Salamanca
Salamanca es una ciá española, capital dela provincia omónima, ena comunidá autónoma de Castilla i León. Está assitiá nel "Campu de Salamanca", junta'l riu Tormes. Salamanca es famosa prencipalmenti por dos motivus: por poseel una delas nuversidais más antiguas i prestigiosas d'España (d'aí el refrán «Lo que la naturaleza no da, Salamanca no presta») i pol su importanti patrimoñu artísticu i arquitetónicu, costruiu abati esclusivamenti cona dorá piera de Villamayor.
| Salamanca | ||||
|---|---|---|---|---|
| Entidad subnacional | ||||
 | ||||
| ||||
 Ubicación de Salamanca | ||||
| Coordenadas | 40°57′54″N 5°39′51″O / 40.965, -5.6641666666667 | |||
| Capital | Salamanca | |||
| Entidad | Monicipiu d'España | |||
| • País |
 España | |||
| Superficii | ||||
| • Total | 39,56 km² | |||
| Altol | ||||
| • Media | 798 m s. n. m. | |||
| Puebración (2023) | ||||
| • Total | 143954 hab. | |||
| • Densidá | 3638,88 hab/km² | |||
| Huso horario | UTC+01:00 | |||
| Código postal | 37001–37009 | |||
| Prefijo telefónico | 923 | |||
| Patrono(a) | Juan de Sahagún | |||
| Sitio web oficial | ||||
Estória
EditalEstória antigua
EditalCuando chegó la dominación romana a la península Ibérica, los váceus ocupaban la cuenca de Dueru. Para defendel la zona ociental costruyerun dos hortaleças: Ocelo Durii i Salmantica (Salamanca).
Mas preséncia que los váceus tuvierun los vetonis, que imprentarun una huerti presonaliá ena zona e las ogañu províncias d'Ávila, Toleu i Salamanca. Nel sigru III edC, Anibal, nel su avanci pol Ibéria, sitia i toma l'antigua ciá de Helmantica (Salamanca). La leyenda cuenta que los salmantinus rindierun la praça sin oponel resisténcia i salierun de la ciá; peru las mugeris llevaban baxu los sus baberus las armas de los varonis, colas que alogu sitiarun a los cartahinesis endrentu la ciá.
Cola caia e los cartahinesis anti los romanus s'afiança la ocupación i la ciá enceta a conseguil cierta emportáncia. Prontu se convierti nun encravi comercial básicu ebiu al su asiahamientu previlehiau cumu vau sobri riu Tormes, que a la su vezi la convierti en pasu duna e las mas emportantis carçás romanas d'Ispánia, la Via la Prata. Pa esta carçá se costruyi la puenti romana (sigru I) del qu'entovia oi se mantieni en pié la metá norti (la otra metá tuvu que sel recostruia nel sigru XVII aluspués la "Riada de San Policarpo").
Estória medieval
EditalCon el fin del Empériu Romanu, los alanus s'establecin en Lusitánia i la ciá pasa a hormal parti desta rehión. Posteriolmenti los visigous conquistan la ciá i la anesionan al su territóriu. Se tiinin pocus datus al tentu el esarrollu e Salamanca ena epoca visigoa, solamenti se sabi que nel sigru IV la muralla romana se ampria con torreonis sobri el mesmu traçau, i que la fábrica e la cerca anteriol queó destruia práticamenti ena su totaliá. En 589, la ciá hue anombrá sé episcopal i fegura entri las ciais qu'enviaban obispus a los concílius de Toleu.
Nel añu 712, cola envasión musulmana e la península, Musa ibn Nusair conquista la ciá. Duranti tola Arta Eá Meya, gran parti los núcleus de puebración de la zona eran destruius abitualmenti polas frecuentis encursionis de cristianus i d'árabis. Salamanca queó reucia a un núcleu sin emportáncia denguna, i abati sin puebración. Los sucesivus ententus de los réinus cristianus d'estabilizal esta ária prevocan albondus alcuentrus colas espedicionis musulmanas en direción norti, causandu várias çalagardás i batallas, cumu la d'Alfonso I en 754, que acaban pol arrasal lo que quea d'urbanu. La zona remaneci práticamenti despuebrá hata que la emportanti vitória de Ramiro II de Lión, ena batalla e Simancas del añu 939, enceta la decaéncia las encursionis musulmanas al norti el sistema Central. Dendi altonci la línia e Duero se gorvió mas sigura: pol lau ociental, se repuebró el valli el Tormes (Salamanca i Ledesma, entri algotrus lugaris) mentris que pol setol oriental Fernán González hizu lo mesmu en Sepúlveda.
