Sink

Sink (úr þýsku, zinke, „hvasst, skörðótt“) er frumefni með efnatáknið Zn og er númer 30 í lotukerfinu. Það er fyrsta frumefnið í flokki 12. Efnafræðilega svipar því til magnesíns af því að jón þess er af svipaðri stærð og eina algenga oxunartala þess er +2. Sink er 24. algengasta frumefnið í jarðskorpunni og á sér fimm stöðugar samsætur. Sink er mest unnið úr málmgrýtinu sinkblendi sem er sinksúlfíð. Stærstu námurnar eru í Ástralíu, Kanada og Bandaríkjunum. Það er unnið með fleytingu, brennslu og úrvinnslu með raflausnarmálmvinnslu.

Kopar

Sink

Gallín

Kadmín


Efnatákn	Zn
Sætistala	30
Efnaflokkur	Hliðarmálmur
Eðlismassi	7140,0 kg/m³
Harka	2,5
Atómmassi	65,409 g/mól
Bræðslumark	692,68 K
Suðumark	1180,0 K
Efnisástand (við staðalaðstæður)	Fast form
Lotukerfið

Almennir eiginleikar

Sink er nokkuð hvarfgjarn málmur sem binst við súrefni og aðra málmleysingja og verkar á daufar sýrur með því að losa um vetni. Eina algenga oxunarstig sinks er +2.

Notkun

Sink er fjórði algengasti málmurinn í notkun í dag, á eftir járni, áli og kopar í magni tonna framleiddum ár hvert.

Sink er notað til að húða málma eins og stál til að vernda þá gegn tæringu.
Sink er notað í málmblöndur eins og látún, nýsilfur, ritvélamálm, ýmsar tegundir lóðtins o.s.frv.
Látún hefur sömuleiðis mikla notkunarmöguleika sökum styrkleika og tæringarþols.
Sink er notað í steypumót, þá sérstaklega í bílaiðnaði.
Valsað sink er notað í hluta af umbúðum rafhlaðna.
Sinkoxíð er notað sem hvítt litarefni í vatsnlitum og málningu, og einnig sem efnahvati í gúmmíiðnaði. Það er einnig selt sem lyfseðilslaust rakakrem til að bera á húð sem vörn við sól- og kuldabruna.
Sinkklóríð er notað sem svitalyktareyðir og sem fúavarnarefni.
Sinksúlfíð er notað í kaldaskins litarefni, til að búa til vísa í klukkur og aðra hluti sem glóa í myrkri.
Sinkmeþýl (Zn(CH₃)₂) er notað í fjölda lífrænna efnasmíða.
Sinksterat er smurefni úr plasti.
Smyrsl sem gerð eru úr kalamíni, sem er blanda af Zn-(hýdroxíð-karbónötum og sílikötum, eru notuð til að lækna útbrot.
Sinkmálmur er í flestum fjölvítamín- og steinefnablöndum sem hægt er að kaupa í apótekum. Ásamt öðrum málmum er það talið af sumum hafa andoxunaráhrif sem eiga að vernda gegn öldrun húðar og vöðva. Í stærri skömmtum, tekið eitt og sér, er það talið flýta fyrir að sár grói.
Sinkglúkonítglýsín er tekið í töfluformi við kvefi.