Pazo de Vilane
O Pazo de Vilane é un pazo situado no lugar de Vilane, na parroquia de San Xoán de Antas de Ulla, no concello lugués de Antas de Ulla. Hoxe é sede dunha granxa sostíbel que produce ovos campeiros e marmeladas de froitos do bosque entre outros produtos.
| Pazo de Vilane | |
|---|---|
 | |
| Concello | Antas de Ulla |
| Provincia | Lugo |
| Comunidade | Galicia |
| Coordenadas | 42°46′53″N 7°54′13″O / 42.781275240074, -7.9035762432006 |
| Estilo arquitectónico | |
| Estilo orixinal | (século XVII) |
| Estilo actual | (barroco, século XIX) |
| Estado actual | en bo estado |
| Véxase tamén | |
| Pazos de Galicia | |
| [ editar datos en Wikidata ] | |
Características
editar
O pazo de Vilane ten probabelmente a súa orixe contra finais do século XVII, afín a outras casas señorís da Comarca da Ulloa. Tivo unha notábel reconstrución a comezos do século XIX sobre outras intervencións claramente barrocas, arranxándose nun conxunto completo e harmonioso cos usos característicos á súa tipoloxía.
O pazo está trazado nunha planta en forma de U, con desigual lonxitude en cadansúa á, sendo a máis curta nun dos laterais, onde se atopa unha característica torre. En liña coa torre, na parte posterior da vivenda, encóntrase a capela, de execución discreta mais delicada. Ofrece unha peculiar colocación da espadana por mor da súa posterior incorporación ao edificio do pazo.
Unha airosa solaina corre ao longo dos outros dous corpor que acollen amplas dependencias, mirando cara ao interior do patio de entrada. O acceso realízase a través dun sólido portón tralo que se desenvolve un folgado soportal. Os edificios que integran o pazo foron executados en coidadosa cantaría de granito. Na parte posterior do edificio principal e dentro do cerramento xeral do pazo atópase a palleira e mailo hórreo.
O pazo dende o ano 1990
editarNa década de 1990, Juan Varela-Portas y Pardo comeza a dar os primeiros pasos cara a rehabilitación das construcións, cunha clara vocación de recuperación respectuosa do patrimonio arquitectónico de Galicia. As súas tres liñas de actuación son: a recuperación do patrimonio, o desenvolvemento sostíbel da comarca e a contorna natural.
En 1996, a filla máis nova de Juan Varela-Portas y Pardo, Nuria Varela-Portas, encabeza a iniciativa familiar que nace co propósito de desenvolver un proxecto sustentábel e innovador que elabore produtos de forma coidada e con carácter artesanal. Deste xeito, Pazo de Vilane convértese nun proxecto pioneiro na produción de ovo de galiñas campeiras ou ovo de galiñas en liberdade en Galicia, reactivando a economía rural, dando especial atención ao papel e desenvolvemento da muller. Tamén cultivan framboesas a arandos ecolóxicos cos que fan zumes e marmeladas[1]. Tamén fomenta a cultura na comarca da Ulloa coa realización de concertos de música clásica e outras actividades sociais que se veñene desenvolvendo de forma aberta a de balde dende o ano 2000.
Notas
editar- ↑ "Información na Web do Pazo". Arquivado dende o orixinal o 01 de xaneiro de 2016. Consultado o 17 de novembro de 2015.
Véxase tamén
editarBibliografía
editar- Yebra de Ares, A. B. (1997): Pazos y señorios de la Provincia de Lugo. Deputación de Lugo. ISBN 978-84-8192-107-6.