Bulógna.

In cal perìud chè Robert Smith al s masa 'd fadìga: 'l è incóra mémbar di Banshees (in dal 1984 al dà na maṅ a 'l disc ad Siouxsie Hyæna) e in The Top al scriv lò tut i braṅ e al i sòna anc (Phil Thornalley al s catàva in Austràglia c'n i Duran Duran) tulénd da spés anc dal dròghi.

In Utóbar a vèṅ publicâ al prim disc da 'l viṿ, Concert: The Cure Live trat da soquànt cuncèrt ingléś dal Maǵ dal 1984 ad Lóndra e 'd Oxford dal «Top Tour». In dla banda B dla caséta, a s pōl catàr na versiòṅ ad Forever, na canta ch'i Cure i aṅ fat impruviśànd da 'l viṿ, cun Smith ch'al s invintàva 'l paròli in sal mumènt.

Durànt la tournée in Giapòṅ al baterìsta négar Andy Anderson, alculiśâ pódag, al s buta adòs a chi àtar par piciàr-i 'd nòt in 'n albêrg e acsè al vèṅ casâ via. A 'l sò pòst a vèṅ tòlt par pôc tèmp prima Vince Ely di Psychedelic Furs e pò Boris Williams di Thompson Twins. Sèmp'r in cal tour lè, Robert al decìd ad dar-'g un taj c'n i Banshees e ad tōr indrē Gallup, ch'l iva sunâ c'n i Fools Dance in cal méntar, a 'l pòst ad Thornalley ch'l éra andâ par la sò strada.

In dal 1985 i Cure nóṿ (Smith/Tolhurst/Gallup/Thompson/Williams) i pùblican 'n àt'r àlbum The Head on the Door (La tèsta insìma a 'l us) al sucès cumersiàł più grand in fiṅ lè, cun dū sìngui dimóndi famóś anc in Itàglia: Inbetween Days e Close to Me, dal canti dimóndi alśēri, cun di vìddeo fóra 'd tèsta ad Tim Pope.

Simon Gallup tòlt śò da 'l viṿ in dal Śugn dal 2008
«
I am slowing down as the years go by, I am sinking. So I trick myself like everyboby else, the secrets I hide twist me inside, make me weake.»
(EN)(Sinking, 1986)
«
A sòṅ drē a 'ndar più piàṅ méntar i an i pàsan, a sòṅ drē a 'ndar a fónd. Acsè a m tóg in gir cuma tut chi àtar, i segrét ch'a lōg i m rōdan dèntar, i m fiàcan.»
(MUD)

In dal 1986 'l è 'l tùran dla racòlta Standing on a Beach - The Singles 1978-1985 (Stand in spiàgia - I sìngui 1978-1985) cun dènt'r anc un sìngul dal 1981 mai vgnû fóra su di àlbum, Charlotte sometimes, e na versiòṅ difarénta 'd Boys Don't Cry. La versiòṅ su CD la s intìtula Staring at the Sea (Guardànd al mar) e la gh'à dèntar di pes da piò méntar la versiòṅ su caséta la gh'à anc tuti 'l B-sides di sìngui in dla banda B.

«
On that bleak track (see the sun is gone again) the tears were pouring down her face, she was crying and crying for a girl who died so many years before.»
(EN)(Charlotte Sometimes, 1981)
«
In cal sintēr spòj (guarda 'l Sōl 'l è andâ via incóra) al làgarmi i éraṅ drē a śliciàr śò da la sò fàcia, lē l'éra drē a piànśar par na ragasa ch'l'éra morta acsè tant an prima.»
(MUD)

Par selebràr cal perìud lè ad sucès, a vèṅ filmâ al cuncèrt dal 9 'd Agóst a 'l teàtar rumàṅ 'd Orange, in Pruvénsa, distribuî 'l an dòp in di cinéma c'n al tìtul "The Cure in Orange".