Desta horma, nel sigru X verá umental la su puebración con repuebracionis, especialmenti pola emportáncia la su puenti sobri Tormes. Aluspués la conquista e Toleu pol Alfonso VI, nel añu 1085, la tensión melital se mua a la cuenca e Tahu; esti hechu facilitó la segundera ola e repuebración de la ciá. En 1102, Raimundo de Borgoña se derihi a la ciá con un emportanti grupu e puebraoris de diversu oríhin, pol ordin del su suegru Alfonso VI. Ca unu d'estus grupus s'istaló nuna zona deferenti e la ciá. Francus, serranus (montañesis de la cordillera Cantábrica), castillanus (entiéndasi castillanus del antigu solal entri Burgus i Cantábria), purtuguesis, moçárabis (puebracionis ispanu romanas u ispanu goas que ahuyerun del domiñu musulmán), toresanus, hudius i gallegus hundarun las sus respetivas elésias i parróquias. Se restaura la su Diócesis (siendu el primel obispu Jerónimo de Perigord) i se prencipia a costruil la catedral, en cuyas cercanias nacin unas escuelas que sedrán la simienti la Univelsiá.
Nel añu 1230, bahu el reinau e Fernando III El Santu, se uñin bahu un mesmu monarca los réinus de Lión i de Castilla. Estus réinos encluian Astúrias, Galícia, Lión, La Extrema Durii (uguañoti Estremaura), Castilla La Vieha i las províncias vascongás.
Nel sigru XIII, el monarca Alfonso IX de Lión ordena un tercel repuebraeru de la ciá i, en 1218, dá a las escuelas catedralícias el rangu d'Estuyu Heneral del réinu e Lión que, en 1253, se convertiria en Univelsiá e Salamanca pol rial cédula d'Alfonso X, que hue ratificá pol papa Alejandro IV (1255). La univelsiá alcançaria con el tiempu un gran prestíhiu.
El 12 d'Agostu e 1311 nació entri los sus murus el únicu rei e Castilla i Lión qu'á dau la ciá. Alfonso XI el Husticieru. Subió al tronu con catorci añus i conquistó Gibraltar al mandu las melícias castillanu-lionesas, enas que destacaba la gran preséncia e continhentis salmantinus.
Duranti el sigru XV, Salamanca hue el escenáriu e grandis runchas entri las famílias noblis de la ciá, articulás en dos bandus que se repartierun la ciá: el de San Benito i el de Santo Tomé. Con el umentu e la Mesta, Salamanca otuvu emportáncia cumu centru e manufaturas pañeras i cumu esporteaol de lana.
Estoria moerna
Edital
Cumu el restu de núcleus estóricus de la Corona que tinian arrepresentación en Cortis, Salamanca se uñió al movimientu las Comuniais de Castilla (1520) contra los nuevus empuestus que reclamaba Carlos I enas Cortis i en defensa las sus manufaturas testilis contra los previléhius de los esporteaoris de lana. Endispués la derrota de los Comunerus el rei Carlos I hizu recuertal las torris de los palácius los salmantinus que se sumarun a la regüerta.
El sigru XVI hue la epoca de mayol esplendol de la ciá, tantu ena demografia cumu ena via univelsitária, grácias al prestíhiu los sus profesoris, cola anombrá Escuela e Salamanca (se carcula que Salamanca tinia unus 24.000 abitantis i pol añu 1580 se matriculaban ca añu 6.500 estuyantis). Aluspués s'uñió a la decaéncia heneralizá de las ciais de la Corona e Castilla ena meseta norti (12.000 abitantis en 1651).
Nel sigru XVIII tuvu una emportanti renacéncia económica i curtural, que propició acabihal la catedral Nueva (cuyas obras abian estau parás duranti abati un sigru), la costrución de la su emponenti Praça Mayol barroca en 1729 i premitió rehazel albondus los eifícius monumentalis dañaus pol terremotu e Lisboa e 1755. Nel aspetu curtural, tamién se notó la enfluéncia la Ilustración de los Borbonis ena Univelsiá nel úrtimu térciu el sigru.
Estória contemporánea
EditalDuranti la guerra la Endependéncia, Salamanca hue ocupá polas tropas del mariscal Soult en 1809 i remaneció en manus francesas hata la batalla los Arapilis (1812), ena que vencierun los ehércitus aliaus bahu el mandu e Wellington. Duranti la ocupación, los francesis costruyerun defensas i, pa otenel materialis, destruyerun una emportanti parti los eifícius salmantinus, especialmenti nel bárriu llamau Caídos, ondi s'alcuentraban conocius coléhius mayoris de la Univelsiá, de los que ogañu nu quea ná. El piol momentu chegó cuandu Fernando VII afechó las univelsiais españolas. A partil de la reapertura, la de Salamanca queó reucia a una univelsiá e províncias.
