Heterosexualidade obrigatoria
A heterosexualidade obrigatoria refírese á concepción social de que a heterosexualidade é a inclinación natural dos seres humanos e que, por tanto, pode ser adoptada de maneira independente das posibles preferencias sexuais de cada persoa. Consecuentemente, calquera que difira desta orientación é considerado desviado e depravado. É unha idea asumida e reforzada pola sociedade patriarcal.[1]
Adrienne Rich popularizou o termo nos anos 1980 co seu ensaio Heterosexualidade obrigatoria e existencia lesbiana.[1] Nel denunciaba os sesgos do feminismo cando relegaba ao lesbianismo, do mesmo xeito que facía cos feminismos negros, a “un fenómeno marxinal ou menos natural, como unha mera preferencia sexual ou como unha imaxe especular das relacións heterosexuais ou homosexuais masculinas”. A análise feminista da época non só non cuestionaba a heterosexualidade como unha institución que constituía outro eixe de opresión, senón que asumía que as mulleres eran naturalmente heterosexuais. Ademais, argumentaba que esta asunción responde en realidade a unha homofobia herdada de preceptos relixiosos, médicos, económicos e sociais tradicionais.[2][3]
Doutra banda, Adrienne Rich analiza como dos poucos estudos que abordaban o lesbianismo, algúns tendían a dar unha explicación ao mesmo pero sen darlla á heterosexualidade, partindo da premisa de que a heterosexualidade é natural e necesaria e non necesita explicación. Outros simplemente incluían a sexualidade lesbiana baixo a homosexualidade masculina, invisibilizando as particularidades das mulleres lesbianas. Ademais, frecuentemente asumíase que o lesbianismo era unha opción elixida tras un rexeitamento aos homes ou a relacións insatisfactorias con estes.[1]
Ademais, engade que a heterosexualidade é un requisito para as mulleres no mundo laboral, onde se enfrontan constantemente a acoso sexual, facendo que un comportamento heterosexual afable ante o acoso dos homes convértase nun requisito para manter o posto de traballo.[1][4]
Aínda que nun primeiro momento o concepto de heterosexualidade obrigatoria foi concibido en relación á situación das mulleres lesbianas, hoxe en día utilízase igualmente para referirse a como os homes homosexuais enfróntanse á presunción de heterosexualidade por parte da sociedade.[5]
Véxase tamén
editar| A Galipedia ten un portal sobre: Diversidade sexual |
Referencias
editar- ↑ 1,0 1,1 1,2 1,3 Rich, Adrienne (1980) Heterosexualidad obligatoria y existencia lesbiana .
- ↑ Katz, Jonathan (1992). Gay American History: Lesbians and Gay Men in the U.S.A. : a Documentary Histor (en inglés). Meridian.
- ↑ Murphy, Timothy F. (2000). Reader's Guide to Lesbian and Gay Studies (en inglés). Taylor & Francis.
- ↑ Catharine A. MacKinnon (1979). Sexual Harassment of Working Women: A Case of Sax Discrimination.
- ↑ Herrero-Brasas, Juan A. (2001). La sociedad gay: una invisible minoría. Akal.