Regiona prefekto
La regiona prefekto (franclingve préfet de région) estas franca ŝtatoficisto, kiu reprezentas la ŝtatajn interesojn ĉe ĉiu franca regiono. Li devas precipe kontroli la laŭleĝecon de la decidoj de la Regiona Konsilio de la sama regiono.
Li estas helpita de prefektoj ĉe ĉiu departemento de sia regiono, kaj de subprefektoj ĉe ĉiu arondismento de sia regiono.
Jura statuso
redaktiLa regiona prefekto aperis en 1964, kiam la regionoj estis ankoraŭ nur formalaj administraj subdividoj, sen lokaj asembleoj aŭ ekzekutivoj. Tiam li nomiĝis "kunordiganta prefekto" (préfet coordonnateur).
La nuna statuso de la regiona prefekto konformiĝas al la dekreto de la 29-a de aprilo 2004, kiu anstataŭigis aliajn regulojn datiĝintaj de 1982 kaj 1964.
Ĉefaj taskoj
redaktiLa regiona prefekto estas fakte samtempe la prefekto de la ĉefa departemento de la regiono. Li plenumas do en tiu ĉi departemento la tutajn taskojn de normala, departementa prefekto.
La regiona prefekto havas administran, ekonomian kaj politikan rolon en la regiono:
- Li estras la ŝtatoficistaron lokitan en la regiono.
- Li devas aplikigi kaj kuraĝigi ŝtatajn iniciatojn en la regiono.
- Li kontrolas la laŭleĝecon de la decidoj de la Regiona Konsilio kaj de aliaj regionaj instancoj.
- Kvankam la regiona prefekto ne estas la hierarkia superulo de la departementaj prefektoj aŭ de la subprefektoj, li ja devas kunordigi regione la agadojn de ĉiuj tiuj ŝtataj reprezentantoj.
Vidu ankaŭ
redakti- Prefekto (departemento)
- Subprefekto (arondismento)
- Regiona Konsilio