Estadio Metalist

O Complexo Deportivo do Óblast "Metalist" (en ucraíno: Обласний спортивний комплекс «Металіст», Oblasny sportyvny kompleks «Metalist»), comunmente coñecido como Estadio Metalist (Стадіон «Металіст»), é un estadio de usos múltiples en Khárkiv, Ucraína. Actualmente é utilizado principalmente para partidos de fútbol, sendo o estadio local do FC Metalist Kharkiv. O estadio, que será unha das sedes da Eurocopa 2012, ten capacidade para 38.633 espectadores.

Estadio Metalist Стадіон Металіст
Oblasny Sport Komplex Metalist
Datos
Coordenadas	49°58′51″N 36°15′42″L
Localización	Khárkiv, Ucraína
Outros nomes	Estadio Tractor (1926-49) Estadio Dzerzhinets (1940-67)
Construción
Inauguración	12 de setembro de 1926
Renovación	5 de decembro de 2009
Arquitecto	Z.V. Permilovskyi
Estadio
Superficie	Céspede
Dimensións	105 x 68
Capacidade	38.633
Propietario	FC Metalist Kharkiv
Operadora	Futbolniy Klub Metalist 1925 Kharkiv
Localía	FC Metalist Kharkiv
Eventos
UEFA Euro 2012
[ editar datos en Wikidata ]

Historia

A construción do estadio comezou en 1925 por orde de Anastas Mikoyan, no lugar onde se atopaba o cemiterio do Espírito Santo. Inaugurado o 12 de setembro de 1926, o novo estadio era coñecido como "Traktor", xa que recibía o patrocinio dunha planta de tractores de produción local. Antes da segunda guerra mundial, a instalación pasou a chamarse Estadio Dzerzhynets na honra de Felix Dzerzhinsky, o primeiro xefe da Cheka. Dende 1967 recibe o seu nome actual; ese mesmo ano a capacidade do estadio era para 10.000 espectadores.

Renovacións

Incluíndo as melloras para a Eurocopa 2012, o estadio sufriu catro reformas ao longo da súa historia. A primeira delas tivo lugar a mediados dos anos 1960, cando a sección oeste da estrutura foi renovada. A seguinte, que se iniciou en 1970 e terminou catro anos máis tarde, viu a adición das bancadas norte e sur, aumentando a capacidade até os 30.000 espectadores. O arquitecto do proxecto foi Yu. Tabakova. Tamén foi construído o primeiro teito do estadio e un sistema de drenaxe, así como a iluminación, un panel de información, un ximnasio e un hotel.

Unha terceira reforma iniciouse en 1979 para renovar as bancadas leste e sur, mais está non se terminou até tres décadas máis tarde. Despois da demolición ese ano da bancada sur, a construción foi detida por tempo indefinido, e só en 1998 foi continuada tras un atraso de case vinte anos. Erixiuse unha nova bancada leste e a sur foi parcialmente reconstruída.

Unha cuarta renovación do Metalist foi ordenada para a súa preparación de cara a Eurocopa 2012. A bancada sur foi completada e a bancada leste completamente reconstruída. A substitución o teito, xunto con outras modernizacións e melloras estéticas, completouse a finais de 2009. O 5 de decembro de 2009, o renovado estadio foi inaugurado oficialmente por mor do 50º aniversario do presidente do Metalist Kharkiv, Oleksandr Yaroslavsky.

O bancada sur contén un centro comercial-centro de negocios de tres andares, o "Metalist Arena". As oficinas son alugadas por UkrSibbank a varios negocios locais e outros bancos. Hai unha farmacia, un consultorio médico, axencias de turismo e outros negocios.

Eurocopa 2012

Artigo principal: Eurocopa de Fútbol Polonia/Ucraína 2012.

Partidos

O Estadio Metalist albergou durante o campionato tres encontros, todos correspondentes á fase de grupos (grupo B). Os partidos foron os seguintes:

Data	Fase	Equipo		Resultado		Equipo	Espectadores
9 de xuño	Primeira rolda	Países Baixos		0 - 1		Dinamarca	35.923
13 de xuño	Primeira rolda	Países Baixos		1 - 2		Alemaña	37.750
17 de xuño	Primeira rolda	Portugal		2 - 1		Países Baixos	37.445

Véxase tamén

Outros artigos

• Sedes da Eurocopa de Polonia e Ucraína 2012

Ligazóns externas

• Cámaras web Arquivado 03 de xaneiro de 2012 en Wayback Machine.
• Sitio web oficial do estadio
• Sitio web oficial da UEFA Euro 2012