Georges Brassens

Por samtitola artikolo vidu la paĝon Georges Brassens (Tramtransporto en Parizo).

Georges BRASSENS ([ʒɔʁʒ bʁasɛ̃s]; Esperantigite Georgo Brasenso) naskiĝis la 22-an de oktobro 1921, en la franca urbo Seto (tiam Cette). Li mortis la 29-an de oktobro 1981 en Saint-Gély-du-Fesc (16 kilometrojn norde de Montpellier / Monpeljero +/- Saĵelidufe Mopelje]. Li verkis, komponis kaj interpretis kanzonojn.

Georges Brassens
franca kantisto
Persona informo
Naskonomo	Georges Charles Brassens
Naskiĝo	22-an de oktobro 1921 en Sète Francio
Morto	29-an de oktobro 1981 en Saint-Gély-du-Fesc, Francio
Mortokialo	Kancero
Tombo	Sete (Le Py) Cemetery (en)
Lingvoj	franca
Ŝtataneco	Francio
Subskribo
Memorigilo
Okupo
Okupo	kantaŭtoro kantisto komponisto chansonnier (en) verkisto banĝisto gitaristo poeto aktoro

Vivo

Filo de homoj kun simpla vivo, li travivas trankvilajn tagojn en la suda Francio; li estis averaĝa lernanto kiun tutcerte interesis poezio: unu el liaj instruistoj, Alphonse BONNAFÉ [alfons bonafe] estos la unua malkovri en li tiun talenton por la poezio kaj por ĝin favori. Poste, la 19-jaraĝa Georges BRASSENS “supreniras” al Parizo, en 1940. Dum 1942, li trovas rifuĝejon ĉe Jeanne LE BONNIEC [ĵan’ le bonjek], bretondevena virino kiu estis tridek jarojn pli maljuna ol li kaj kiun li kromnomos “La Jeanne”. Dum pli ol dudek jaroj, li restos ŝia gasto. Pli poste, li dediĉos al ŝi kanzonojn, kiel “La Cane de Jeanne” [La anasino de Johanino] kaj precipe “Jeanne”. Li ne preterlasis respektsaluti ankaŭ ŝian edzon Marcel [marsel] (“Chanson pour l'Auvergnat” [Kanzono por la Aŭverniano]. La saman jaron, li eldonas sian unuan poemaron, sen iu ajn sukceso.

En marto 1943, li estis sendita Germanien, kadre de la S.T.O. (Service du travail obligatoire = Servo de deviga laboro). Tiam, li renkontas Pierre ONTENIENTE [pjer onteniente], alie nomitan Gibraltar, sian estontan sekretarion kaj kunulon. Ankaŭ tiam li aperas por la unuaj fojoj antaŭ publiko kaj komponas siajn unuajn kanzonojn.

Dum forpermeso Parizen, li dizertas kaj sin kaŝas ĝis la fino de la milito ĉe “la Jeanne”. Tie li loĝas en malgranda apartamento ĝis 1966. En 1946 Brassens aliĝas al la Federacio Anarkiista kaj skribas artikolojn en la gazeto Le Libertaire (nuntempe Le Monde Libertaire) sub multaj pseŭdonimoj (Géo Cédille, Gilles Collin ktp.). Tiam li kantas siajn unuajn kanzonojn dum anarkiistaj galaoj. Li provas estigi anarkistan gazeton en la 15-a distrikto de Parizo, sed vane.

Anekdotoj

Kvankam li vivis apud la urboj de Paimpol kaj Sète, li malŝategis manĝi fiŝojn.

Diskoj

En Esperanto

Jam en la tempo de la Ŝvarca Esperanto-kabaredo de la Tri koboldoj, do en la komenco de kvindekaj jaroj (kiam Brasenso mem nur komencis esti sukcesa kanzonisto), Roĝero Bernardo tradukis almenaŭ du el la plej famaj Brasensaĵoj: “La Kaptad’ de Papili’” (fr: La Chasse aux Papillons) kaj “Kanto por la Kampul’” (fr: Chanson pour l’Auvergnat), kiuj aperis en la kompillibro Francaj kanzonoj malnovaj kaj modernaj'.

Ĵak’ Ivart’, kiu persone konis Brasenson kiu donis al li la emon iĝi kantisto, interpretis kanzonojn liajn en Esperanto, sur la diskoj Jacques Yvart kantas Georges Brassens, aperinta en 1998. La tekstojn tradukis Klaŭdo Piron', kun Georgo Lagranĝo, Marcelo Redulez’. En 2011 li aperigis plian diskon “Brassens plu”, en kiu aperas pliaj kanzonoj, kaj ankaŭ iuj, kiuj aŭdeblas sur lia antaŭa Eo-disko Invito al Vojaĝo (aperinta en 2008).

