Hadrián

Hadrián^[1]^[2] é un nome propio masculino galego. A súa orixe é o latín Hadrianus, estirpe romana do emperador Hadriano. En galego tamén ten as variantes Adriano, Adrao, Hadriano e Adrán.^[2]

En xaneiro de 2023 existían 74 varóns en Galicia co nome Hadrián, cunha media de idade de 23,2 anos,^[3] 225 co nome Adriano, cunha media de idade de 49,6 anos^[4] e 11 co nome Adrán, cunha media de idade de 14 anos.^[5] Non hai persoas rexistradas coas variantes Adrao ou Hadriano.

Outras linguas

As variantes gráficas para escribir as versións deste nome noutras linguas son as seguintes:

alemán: Adrian, Adria, Adriaan, Adrijan, Adriaen, Adrián, Adriano, Adrien, Andrigan, Arian, Hadrian, Jadran
catalán: Adrià
castelán: Adrián, Adriano (papas e emperador)
checo: Hadrián, Adrián
francés: Adrien (papas), Hadrian (emperador), ás veces mesmo Arien, Adryen, Adrian, Hadrien
inglés: Adrian, Adrien, Hadrian (papas e emperador), Ade [ás veces úsase a grafía francesa Adrien (como en Adrien Brody), pero en todo caso sempre se pronuncia con ditongo inicial]
italiano: Adriano, Adreano, Adrio
neerlandés: Adriaan, Adriaen, Adrianus, Aad, Aarjen, Aat, Ad, Adri, Adrie, Aerjen, Arian, Ari, Ariaan, Arie, Arius, Arjan, Arjen, Erjen, Hadriaan, Hadrianus, Janus, Jari
polaco: Adrian
portugués: Adriano, Adrião
romanés: Adrian, Adi

Personaxes

Relixión

Hadrián I: Papa que estivo no solio pontificio do ano 772 ó 795.
Hadrián II: Papa que gobernou a igrexa cristiá dende os anos 867 ó 872.
Hadrián III: Papa que gobernou a igrexa cristiá dende os anos 884 ó 885.
Hadrián IV: Papa que gobernou a igrexa cristiá dende os anos 1154 ó 1159.
Hadrián V: Papa que gobernou a igrexa cristiá no ano 1276.
Hadrián VI: Papa que gobernou a igrexa cristiá dende os anos 1522 ó 1523.
Hadrián de Cesarea, mártir cristián finado no 309 (5 de marzo).
Hadrián de Nicomedia, mártir cristián, torturado e decapitado no ano 303 (8 de setembro).

Aristocracia

Hadriano: tamén coñecido coma "Publio Elio Hadriano"; emperador de Roma dende 117 ó 138.

Outros

Adrián Troitiño, anarcosindicalista galego.
Adrián Solleiro González, ilustrador galego.
Adrián Estévez Iglesias, filólogo, escritor e wikimedista galego.
Adrian de Vries: escultor neerlandés.
Adrian Dimítrievich Zajárov: arquitecto ruso.
Adriano Balbi: xeógrafo e estadista italiano.
Adriano Banchieri: compositor italiano.
Adriano Celentano: Cantante e actor italiano.
Adriano del Valle: poeta español.
Adriano Olivetti: político e enxeñeiro industrial italiano.

Hadrián na cultura galega

Na toponimia

Concellos en que se encontran parroquias coa advocación de Santo Adrián

Concellos en que se encontran parroquias coa advocación de Santo Adrán

Concellos en que se encontran parroquias coa advocación de Santo Adrao

Distribución conxunta dos concellos en que se encontran parroquias coa advocación de Hadrián en tódalas súas variantes gráficas

Segundo o nomenclátor de Galicia oficial da Xunta, en Galiza hai 15 parroquias consagradas a este santo, aínda que ningunha delas escrita con hache:

4 delas coa variante Adrián: Vilariño, Cambados; Calvos, Fornelos de Montes; Meder, Salvaterra de Miño; e Santo Adrián de Castro, Zas.
outras 4 coa variante Adrán: Toba, Cee; Verdes, Coristanco; Corme Aldea, Ponteceso e Cobres, Vilaboa.
e outras 7 coa variante Adrao: Moneixas e Madriñán, Lalín; Ousón, Becerreá; Bieite, Leiro; Santo Adrao de Lourenzá, Lourenzá; Veiga, Ortigueira e Zapeaus, Rairiz de Veiga.