Madurasiòṅ artìstica e cunsacrasiòṅ internasiunàla (1987-1993)

I Cure da 'l viṿ in Purtugàl a Liśbóna

Al 5 ad Maǵ dal 1987 a vèṅ fóra al sètim lavōr dal grup ingléś, un disc dópi ad 18 canti ciamâ Kiss Me Kiss Me Kiss Me (Baś-am Baś-am Baś-am). La cupertìna d'l àlbum la móstra un prim piàṅ di làbar ad Smith, piṅ ad rusét 'd un ros ch'al dà a 'l òć in mèś a un sfónd arans viṿ.

«
A s tratàva dla vója ad mandàr śò la gint. L'idéa ad far-i andgàr piutòst che baśàr-i»
(Robert Smith al dascór dla cupertìna ad Kiss Me Kiss Me Kiss Me)

Al disc 'l è dimóndi vari cun di pès rock (The Kiss e Shiver And Shake), psichedèlic (If Only Tonight We Could Sleep e The Snakepit), pop (Why can't I be you?) e dark (One more time). Par di prubléma 'd spasi, la canta Hey You!!! la n gh'è briśa in dla versiòṅ su CD dal lavōr, ma sōl in sal vinîl e in sla caséta. La s cata però in dla versiòṅ deluxe dal 2006.

A difarénsa di lavōr vèć, in c'l àlbum chè tut i mémbar i aṅ dâ 'l sò cuntribùt, difàti Icing Sugar e The Perfect Girl i partìsan da di idéi ad Simon, Like Cockatoos, Fight e The Snakepit i èṅ stadi scriti par Porl e par Boris mént'r A Thousand Hours l'è ad Tolhurst.

In Itàglia quést chè 'l è 'l secónd disc di Cure ch'a gh la cava a finìr in di prim vint pòst dal clasìfica (13śum). A la fiṅ d'l an al sarà al 54śum disc più vindû dal 1987. Al vìddeo dal sìngul Just Like Heaven 'l è girâ in dla baja ad Beachy Head (cuma anc Close to Me) ch'l'è dvintàda famóśa par tut i suicìdi ch'a gh'è. In d'l àlbum a gh'è anc na canta ispiràda a Les yeux des pauvres (I òć di pòvar) ad Charles Baudelaire, How beautiful you are.

«
And in the road before us stood a weary greyish man who held a child upon his back, a small boy by the hand, the three of them were dressed in rags and thinner than air and all six eyes were stared fixedly on you. The father's eyes said "beautiful! How beautiful you are!", the boy's eyes said "how beautiful! She shimmers like a star!", the child's eyes uttered nothing but a mute and utter joy and filled my heart with shame for us at the way we are.»
(EN)(How Beautiful You Are, 1987)
«
E in dla stràda in frònt a nuàtar a gh'éra 'n óm sfinî e griś ch'al tgniva 'n putèṅ in sla schina, un ragasōl par maṅ, tut lōr tri i éran vistî 'd stras e più sutìi dl'ària e i lōr siē òć i t fisàvan. I òć dal pàdar i dgìvan "Bèla! Cum at sē bèla!", i òć dal ragàs i dgìvan "Che bèla! La luśa cuma na stéla!", i òć dal putèṅ i n dgìvan gnint, sōl na cuntintésa pîna e muta, e i m impinìv'n al cōr ad vargóggna par cum a sém nuàtar.»
(MUD)
Al tasterìsta Roger O'Donnell

A Bruxelles, durànt al cuncèrt dal prim ad Nuvémbar, a s śònta 'n àtar mémbar, al tasterìsta Roger O'Donnell, tòlt sù par jutàr Lol ch'al tacàva a pèrdar di cōlp, sémpar da piò inmisćiâ cun di prubléma 'd alcol. Al Kiss me tour al pasa anc par Emìglia-Rumàgna: al 29 and Nuvémbar dal 1987 i Cure i èṅ a Mòdna.

