Guerra Fria
La Guerra Fría tuvu lugal entre 1945 i 1991. La Guerra Fría nu hue cumu denguna algotra guera, polque los dos enemigus prencipalis enhamás runchun el unu escontra el otru. El télminu "Fría" se gasta pa descrebil las relacionis entri los Estaus Uñius i la Uñión Soviética duranti el periou de los 45 añus endispués del acaberu e la Segundera Guerra Mundial pus estaban rabiñosus entri ellus. Abonda henti estaba acagazá de qu'estu puyera acabihal nuna Guerra Nucleal, peru enhamás pasó. Los Estaus Uñius i l'Uñión Soviética tuvun abondus paísis nel su favol arreol mundu. El Réinu Uñiu, Fráncia, Austrália, Alemaña ociental, Canadá i los Paísis Bahus huerun paísis de la parti americana. Alemaña oriental, Checoslováquia, Rumanía, Poloña, Cuba i Corea el Norti huerun del lau soviéticu.
La Guerra Fría huerun al respetivi de abondas guerras civilis, tal i cumu la Guerra e Corea, las invasionis de Ungría i Checoslováquia i la Guerra e Vienán, tamién cuaharingá polos Estaus Uñius. La crisi e los misilis cubanus hue una parti emportanti e la Guerra Fría i la crisi d'Orienti Meyu s'á güertu tamién más enteosa pol mé la Guerra Fría. Las democrácias ocientalis i la Uñión Soviética discutun el progresu e la Segundera Guerra Mundial i la naturaleda e los alcuerdus de posguerra, enas Conferéncias de Teherán (1943), Yalta (Hebreru 1945) i Posdam (Húliu- Agostu 1945). Aluspués la guerra, las labaciernas entri la Uñión Soviética i las democrácias ocientalis, particulalmenti sobri las envasionis soviéticas de los estaus uropeus orientalis, enhilun a Winston Churchill a alvertil en 1946 c'un "telón d'aceru" estaba cayendu pabahu el meyu d'Uropa. Pola su parti, Joseph Stalin prehundizó ena descofiáncia entri los Estaus Uñius i l'Uñión Soviética deque ihu en 1946 que la Segundera Guerra Mundial hue inevitabrienti consecuéncia del "emperialismu capitalista" i ensinuó que tal guerra puyera gorvel a acaecel.
La Guerra Fría hue un inti e competéncia, desempranti i labaciernas entri el Esti-Oesti, qu'enhamás fruhió pa una guerra a toa escala. Las dos trupis normalmenti nu cofiaban enos pranis i filusofías del otru i huerun suzalachaus en abondas aliáncias u "bloquis" militaris i políticas. Ubun angunas guerras rialis, avedis hucheás "guerras aliás", polque huerun runchás polos collácius soviéticus pol vedi la mesma URSS -- tó pola competéncia pola enfruéncia nel Trecel Mundu i la carrera almamentística.
Duranti la Guerra Fría ubió muchu acoguti en dambas partis de que l'algotra nación gastaran de almas nuclearis a la escontra del otru. Si estu huesi ocurriu antoci abríen pasau abondus esgalazus.
Aluspués la muerti e Stalin, las relacionis Esti-Oesti se gorvun dequilati, inque alternun intis de enfrontilamientus, encluyendu perious d'ayúa, hucheaus detente, duranti los setenta. Una fasi acaberu duranti los úrtimus añus de los ochenta ocurrió bahu el Presienti Mikhail Gorbachev, c'asperaba un alcuerdu entri los dos estaus que puyeran arreglal los pobremas globalis. A pesal destu, enhamás ocurrió, polque la henti que vivía ena Uñión Soviética abogó pol hundeal pa huera el Comunismu, pus iba marrau pol 80 añus i les negó las libertais básicas. Enos noventa, la Uñión Soviética ehó de desistil i s'eschangó en muchus paísis, el Muru e Berlín hue estirancau, las nacionis d'Uropa oriental tuvun democrácias con muchus partius i la Guerra Fría amenidó.