Epsomita

Epsomita
Fórmula química	MgSO4 · 7H2O
Clase	Sulfato
Sistema cristalino	Ortorrómbico
Cor	Branca, amarelada, verdosa, avermellada, rosa
Brillo	De vítreo a sedoso
Dureza	2 - 2,5 (escala de Mohs)
Fractura	Concoidea
Exfoliación	Perfecta
Raia	Branca
Densidade	1,68 g/cm³

A epsomita é a forma mineral do sulfato de magnesio heptahidratado (MgSO₄ · 7H₂O). O seu nome provén da localidade de Epsom (Surrey, Inglaterra), de onde hai tempo que son coñecidos os depósitos deste mineral asociados a augas minerais.

Propiedades

Aínda que é de cor branca, a epsomita adoita aparecer coloreada cunha variedade de matices pálidos debido á presenza de impurezas. Estas son fundamentalmente níquel, ferro, cobalto, manganeso e zinc; a cor rosa relaciónase coa presenza de cobalto, mentres que a verde asóciase a da de níquel.

Forma unha serie completa canda a goslarita (ZnSO₄ · 7H₂O) e a morenosita (NiSO₄ · 7H₂O).

A epsomita é soluble en auga e ten un sabor amargo e salgado. Ao aire libre deshidrátase, tornándose mate, polo que debe ser conservada nun recipiente pechado ou en plástico e ser limpada só con alcol. Cristaliza no sistema ortorrómbico.

Morfoloxía e formación

A epsomita aparece formando cristais, agregados fibrosos, costras, estalactitas, eflorescencias. Habitualmente atópase como eflorescencias en zonas abrigadas de afloramentos rochosos dolomíticos e calcarios. Normalmente tamén se pode atopar nas paredes de covas e en depósitos de lagos salgados. Tamén abunda en paredes de minas de carbón e minas metalíferas, incluso ns soportes de madeira e no material abandonado.

Depósitos

As acumulacións de epsomita son frecuentes, podéndose destacar os existentes na antiga Unión Soviética —lagos magnésicos de Djaman-Klytch e de Djelonsk—. Nos lagos salgados do Monte Kruger (Washington, Estados Unidos) acháronse cristais que teñen os 2 metros. En España existen eflorescencias importantes moi cerca de Calatayud (Aragón) e en México en Aquiles Serdán (Chiapas).

Véxase tamén

Outros artigos

Lista de minerais
Kieserita (MgSO₄ · H₂O), forma mineral menos hidratada que a epsomita.