Al disc dal 1989, Disintegration (Diśintegrasiòṅ), al tórna a 'l dark a róta 'd còl ma al vénd bèṅ listés, difàti 'l è stâ 'l prim di sò disc a intràr in di prim déś pòst in dla calsìfica itagliàna (a 'l sètim pòst) c'n al sìngul Lullaby cuciâ in élt da 'n vìddeo spavintóś in dua Robert, culgâ a lèt, al s impinìs via via 'd tlarédi par pò èsar magnâ da 'n ragn gigànt. 'L àlbum al misćia bèṅ di braṅ rock, adàt a i cuncèrt (cuma Fascination street e Disintegration), di braṅ più persunài e vilî (cuma Plainsong, Pictures Of You, Closedown e Homesick) e di àtar dark dal tut (Prayers For Rain e The Same Deep Water As You).

In dal vinîl, i braṅ Last dance e Homesick i n gh'ènan minga par di mutìṿ ad spasi.

«
Al téma ad dimóndi ad cal cansòṅ chè, che dagnóra tut i càtan deprimènt, 'l è sōl quél ad dvintàr vèć: quél ch'a sucéd quànd a s mùcia sù di an, a n cavàr-'g-la minga a sintìr al ròbi cun la stésa intensità, e cal sèns fis ad pèrdida.»
(Robert Smith al dascór dal disc Disintegration)

Durànt al registrasiòṅ, Laurence «Lol» Tolhurst al vèṅ śluntanâ via da 'l grup sénsa però èsar rimpiasâ. In dal disc però al figùra listés cuma sunadōr 'd „àtar strumènt“, tant par dir ch'al sò lavōr 'l è stâ praticamènt nul. In séguit, in dal 1994, Tolhurst (ch'l iva dâ vita in cal mént'r a i Presence e ch'l iva fat vgnir fóra sōl un disc, Inside) al farà n'asiòṅ legàla in di cunfrónt ad Smith par psēr druàr al nóm dal grup ma al perdarà la càuśa.

Lol Tolhurst in dal 2008
«
I never said I would stay to the end, I knew I would leave you with babies and everything, screaming like this in the hole of sincerity, screaming me over and over and over. I leave you with photographs pictures of trickery, stains on the carpet and stains on the memory, songs about happiness murmured in dreams when we both of us knew how the end always is.»
(EN)(Disintegration, 1989)
«
A n ò mai dit ch'a sarév armàś in fiṅ a la fiṅ, a saìva ch'a t arév lasâ c'n i putèṅ e tut al rèst, sigànd acsè vèrs 'l imbròj d'l èsar sćèt, sigànd-'m adòs sèmpar da piò. A t las c'n al fòto, spèć d'l ingàn, maci in sal tapē e maci in dla memòria, canti ad cuntintésa bacajàdi in di insùni quànd tut e dū a saìvan cum i finìsan sémp'r al ròbi.»
(MUD)

Dòp al sucès bèl grôs mis in bisàca cun Disintegration, Smith al fà vgnir fóra na racòlta ad braṅ rimixâ, Mixed Up, cun 'l inèdit Never Enough in cóa.

In dal 1992 i Cure i pùblican Wish (Deśidèri), al secónd àlbum dal grup ch'a finìs drit in dla top ten itagliàna (nùm'r òṅ in dal Régn Unî e nùmar dū in di Stat Unî) e ch'al mét 'd acòrd pùblic e crìtica. 'L è 'n disc misć ch'al mét insém di pès pîṅ ad lòrgna (Apart e To Wish Impossible Things) e di àtar dimóndi alégar cuma High, Doing The Unstuck e Friday I'm In Love, una dal canti più cgnusùdi dal grup. Al schitaràdi rock i s càt'n invéci in Cut, End e Open, un braṅ ch'al squàsa pròpria e ch'al gh'à 'n tèst dimóndi vilî parchè al dascór dla depresiòṅ.

