Carballo Tamme-Lauri

O Carballo de Tamme-Lauri (en estoniano: Tamme-Lauri tamm; en võro: Tammõ-Lauri tamm) é a árbore máis grosa e máis antiga de Estonia e está situada no municipio rural de Antsla, no condado de Võru.

O Carballo Tamme-Lauri

Caracterización

Detalle do tronco do Carballo Tamme-Lauri

O carballo ten unha altura de 19 metros, a súa circunferencia mide 821 centímetros (medida a 130 centímetros de altura desde o chan).

Segundo cálculos dos investigadores, a árbore naceu arredor de 1326.

Historia

Este carballo foi alcanzado por raios en varias ocasións, o que danou varias das súas pólas e baleirou o centro do seu tronco, aínda que segue a ser viable. Durante a súa restauración na década de 1970 atopouse dentro del un acocho antigo dos "Irmáns do Bosque" (metsavennad), un movemento de resistencia contra a ocupación soviética, no que podían estar de pé sete persoas. Finalmente, o oco encheuse con oito toneladas de cemento.

O carballo goza de protección oficial desde 1939. O terreo onde se atopa foi adquirido polo Ministerio do Ambiente de Estonia en 2006 por 400.000 coroas estonianas.

O Carballo Tamme-Lauri no billete de 10 coroas estonianas

A denominación de Carballo Tamme-Lauri vénlle da granxa homónima que, pola súa vez, recibiu o seu nome dun espírito que antigamente se pensaba que habitaba na árbore, portador ás veces de mala sorte e ás veces de boa; era o espírito do lume e o seu nome era Laurits. O Carballo Tamme-Lauri aparece representado nos reversos dos billetes de dez coroas estonianas.

Véxase tamén

Ligazóns externas

• Ficha do Carballo Tamme-Lauri na Axencia Ambiental de Estonia