Tamén existen os lugares de Santo Adrián (A Pobra do Brollón e O Saviñao), Santo Adrián de Castro (Zas), Adrán (A Laracha, Ordes e Teo), Santadrao (Castroverde, A Pastoriza e Riotorto), Santo Adrao (Vilalba), Santadriao (Pantón) e Santradán (Cobres, Vilaboa).

Á xeografía física corresponde o cabo de Santo Hadrián, en Malpica.

Na literatura

Na literatura galega cómpre destacar o influxo deste antropónimo en Otero Pedrayo. Nado un 5 de marzo, puxo este nome a tres personaxes dos seus libros: Adrián Solovio (Arredor de si), Adrián Silva (La vocación de Adrián Silva), e Adrián Soutelo (o tío de Paio, n' Os camiños da vida). Outros personaxes literarios deste nome son Adrián Novoa (Cartas de inverno, de Agustín Fernández Paz) e Adrián Seivane (Baixo mínimos, de Diego Ameixeiras).

Na cultura tradicional

Na cultura popular galega hai unha lenda, un refrán e unha cantiga vencellados a Santo Hadrián. A lenda di como segue:

En Corme existe a Pedra da Serpe, que conserva a figura dunha serpe alada. A súa autoría é discutida, pero asóciase aos cultos precristianos ás serpes, relacionado coa chegada dos celtas, que tiñan como símbolo heráldico a serpe. Segundo a lenda, cando San Hadrián andaba predicando pola zona, esta era inhabitable debido a unha praga de serpes. Porén, o santo golpeou o chan co pé e todas foron refuxiarse baixo a pedra, quedando unha delas petrificada en sinal deste feito. Como símbolo da cristianización deste lugar púxoselle unha cruz enriba.

O refrán é: Día de san Adrián, sécalle a primeira raíz ó pan.

A cantiga, con dúas variantes, é:

Meu siñor San Adrián/é un santo milagroso/pedínlle un mozo bonito/doume un barbas de raposo.
Meu señor San Adrián/é un santo moi milagreiro/pedinlle un home bonito/doume un cara de carneiro.

Notas

↑ Xunta de Galicia (ed.). "Ímoslle chamar..." (PDF). Arquivado dende o orixinal (PDF) o 04 de marzo de 2018. Consultado o 13 de xuño de 2017.
↑ ^2,0 ^2,1 Boullón Agrelo, Ana Isabel (coord.): Guía de nomes galegos A Coruña: Real Academia Galega.
↑ Nome Hadrián na Web do Intituto Galego de Estatística
↑ Nome Adriano na Web do Intituto Galego de Estatística
↑ Nome Adrán na Web do Intituto Galego de Estatística

Véxase tamén

Outros artigos

[1] Xunta de Galicia (ed.). "Ímoslle chamar..." (PDF). Arquivado dende o orixinal (PDF) o 04 de marzo de 2018. Consultado o 13 de xuño de 2017.

[RAG-2] 2,0 ^2,1 Boullón Agrelo, Ana Isabel (coord.): Guía de nomes galegos A Coruña: Real Academia Galega.

[3] Nome Hadrián na Web do Intituto Galego de Estatística

[4] Nome Adriano na Web do Intituto Galego de Estatística

[5] Nome Adrán na Web do Intituto Galego de Estatística

[1]

[2]

[3]

[4]

[5]