«
He waits for her to sympathize but she won't sympathize at all, she waits all night to feel his kiss but always wakes alone, he waits to hear her say "forget" but she just hangs her head in pain and prays to hear him say "no more, I'll never leave again", how did we get this far apart? We used to be so close together, how did we get this far apart? I thought this love would last forever.»
(EN)(Apart, 1992)
«
Lò al spéta ch'la gh dia ragiòṅ ma lē la n è pròpria minga 'd acòrd, lē la spéta tuta nòt 'd sintìr un sò baś ma la s déśda sèmpar da par lē, lò al spéta 'd sintìr-ag dir "daśméndga" ma lē la gh'à sōl la tèsta pîna 'd dulōr e la 'l préga 'd dir "abàsta, a n andrò mai più via", cum è-la ch'a s sém śluntanâ acsè tant? A sér'n acsè davśèṅ, cum è-la ch'a s sém śluntanâ acsè tant? A pinsàva che c'l amōr chè al sarév durâ par sèmpar.»
(MUD)

Dal Wish tour i Cure i regìstran dū àlbum live: Show (Spetàcul) e Paris (Parì), tut i dū dal 1993. Finî al tour, Thompson e Williams i làs'n al grup, rimpiasâ par Roger O'Donnell, ch'al tórna indrē, e Jason Cooper. Par quàt'r an i Cure i n fànan piò di àlbum ma sōl di braṅ stramnâ, dimóndi da spés par di culóni sunòri o dal compilation: Purple Haze ad Jimi Hendrix p'r al tribùt Stone free, Burn p'r al film Il corvo (Al còruv), Young Americans ad David Bowie par la compilation 104.9 XFM.

I an recènt (1994-incō)

Simon Gallup (Singapōr 2007)

In dal 1996, dòp quàt'r an, a vèṅ fóra finalmènt 'l àlbum nóṿ 'd inèdit in studi, Wild Mood Swings (Śbals 'd umōr selvàdag). Pîn ad sôṅ ad mùśica latìna (cuma 'l prim sìngul The 13th in dua Robert Smith in dal vìddeo al và a lèt c'n un travestî), al disc al lasa i sustenidōr dal grup a bóca vèrta parchè a n pâr gnanc un disc di Cure. I fan più vèć i gh'aṅ al brusc in bóca ma 'l grup 'l è bòṅ ad catàr-an di nóṿ. In tut al manéri al disc 'l è 'n flòp.

«
I'm always wanting more, anything I haven't got, everything I want it all I just can't stop. Planning all my days away but never finding ways to stay or ever feel enough today, tomorrow must be more.»
(EN)(Want, 1994)
«
A-j-ò sèmpar vlû da piò, tut al ròbi ch'a n gh'ò minga, a vój incòsa, a n gh la caṿ pròpria a śmétar. A fag i mè piàṅ tut i dè ma a n cat mai la manéra ad farmàr-um o ad sintìr-'m a pòst incō, dmaṅ a gh'à da èsar méj.»
(MUD)

'L an dòp la Fiction la fà vgnir fóra la secónda racòlta di Cure, Galore - The Singles 1987-1997 c'n i sìngui muciâ sù da Kiss Me Kiss Me Kiss Me a Wild Mood Swings, cun da piò 'l inèdit Wrong Number.

«
Quietly he laughs and shaking his head creeps closer now closer to the foot of the bed and softer than shadow and quicker than flies, his arms are all around me and his tongue in my eyes! “be still be calm be quiet now, my precious boy, don't struggle like that or i will only love you more for it's much too late to get away or turn on the light, the spiderman is having you for dinner tonight”.»
(EN)(Lullaby, 1989)
«
Silensióś lò al rid e squasànd la tèsta al s davśìna traśànd a 'l pē dal lèt, piò alśēr ad l'òra e piò śvélt dal móschi, i sò bras i m èṅ dintóran e la sò léngua in di mè òć! “stà férum stà càlum stà tranquìl, câr al mè ragasōl presióś, minga agitàr-'t acsè o a t vurò incóra più bèṅ parchè 'l è tròp tard par scapàr via o impisàr la luś, 'l óm ragn 'l è drē a ciapàr-at par séna stanòt”.»
(MUD)

In dal 2000 al grup al fà catàr in di negòsi Bloodflowers (Fiōr ad sangṿ) e Smith al batéśa cal lavōr chè cuma la tèrsa part dna trilugìa gòtica ch'la gh'à dènt'r anc Pornography e Disintegration. Na versiòṅ rimixàda dal braṅ Watching me fall la s cata in dla culòna sunóra dal film American Psycho dla Mary Harron cun Christian Bale.

