Bach-Werke-Verzeichnis
O Bach-Werke-Verzeichnis ou BWV (Catálogo de Obras de Bach) é o sistema de numeración usado para identificar as composicións musicais de Johann Sebastian Bach. O prefixo BWV, seguido polo número de obra, é a identificación das obras de Bach. As obras deste catálogo están agrupadas temáticamente, non cronoloxicamente. O título completo do catálogo é Thematisch-systematisches Verzeichnis der musikalischen Werke von Johann Sebastian Bach (Catálogo Temático-Sistemático de Composicións Musicais de Johann Sebastian Bach).
Por extensión, BWV é o sistema de numeración das obras de Bach que se emprega na actualidade. En ocasións mencionase a serie BWV como números Schmieder, e é citada como S.130, en lugar de BWV 130, se ben esa práctica é minoritaria.
Historia
editarO rexistro das obras de Bach, ou Bach-Werke-Verzeichnis (Catálogo de Obras de Bach), abreviado BWV, foi elaborado por Wolfgang Schmieder, e foi presentado en 1950. Dende a súa creación experimentou varias melloras e correccións, aínda que estas non afectaron á súa estrutura básica.[1] Este catálogo pasou a substituír os da Bach Gesellschaft, que entre 1850 e 1900 publicara a obra completa de Bach en 46 volumes.[2]
O descubrimento de máis obras de Bach e a omisión doutras que lle foran atribuídas anteriormente levou a que a numeración sexa parcialmente incompleta e tivo que ser ampliada con outras obras despois do número 1080.[1]
Posteriormente á aparición do catálogo Bach-Werke-Verzeichnis apareceron outros catálogos como o Bach Compendium, comezado en 1985.[3] Por outra banda, o catálogo Zwang presenta un sistema alternativo para enumerar as cantatas BWV 1–215 e 248–249 tendo en conta a data de composición.[4]
A edición de 1990 do catálogo BWV é ISBN 3-7651-0255-5.
Notación
editarA orde adoita expresarse do seguinte xeito: primeiro o título e se é necesario a tonalidade da obra, a continuación o número, e finalmente, en ocasións, o ano de composición, no caso de que sexa coñecido. Por exemplo: Misa en sol menor, BWV 235 (circa 1738). É posible tamén encontrar unha mesma obra baixo a denominación de varios números Schmieder, por exemplo: Das wohltemperierte Klavier (BWV 846-893).
Nalgúns casos adoita sinalarse o obra polo seu título en alemán, seguida do número Schmieder e o número de orde da sección dentro da obra. Deste xeito, na cantata Herz und Mund und Tat und Leben, BWV 147 (O corazón, a boca, os feitos e a vida), o coro que pecha a segunda parte pode citarse do seguinte xeito: "Jesus bleibet meine Freude", BWV 147,10 (é dicir, a décima sección do número Schmieder 147). Pode ocorrer que Bach tivera composto varias versións dunha mesma obra, o que se sinala cunha letra ao final do número Schmieder. Por exemplo, a cantata secular Was mir behagt, ist nur die muntre Jagd, BWV 208 (Cantata da caza), presentouse tamén como cantata sacra, e figura no catálogo como BWV 208a.
Estrutura do catálogo
editarAs obras de Bach deste catálogo están agrupadas en dúas grandes seccións: primeiro a música vocal (BWV 1-524) e despois a música instrumental (BWV 525-1127). Dentro destas dúas seccións as obras están agrupadas por xéneros e non por data, polo que un BWV menor non indica que sexa unha composición temperá. Existe tamén un apéndice do catálogo, denominado BWV Anh, con obras das que só sobreviviron fragmentos, consideradas perdidas etc.[1]
Cómpre ter en conta que Bach non asignaba o tradicional número de opus ás súas obras, e que imprimiu poucas das súas composicións en vida, o que provocou e segue a provocar problemas de datación e atribución. Tamén hai que ter en conta que as súas obras caeron no esquecemento ata que no século XIX Felix Mendelssohn fomentou o seu redescubrimento para o gran público. Tales circunstancias significaron que as obras de Bach tiveran unha clasificación problemática, o que exixiu unha intensa investigación musicolóxica.
