Assendelft

Assendelft is oarspronklik in lintdoarp yn 'e provinsje Noard-Hollân en makket diel út fan 'e gemeente Saanstêd. It doarp is fan oarsprong opdield yn ferskillende buorskippen: Noordeinde, Kerkbuurt en Zuideinde. Letter binne dêr Langeheit en wat nei de oanlis fan it Noardseekanaal oerbleaun wie fan it plak Buitenhuizen bykommen. Oan 'e westlike kant bestiet it doarpsgebiet út poldergebiet mei noch in diel fan 'e buorskip Busch en Dam. Oan 'e eastlike kant fan Assendelft lizze de buorskippen Vrouwenverdriet en Nauerna.

Assendelft
Sint-Odulfustsjerke
Emblemen
Bestjoer
Provinsje	Noard-Hollân
Gemeente	Saanstêd
Sifers
Ynwennertal	24.510 (1 jannewaris 2023)
Oerflak	31,89 km²
Oar
Postkoade	1566, 1567
Koördinaten	52° 29 'NB, 4° 45 'EL
Kaart

Assendelft hat de langste doarpsstrjitte fan Nederlân, dy't fan it Noardseekanaal oant Krommenie yn in noarden rint. De strjitte is 7,2 km lang. Assendelft hat 24.510 (1 jannewaris 2023) ynwenners. It grutste part dêrfan wennet yn 'e finekswyk Saendelft.

Skiednis

19e-iuwske kaart fan Assendelft.

Assendelft, Eastsaan en Westsaan ha de âldste skiednis fan 'e Saankrite. Om likernôch 500 f.Kr. ûnstie de earste bewenning yn 'e krite. Opgravings brochten delsettings fan 'e earste bewenners oan it ljocht. It hjoeddeike Assendelft leit hûnderten meters fierder nei it noarden.

It doarp waard yn it jier 1063 foar it earst as Ascmannedilf neamd. Mooglik moat de betsjutting socht wurde yn in ferbining fan 'e Fryske namme Askema mei de namme Delft (grêft), it wetter east fan it doarp.

De ynwenners ha as skelnamme Spanjoalen. Tusken 1572 en 1576 besetten Spaanske troepen Assendelft en oars as oare Saanske plakken waard Assendelft net plondere. De reformaasje wie minder suksesfol yn Assendelft as oare Saanske plakken en de befolking bleau foar in grut part roomsk-katolyk. Yn 1809 wie 52,9% fan'e ynwenners noch katolyk, yn 1960 wie dat 47,50%.

Oant 1974 bleau Assendelft in selsstannige gemeente. Wat oerflak oanbelanget wie it de grutste gemeente fan 'e Saankrite. Yn 'e gemeente Assendelft wie de KVP/RKPN de sterkste fraksje.

It besjen wurdich

Tsjerken

Assendelft hat twa tsjerken, dy't alletwa oan 'e Doarpsstrjitte steane:

• de protestantske tsjerke is in gebou út 1894-1895 en hat in belangryk Bakker & Timmenga-oargel.
• de roomske Sint-Odulfustsjerke is in monumintale tsjerke út 1863.

Wettertoer

De wettertoer fan Assendelft datearret út 1885. It is de âldste noch besteande wettertoer yn Noard-Hollân, al wurdt er net mear as wettertoer brûkt. Yn 'e jierren 1980 waard de wettertoer ferkocht. Oant 2023 siet in restaurant yn 'e wettertoer. Tsjintwurdich docht er tsjinst as kantoar.

Eveneminten

• Immer Gerade Aus, ferklaaide kroegetocht.
• Earste wike fan oktober de merke fan Assendelft.
• Haltpop

Keppeling om utens

• Histoarysk Genoatskip Assendelft

Boarnen, noaten en referinsjes

Boarnen, noaten en/as referinsjes:

Commons Wikimedia Commons  Ofbylden dy't by dit ûnderwerp hearre, binne te finen yn de kategory Assendelft fan Wikimedia Commons.