«
Yeah, I've been seen stripped to the bone in the mirror on the wall, seeing her swallow it whole like its not me at all, she holds out her hands and I follow her down to my knees and the sucking inside, insatiable smiles, you will forget yourself in me.»
(EN)(Watching Me Fall, 2000)
«
Propria acsè, a sòṅ stâ cavâ śò in fiṅ a i òs in dal spèć in dal mur, guardànd lì lē mandàr-al śò tut intēr cuma s'a n fus gnanc mè, lē la dasténd al sò maṅ e mè a la tégn 'd òć śò in śnòć, ciuciâ dèntar, la rid e la n gh 'n à mai a bàsta, ta t daśmindgarà dèntar ad mè.»
(MUD)
Robert Smith e Jason Cooper

Bloodflowers al gh'à un bòṅ sucès fra i crìtic ma 'l véndidi i làs'n a deśideràr.

In dal 2001 i Cure i pùblican n'àtra racòlta Greatest Hits ch'la sèra par sèmpar al ligàm dal grup cun la Fiction. Al disc al gh'à dū canti nóvi Cut Here e Just Say Yes.

«
Suddenly I stop but I know it's too late, I'm lost in a forest all alone. The girl was never there, it's always the same, I'm running towards nothing, again and again and again.»
(EN)(A Forest, 1980)
«
A 'l impruvìś a m férum ma a sò ch'l è tròp tard, a m sòṅ padrû in na furésta da par mè. La ragàsa la n gh è mai stada, l'è sèmpar cumpàgn, a sòṅ drē a cùrar vers al gnint, incóra e incóra e incóra.»
(MUD)

In dal 2003 i Cure i tàc'n a lauràr a 'l àlbum nóṿ par la Geffen insém a Ross Robinson (prudutōr di Korn e di Slipknot) e in dal 2004 a vèṅ publicâ The Cure ch'al gh'à un sòṅ in gènar pop ma anc di pès dûr cuma Lost e The Promise. Al disc 'l è difarènt da qvéi 'd prima parchè 'l è dimóndi misć.

«
I can't find myself in the soul of this stranger in love, no control over one to the other under faded setting sun and I don't know where I am. Should he beg her to forgive? So happy and so young and I stare as I live out the story of a stranger in love, waking up going on in the other world that spins around undone and I don't know where I am. Should she really say goodbye?»
(EN)(Lost, 2004)
«
A n m cat minga in dl'anma ad cal furastēr chè inamurâ, gnanc un cuntról d'l òṅ su c'l àtar sóta 'l śbiàvad sōl al tramònt e a n sò minga in du a sia. Gh'iva'l da dmandàr-'g a lē ad perdunàr-al? Acsè cuntènt e acsè śōvan e mè a guàrd mént'r a viṿ a l'ària vèrta la stòria 'd un furastēr inamurâ, daśdàr-'s andànd avànti in 'n àtar mónd ch'al gira intór'n e a n sò minga in du a sia. Gh'arév-la da mulàr-al dabòṅ?»
(MUD)
Porl in dal 2007

Al canàł televiśìv MTV al gh fà 'n tribùt faghénd un prugràma speciàł preśentâ par Marylin Manson ciamâ MTV Icon cum éra bèla sucès prima par di àtar grup cuma gl'Aerosmith e i Metallica. Durànt la traśmisiòṅ a s fà vìv'r incóra la caréra dal grup e di àtar cantànt cuma i Deftones e i Blink 182 i càntan di braṅ lōr.

