Un rantolo nel buio
|
C'l artìcul chè 'l è scrit in
Miranduléś |
 A Reflection of Fear
| ||
| Un rantolo nel buio | ||
 Shaw e la Sondra Locke in na figùra dal film | ||
| Ragàja in dal scûr 1972 | ||
|---|---|---|
| Regìa: William A. Fraker | ||
| Scritōr: Stanton Forbes Lewis John Carlino • Edward Hume | ||
| Atōr: Sondra Locke • Robert Shaw • Mary Ure Signe Hasso • Sally Kellerman • Mitchell Ryan Gordon De Vol • Victoria Risk • Leonard Crofoot | ||
| Müsica: Fred Myrow | ||
| Léngua: Ingléś | ||
| Dürä dal film: 89 minüt | ||
| Nasiōṅ: Stat Unî | ||
Un rantolo nel buio (Ragàja in dal scûr) 'l è 'n film ad scarésa dal 1972 ad William A. Fraker trat da 'n rumànś ad Stanton Forbes da 'l tìtul „Go To Thy Deathbed“.
Sunt
La Marguerite (Sondra Locke) l'è na ragasōla ad quìnd'ś an c'n al diabēt ch'la viṿ in na vila iśulàda insém a sò màdar, la Katherine (Mary Ure), e a sò nunóna, la Julia (Signe Hasso). Sò pàdar Michael (Robert Shaw) al scriv di lìbar ma 'l è divìś da sò mujér da quànd lē l'éra pìcula. Adès al stà a Turònt, al s è cumpagnâ cun l’Anne Howard (Sally Kellerman) e al vrév arfàr-as na vita sèg.
La Marguerite la n gh'à mia di amìg parchè sò màdar la n la fà mai andàr fóra e dònca par far-la studiàr la gh paga dgl'insgnànt privâ. In dla vila a sarvìr a gh'è la dóna di fat, la Peggy (Victoria Risk), e 'l giardinēr Kevin (Michael St. Clair). La ragasōla la s pasa 'l tèmp a dipìnśar, a studiàr al Francéś, a tgnir a drē a i fiōr, a far crés'r i sò pés rós e a dascórar c'n un putòć ad nóm Arthur ch'la gh'à in dla sò cambra insém a tanti atri bàmbuli ma ch'l è pèś 'd un “gril ciacarōl” parchè 'l è gelóś e al gh dà sèmpar cóntar cuma cal strìi ad sò màdar e ad sò nóna.
Un dè a riva a catàr-la, dòp tant tèmp, sò pàdar ch'al gh'à da dmandàr al divòrsi a la Katherine. La dóna la prév anc firmàr ma la vōl che lò al gh méta na préda insìma a la Marguerite o sinò al s al pōl anc daśmindgàr. Ma cuma 'l diś al dit “i masć i śmadréśan e 'l fémni i spadréśan”, la Marguerite la n in vōl savēr ad pèrdar sò pàdar par sèmpar parchè la gh vōl tant bèṅ e l'è sèmpar pîna 'd śnum par lò. Dòp avér-ag fat véd'r un sò quàdar dla Śvàna 'd Arc ch'la cumbàt par San Michēl, al sant ch'l à dâ 'l nóm a sò pàdar, la gh dà anc un baśèṅ in si làbar.
Cla nòt lè un tisi cun na calsamàja négra adòs al stròsa c'n un fasulét la Julia e la la śbat via in un laghét pò al và in dla cambra da lèt dla Katherine c'n un bastòṅ in maṅ par dar-'g-i e cupàr-la. La matìna dòp, quànd la riva, la Peggy la cata 'l cadàvar dla sò padròna dastéś in sal lèt. A riva la pulisìa e 'l ispetōr McKenna (Mitchell Ryan) al fà dal dmandi a Michael ch'al gh diś ch'l iva spetâ fóra da 'l cansèl ch'a rivìs la Marguerite parchè sò fiōla la gh'iva dâ apuntamènt lè prima ch'l andìs via. Al cònta anc ch'l iva vdû sōl un baghét ad dódas/tréd'ś an sintâ su 'l murét, tut vistî ad scûr, pò 'l è turnâ a 'l hutèl vint minùt dòp meśanòt. Anc al giardinēr 'l à vdû giràr un ragasōl da cal bandi lè e al purtàva di jeans.
La Marguerite la vōl cuntinuàr a star lè e acsè Michael e l’Anne i s fèrman da lē. Dòp séna la ragàsa la tórna a dascórar cun Arthur in cambra sua dand-ag la cólpa di masamènt anc s'al pupàs al diś ch'a pōl èsar stâ sò pàd'r o anc lē s'la gh'is abû 'l curàǵ.
Par pinsàr a quèl àtar i tri i partìsan par na vacànsa a 'l mâr ma quànd i rìvan lè l’Anne l'è misa da na banda in na quàlc manéra, la Marguerite la n stà mai sù 'd adòs da sò pàd'r e la gh pògia da spés al maṅ in sal gambi. Quànd i tórn'n a cà l’Anne la s arlìa c'n al sò óm parchè la s cumpatìs briśa al cumpurtamènt dla Marguerite ma specialmènt che lò al gh al lasa far. In séguit Michael al telèfuna a 'l uśdàł in du l'è nada sò fiōla par savēr-an da piò.