Kanzonoj esperantigitaj

Titolo en Esperanto	Originala titolo (franclingve)	Tradukis	Registris
La anasa forpaso	La cane de Jeanne	Ludmila Novikova helpe de Svetlana Smetanina
Apud mia arbo	Auprès de mon arbre	Bernardo Legeay
La aŭverno	Chanson pour l'Auvergnat	Roland Platteau
La balado de homoj fieraj pri sia deven'	La ballade des gens qui sont nés quelque part	Markovo-Vito
Balado de ienaskita ular'	La ballade des gens qui sont nés quelque part	Bernardo Legeay
Ĉe mia arbo	Auprès de mon arbre	Marcelo Ternant'
La ĉevaleto	Le petit cheval	Roel Haveman	Ĵak' Ivart'
Donjuan'	Don Juan	Marcelo Redulez'
En akvo de la klara fonto	Dans l'eau de la claire fontaine	Marcelo Redulez' helpe de Marcelo Ternant'	Ĵak' Ivart'
La geamantoj sur la verda benk'	Les amoureux des bancs publics	Klaŭdo Piron', Georgo Lagranĝo kaj Marcelo Redulez'	Ĵak' Ivart'
La gorilo	Le gorille	Marcelo Ternant'
Granda kverk'	Le grand chêne	Bernardo Legeay
Herbaĉo	La mauvaise herbe	Marcelo Ternant'
Johano la neavertinto	Jehan l'advenu	Marcelo Redulez'	Ĵak' Ivart'
Kanto por la kampul'	Chanson pour l'Auvergnat	Roger Bernard	Olivier Tzaut, Ĵak' Ivart'
La kaptad' de papili'	La chasse aux papillons	Roger Bernard	Ĵak' Ivart'
La lama reĝo	Le roi boiteux	Roel Haveman
La lamanta reĝo	Le roi boiteux	Bernardo Legeay kaj Marcelo Redulez'	Ĵak' Ivart'
La longa vico	La file indienne	Marcelo Redulez'	Ĵak' Ivart'
La malbona renomo	La mauvaise réputation	Marcelo Ternant'
La marista am'	La marine	Roel Haveman	Ĵak' Ivart'
Marinetta	Marinette	Ludmila Novikova helpe de Andreo Andrio
Milito	La guerre	Rikardo Cash	Ĵak' Ivart'
La misfamo	La mauvaise réputation	Markovo-Vito
Mortadi pro ide'	Mourir pour des idées	Georgo Lagranĝo	Ĵak' Ivart'
Ne kredu pri feliĉa am'	Il n'y a pas d'amour heureux	Michel Duc Goninaz
Oĉjo Leon'	Le vieux Léon	Michel Duc Goninaz kaj Marcelo Redulez'	Ĵak' Ivart'
La pluvombrelo	Le parapluie	Bernardo Legeay kun la helpo de Marcelo Redulez' k Georgo Lagranĝo	Ĵak' Ivart'
La pluvombrelo	Le parapluie	Roland Platteau
Povra Marten'	Pauvre Martin	Marcelo Redulez'	Ĵak' Ivart'
La preĝo	La Prière (teksto de Francis' Ĵam')	Jo-Petro Danvy
La princino kaj la notovorulo	La princesse et le croquenotes	Johano-Luko Berĵon'
Se almenaŭ beletus ŝi	Si seulement elle était jolie	Bernardo Legeay
La ŝtormo	L'orage	Bernardo Legeay
Tuj la kompanar'	Les copains d'abord	Bernardo Legeay kaj Marcelo Redulez'	Ĵak' Ivart'
La vento	Le vent	Roland Platteau
La vin'	Le vin	Luc Gouverneur – Marcelo Redulez'

Eksteraj ligiloj

• projetbrassens.eclipse.co.uk (angle) Arkivigite je 2005-10-26 per la retarkivo Wayback Machine
• beausoleil.free.fr: retejo kun multaj fotoj kaj preskaŭ ĉiuj tekstoj kaj akordoj por gitaro (france)
• brassens.sud.fr: retejo kun i.a. fotoj, biografio, muziko kaj tekstoj (france) Arkivigite je 2005-10-13 per la retarkivo Wayback Machine
• aupresdesonarbre.com: nombro da intervjuoj kun la kantisto kaj multe da aliaj informoj (france)

• Jacques Yvart kantas kanzonojn de Georges Brassens en Esperanto Arkivigite je 2007-11-08 per la retarkivo Wayback Machine

Povra Marteno estas en la wikibooks Arkivigite je 2005-12-15 per la retarkivo Wayback Machine

• alia esperantigo de La Aŭverno kaj La pluvombrelo
• La vento
• La Balado de homoj fieraj pro sia deveno Arkivigite je 2017-02-02 per la retarkivo Wayback Machine sur la retejo de SAT
• La lamanta reĝo (Le roi boiteux) ĉe YouTube
• Tuj la kompanar' (Les copains d'abord) ĉe YouTube