Master System
Master System (japane マスターシステム) estas 8-bita, tria-generacia hejma videoludilo fabrikita kaj evoluigita de Sega. Ĝi origine estis remodelita eksporta versio de la Sega Mark III, la tria iteracio de la SG-1000 serio de konzoloj, kiu estis publikigita en Japanio en 1985 kun grafikaj kapabloj plibonigitaj kompare kun siaj antaŭuloj. Master System estis lanĉita en Nordameriko en 1986, poste en Eŭropo en 1987, kaj poste en Brazilo kaj Koreio en 1989. Japana versio de la Master System estis ankaŭ lanĉita en 1987, kaj havis kelkajn plibonigojn kompare kun la eksportaj modeloj : enkonstruita FM-aŭda blato, rapidpafada ŝaltilo, kaj dediĉita konektilo por 3D-okulvitroj. La Master System II, pli malmultekosta modelo, estis publikigita en 1990 en Nordameriko, Aŭstralazio kaj Eŭropo.
| Master System | ||
|---|---|---|
| ||
| ||
| modelo • modelo de elektronika aparato vd | ||
| Dum | nekonata - nekonata/nuntempe | |
| Antaŭulo | SG-1000 | |
| Sekvanto | Mega Drive | |
| TTT | Oficiala retejo | |
La originalaj modeloj de la Master System uzas kaj kartoĉojn kaj kreditkartan formaton konatan kiel Sega Card. Flankaparataro inkluzivas lum-pafilon kaj 3D-okulvitrojn, kiuj funkcias kun speciale desegnitaj ludoj. La pli posta redesegnita Master System II forigis la kartofendon, igante ĝin sistemo ekskluzive por kartoĉoj, kaj ĝi ne plu estis kongrua kun la 3D-okulvitroj.
Master System estis rekta konkuranto de la videoludilo Nintendo Entertainment System (NES). Ĝia ludaro estas pli malgranda kaj kun malpli multaj bone taksitaj ludoj ol tiu de la NES, parte pro la licencaj politikoj de Nintendo, kiuj postulis ekskluzivecon de platformoj. Kvankam Master System havis pli novan, plibonigitan aparataron, ĝi ne sukcesis kontesti la gravan merkatan avantaĝon de Nintendo en Japanio kaj Nordameriko. Tamen, ĝi atingis signife pli grandan sukceson en aliaj merkatoj, inkluzive de Eŭropo, Brazilo, Sud-Koreio kaj Aŭstralio.
Oni taksas, ke inter 10-13 milionojn da unuoj de Master System estis venditaj tutmonde. Aldone, Tectoy vendis 8 milionojn da licencitaj variantoj de Master System en Brazilo. Retrospektiva kritiko agnoskas ĝian rolon en la evoluo de Sega Genesis, kaj kelkajn bone akceptitajn ludojn, sed kritikas ĝian limigitan bibliotekon en la NTSC regionoj, kiuj restis dominataj de la NES.