En 1873, tras procramalsi la Primel Repúbrica, Salamanca sufrió un levantamientu cantonalista que hue afogonau.
Duranti el restu el sigru XIX la ciá s'arrecuperó levementi al sel anombrá capital de província i al belsi costruiu el ferrucarril que uñia Fráncia con Purtugal, i que pasaba pola Meseta (Medina del Campo i Salamanca, 1877).
El levantamientu melital contra la Segundera Repúbrica trunfa en Salamanca endi el primel momentu. Duranti la Guerra Cevil, entri Otubri e 1936 i Noviembri e 1937, el Paláciu Episcopal hue resiéncia i centru e mandu el heneral Franco. La ciá hue tamién sé las olganiçacionis falanhistas i d'angunus ministérius. Ya acabihá la guerra, se concentrarun en Salamanca los decumentus encautaus polas tropas nacionalis a miia que diban ocupandu el territóriu repubricanu, colo que se creó un gran archivu decumental al tentu la guerra cevil española (Archivu Heneral de la Guerra Cevil Española). La parti d'esti archivu pretenecienti a Cataluña hue muau a Barcelona ena primavera e 2006, aluspués de grandis disputas entri el Ayuntamientu salmantinu i el Gobielnu español, i manifestacionis popularis. El Ayuntamientu e Salamanca, presiiu pol Julián Lanzarote (PP), cambeó el nombri la calli ena que s'alcuentra el archivu, de «Gibraltar» (nombri que omenaheaba a las melícias salmantinas que huerun con Alfonso XI a la conquista de Gibraltar) a de «El Expolio», cumu señal de protesta tras el treslau e los «papelis de Salamanca» a Cataluña.
En 1940, Pío XII hunda la Univelsiá Pontifícia e Salamanca cumu acontinuación de los antigus estuyus de teulohia.
En 1988 Salamanca es decrará Ciá Patrimoñu la Umaniá pola UNESCO. En 1998, pol acuerdu e los Ministrus de Curtura e la Uñón Uropea, Salamanca es anombrá, unta Bruhas, Capital Uropea e la Curtura el añu 2002. La ciá tamién aspira a otenel la candidatura a la "Expo de Salamanca" nun huturu nu mu lehanu.
Uguañoti la puebración de la capital salmantina, entrancá endi hazi 30 añus, ronda los 160.000 abitantis, inque en 2006 descendió en mas de 11.000 presonas con respetu al añu 1994. Es senificativu comprebal que Salamanca tiini un artu éndici e puebración envehecia respetu a los datus nacionalis.
En Abril de 1972 encetó a furrulal Enusa, una fábrica e combustibri nucleal. La su ativiá comprendi el suministru e matérias primas i el su procesau hata la otención del combustibli, qu'es gastau enas Centralis Nuclearis españolas i en algotras de destintus paisis (Alemaña, Rúsia...). Pola su parti, el setol servícius (el boyanti turismu curtural i la Univelsiá) es la prencipal huenti d'ingresus de la ciá. Es especialmenti emportanti l'ativiá eucativa duranti el vranu, ya que cuenta con una gran afluéncia d'estuyantus proceentis d'albondus paisis, qu'ena su mayoria viinin pa deprendel el castillanu i asistil a diversus cursus de vranu.
La capital salmántina acohió los dias 14 i 15 d'Otubri e 2005 el celebraeru la XV Cumbre Iberuamericana e Hefis d'Estau i e Gobielnu.
Ogañu Salamanca retrocei demográfica i económicamente, puestu que la puebración se dispersa polos monicípius los alreoris, ondi el terrenu es mas baratu, pa istalal nuevas ativiais económicas u mualsi a anguna las numirosas urbaniçacionis cercundantis. Estu prevoca un descensu los puestus de labutu i el pesu la Univelsiá.
Fiestas localis
Edital- 12 de júniu, San Juan de Sahagún, patrón de la ciá.
- 8 de Setiembri, Virgin de la Vega, patrona e la ciá. Abri la semana e Férias i Fiestas.
- Lunis d'Áuguas, el lunis siguienti al lunis de Páscua.
- 1 – 15 de júniu, Festival Entrinacional de las Artis de Castilla i Lión
- Semana Santa en Salamanca, decrará d'Enterés Turísticu Entrinacional en 2003.