Ernest Deligny

Ernest DELIGNY (dölinji), franco, licea prof. Naskiĝis la 9-an de decembro 1864 en Fauquembergues (urbeto 25 km sudokcidente de Saint-Omer, norda Francio); mortis la 24-an de februaro 1950 en Saint-Omer. Direktis dum 30 jaroj sportajn societojn. Estis Volapükisto; li fariĝis E-isto en 1900. Propagandisto, fondis grupojn kaj, kun kelkaj samideanoj, la nordfrancan federacion (1908), kies prezidanto li estas. Kreis en 1908 la Norda Gazeto, kiu ĉesis aperi en 1914 kaj reaperis en 1930. Ĝenerala sekretario de la XII. Universala Kongreso (Hago,1920); organizis 4 esperantajn ekspoziciojn en Saint-Omer kaj Boulogne-sur-Mer. Entute li partoprenis 18 universalajn kongresojn.

Ernest Deligny
Persona informo
Naskiĝo	9-an de decembro 1864 (1864-12-09) en Fauquembergues
Morto	24-an de februaro 1950 (1950-02-24) (85-jaraĝa) en Saint-Omer
Lingvoj	Esperanto • franca
Okupo
Okupo	esperantisto (1900–) volapukologo bibliotekisto

Li verkis Cours elémentaire d'Espéranto, 1905; Traduko el la greka lingvo. Ranratbatalo, 1908; Lia rakonto Nekredeblaj aventuroj de Sinjoro Radamanto aperis en la kolekto Laŭroj; La vivo de liceano, dialogoj 1925; Traduko de Dumas: Tri rakontoj 1933.

Bibliotekisto

Foto (poŝtkarto) de la partoprenantoj al du semajnaj ne-oficialaj Esperanto-kursoj en la liceo de Saint-Omer, 1917-1918. Deligny sidas meze antaŭe.

Deligny ankaŭ aktivis en la urba biblioteko de Saint-Omer. En ĝi konserviĝas Esperanto-fonduso kreita de li ekde la komenco de la 20a jarcento. Ĝia katalogo estis presita en 1942, sed ne troveblas konsultebla ekzemplero. Dum jardekoj la kolekto estis nealirebla, sed ekde 2020 eblas traserĉado pere de la ĝenerala katalogo de la biblioteko. Ne disponeblas aktuala katalogo, sed verŝajne la biblioteka kolekto proksimume egalas al la persona kolekto de Deligny kiun li priskribis en la revueto La Amikoj de Saint-Omer (ĉ.1932-1933):

• Pli ol 1200 libroj kaj broŝuroj
• Pluraj centoj da malsamaj ĵurnaloj kaj revuoj
• Sama nombro da gvidlibroj, gvidfolioj ktp
• Poŝtkartoj el pli ol 80 malsamaj landoj
• Fotografaĵoj el multaj kongresoj universalaj, naciaj, regionaj
• La unua lernolibro por francoj, eldonita de Zamenhof en 1887
• Specimeno de la arĝenta spesmilo de s-ro de Saussure
• Unu el la oficialaj standardoj de la unua Universala Kongreso de Boulogne-sur-Mer en 1905
• Aŭtografoj de Zamenhof kaj de ĉiuj liaj samfamilianoj

Historiisto

En 1936 aperis lia franclingva verko pri presistoj de Saint-Omer Les Imprimeurs de Saint-Omer de 1601 à la Révolution (du volumetoj). En Lumières du Nord (2002, serio Histoire et Civilisation du Livre) estas menciita tiu verko kiel neeldonita manuskripto el 1941.

Verkoj

• LA VIVO DE LICEANO. Eld. la aŭtoro, Saint-Omer, 1925.

	„ La kurso estas dividita en 12 lecionoj kaj celas instrui nian lingvon al liceanoj, per la rekta metodo. La materialo de ĉiu leciono estas praktike aranĝita, kaj multaj praktikaj frazaroj faciligas la lernadon de junaj studentoj. ” — Belga esperantisto n181 (mar 1930)

Verkoj en la Biblioteko Hippolyte Sebert de Unuiĝo Franca por Esperanto

• Cours élémentaire d'Esperanto (1904 kaj 1907)
• La Question de la langue aŭiliaire (1906)
• Histoire de la Fédération Espérantiste du Nord de la France (1935)
• Urba Biblioteko, Saint-Omer. Esperantista Fako. Katalogo de la esperantistaj libroj, arkivoj kaj memoraĵoj (1942, 46 p.)
• Mia Esperantista vivo (1943)

Recenzoj

Pri Mia Esperantista vivo

„ Aŭtobiografia kroniko de klera kaj kapabla Franco, kiu dum pli ol kvardek jaroj ludis sindonan kaj persistan rolon, por Esperanto. En sia emeriteco li surprenis la administradon de la tiea urba biblioteko, kie li organizis konsiderindan Esperantan fakon. Malgraŭ la ĉarma modesteco de la stilo, oni konstatas, ke la aŭtoro estas unu el la veraj pioniroj. La verko estas notinda ne nur pro lia agado en la fruaj tagoj, sed ankaŭ ĉar lia fido instigis lin verki kaj eldoni la libreton dum la okupado de Francujo en 1943. ” — E.D.D. La Brita Esperantisto, n 493-494 maj-jun 1946

---

Pri Urba Biblioteko, Saint-Omer. Esperantista Fako

„ Dank' al la iniciatemo de la prizorganto, la aŭtoro de ĉi tiu verketo, la biblioteko de la 18,000-persona urbo Saint-Omer posedas fierindan Esperantan fakon. Ĉi tiu katalogo listigas ĉirkaŭ 2,000 erojn, inkluzive de pluraj pri aliaj projektoj. Kelkaj eraroj de preso aŭ fakto iomete deprenas de la efikeco, sed ne forigas la ĝeneralan indecon de la verko. Ankaŭ notinde estas, ke ĝi kompiliĝis kaj presiĝis dum la malhelaj tagoj de okupado. ” — E.D.D. La Brita Esperantisto, n. 493-494 maj-jun 1946

Eksteraj ligiloj

• esperante Ciferecigita versio de la Deligny-aŭtobiografio Mia Esperantista Vivo (1900-1943)
• france Ciferecigita versio de Les Imprimeurs de Saint-Omer ĉe NordNum Arkivigite je 2013-07-18 per la retarkivo Wayback Machine
• france Historia Esperantokolekto de la Urba Biblioteko de Saint-Omer ("Fonds Ancien"); uzu serĉvorton 'Esperanto'