O catálogo está estruturado do seguinte xeito:[5]
| Número | Xénero | Divisións internas |
|---|---|---|
| 1-224 | Cantatas | |
| 225-524 | Outras composicións vocais | 225-231: Motetes. 232-242: Misas. 243: Magnificat. 244-247: Paixóns. 248-249: Oratorios. 250-524: Composicións corais. |
| 525-771 | Composicións para órgano | |
| 772-994 | Pezas para teclado | |
| 995-1013 | Música para instrumentos a solo | 995-1000 e 1006a: Obras para laúde solo. 1001-1006: Sonatas e partitas para violín solo. 1007-1012: Suites para violonchelo solo. 1013: Partita para frauta solo. |
| 1014-1040 | Música de cámara | 1014-1023: Sonatas para violín e teclado. 1027-1029: Sonatas para viola da gamba e teclado. 1030-1035: Sonatas para frauta e teclado. 1036-1040: Trío-sonatas. |
| 1041-1071 | Obras orquestrais | 1041-1065: Concertos para solista e orquestra. 1079: Musikalisches Opfer. 1080: Die Kunst der Fuge. |
| 1072-1080 | Obras contrapuntísticas | 1072-1078: canons. 1066-1071: Aberturas e Sinfonías. |
| 1081-1127 | Últimas atribucións |
A abreviatura Anh. refírese ao apéndice (Anhang) do catálogo, distribúese do seguinte xeito: Anh. 1-23 agrupa obras perdidas e fragmentarias, Anh. 24-155 obras dudosas e Anh. 156-189 as falsas atribucións.[6]
A expresión deest (do latín de, negación, e est, estar) ou o seu plural (desunt), usada en certos catálogos das obras de Bach (mais non como número BWV) significa simplemente que carece de número Schmieder, sexa polas dúbidas da súa atribución, polo seu recente descubrimento ou por calquera outro motivo argumentado polo seu editor.[7]
Notas
editar- ↑ 1,0 1,1 1,2 Bach Digital (ed.). "Bach Works Catalogue (Bach-Werke-Verzeichnis, BWV)" (en inglés). Arquivado dende o orixinal o 01 de xullo de 2015. Consultado o 24 de decembro de 2014.
- ↑ Hans T. David & Arthur Mendel, eds. (1998). The New Bach Reader: A Life of Johann Sebastian Bach in Letters and Documents ((Revised and expanded by Christoph Wolff) edición). NY: Norton. p. 504. ISBN 0-393-31956-3
- ↑ bach-cantatas.com (ed.). "Index to References to Bach Cantatas & Other Vocal Works Bach Compendium" (en inglés). Consultado o 12 de marzo de 2015.
- ↑ Universidade de Quebec (ed.). "Johann Sebastian Bach. Correspondance Catalogues Zwang - Schmeider" (en francés). Archived from the original on 13 de decembro de 2005. Consultado o 12 de marzo de 2015.
- ↑ bach-cantatas.com (ed.). "BWV & BWV Anh Lists" (en inglés). Consultado o 12 de marzo de 2015.
- ↑ Enrique M. Miura, J. S. Bach. Península, Barcelona, 2001, páx 355.
- ↑ bach-cantatas.com (ed.). "BWV Numbering System. Part 3" (en inglés). Consultado o 12 de marzo de 2015.
Véxase tamén
editarBibliografía
editar- Wolfgang Schmieder (editor). Thematisch-systematisches Verzeichnis der musikalischen Werke von Johann Sebastian Bach. Leipzig: Breitkopf & Härtel, 1950. Unaltered up unto its eighth printing in 1986.
- (2) Second edition: Thematisch-systematisches Verzeichnis der musikalischen Werke von Johann Sebastian Bach: Bach-Werke-Verzeichnis, überarbeitete und erweiterte Ausgabe. Wiesbaden: Breitkopf & Härtel, 1990. ISBN 3-7651-0255-5 - ISBN 978-3-7651-0255-4
- (2a) Alfred Dürr, Yoshitake Kobayashi (eds.), Kirsten Beißwenger. Bach Werke Verzeichnis: Kleine Ausgabe, nach der von Wolfgang Schmieder vorgelegten 2. Ausgabe. Prefacio en inglés e alemán. Wiesbaden: Breitkopf & Härtel, 1998. ISBN 3-7651-0249-0 - ISBN 978-3-7651-0249-3