In dal Maǵ dal 2005, Robert Smith al lasa a cà O'Donnell e Bamonte par tōr indrē Porl ch'in cal méntar 'l iva sunâ c'n i Led Zeppelin. In dal Setémbar dal 2005 a vèṅ fóra 'l film Se solo fosse vero (Se sōl a fus véra) cun Mark Ruffalo e la Reese Witherspoon. In dla culòna sunóra a s cata la cansòṅ Just Like Heaven anc parchè al tìtul uriginàl dla pelìcula la gh'à pròpria 'l stés nóm.

«
Daylight licked me into shape, I must have been asleep for days and moving lips to breath her name, I opened up my eyes and found myself alone alone, alone above a raging sea that stole the only girl I loved and drowned her deep inside of me.»
(EN)(Just Like Heaven, 1987)
«
La luś dal gióran la m à tirâ sù, a gh'ò 'd ès'r armàś indurminsâ par di dè e, muvénd i làbar par bacajàr al sò nóm, a-j-ò vèrt i òć e a m sòṅ catâ da par mè insìma a 'n mâr in timpèsta ch'al m'à tòlt la sōla ragàsa ch'a àppia mai amâ e a l'à andgàda dènt'r ad mè.»
(MUD)

In dal 2008 i Cure i pùblican al tredicéś'm àlbum in studi da 'l tìtul 4:13 Dream (4:13 Insùni) ch'al gh'à dèntar trédas braṅ: l'ouverture 'd Underneath The Stars, al carsénd sinìst'r ad The Scream, la rabìda It's Over e al pop traśversàł ad Sleep When I'm Dead e ad Freakshow in dua Thompson al gh dà dèntar dimóndi.

Simon tòlt śò in dal 2012

Prima ch'a vgnis fóra 4:13 Dream, al grup 'l iva bèla decìś ad publicàr quàtar sìngui (The Only One, Freakshow, Sleep When I'm Dead e The Perfect Boy), òṅ a 'l méś al 13 ad tut i méś, cun la sò etichéta, la Suretone Records, che però la n éra briśa tant 'd acòrd. In tut al manéri chi braṅ lè i gh'aṅ abû un sèrt sucès in Spaggna e in di Stat Unî.

«
It only takes a second but the second lasts forever, close your eyes and let me take you down and I get up and it's over, it's always fucking over, it's raining and I'm wrecked and it's late and you're. No, I can't remember anything I did or said or how I lost another life.»
(EN)(It's Over, 2008)
«
A gh vōl sōl un secónd, ma al secónd al dura par sèmpar, sèra i óć e lasa ch'a t pòrt śò e a m léṿ sù e l'è finìda, l'è finìda 'd un Dio, a pióṿ e a sòṅ dastrùt, 'l è tard e tè ta gh sē. Nò, a n pós arcurdàr-um gnint ad quél ch'a-j-ò fat o dit o cum a-j-ò pardû n'àtra vita.»
(MUD)

In dal 2011, in ucaśiòṅ d'l aniversàri di trént'an ad Faith, Lol Tolhurst al tórna a sunàr insém a i Cure durànt al spetàcul "The Cure Reflections" a 'l Vivid live festival ad Sydney.

Mémbar

Reeves Gabrels
Smith, Gallup e O'Donnell in Emìglia (2016)
Al grup ingléś a Barcelóna in dal 2012
Smith e Gallup i sònan al Radio City Music Hall ad New York al 21 ad Śugn dal 2008
I Cure a 'l MTV Winter Valencia (2008)
Un Robert Smith suridènt

Quéi 'd adès

Ex cumpunènt

Discugrafìa

Àlbum

da 'l Viṿ

EP

Racòlti

Culegamènt estéran

Nòti

  1. ↑ La rispòsta psigànta dal cantànt di Cure a la giurnalìsta sù 'd gir La Stampa, 1 'd Avrìl dal 2019
Estratto da "https://eml.wikipedia.org/w/index.php?title=The_Cure&oldid=157415"
  NODES
HOME 2
Intern 1
mac 2
OOP 4
os 27