Imhotep

Imhotep ou Imouthes, que significa "o que vén en paz", foi un visir e o arquitecto da primeira pirámide, a Pirámide de Zoser (2.667-2.648 a.C.), da dinastía III do Antigo Exipto.

Imhotep

Biografía
Nacemento	século XXVIII a. C. Menfis, Exipto
Morte	século XXVII a. C. Antigo Exipto
Sabio
Actividade
Ocupación	arquitecto, astrónomo, enxeñeiro, médico
Familia
Nai	Kheredu-ankh
Descrito pola fonte	Paulys Realenzyklopädie der klassischen Altertumswissenschaft Dictionary of African Biography,

Estatua votiva en bronce do arquitecto deificado Imhotep. Baixa Época séculos VI-IV a.c. Museo do Louvre

Manetón outorgoulle o mérito de introducir a arquitectura en pedra traballada. Asemade, suponse que redactou un certo número de obras das chamadas "Instrucións" (sebayt), aínda que ningunha delas chegase ata nós.

Pola súa gran sabedoría obtivo unha gran reputación, tanta que aproximadamente douscentos anos despois da súa morte aparecen as primeiras evidencias da súa deificación (algo moi raro no Antigo Exipto fora das figuras dos faraóns).

Está considerado unha deidade vinculada á Sabedoría, escritura e medicina, emparentándose cos cultos dos deuses Ptath e Thot. Os gregos identificárono co seu deus da medicina Asclepio ou Esculapio, e o seu centro de culto en Saqqara: o Asklepeion, converteuse nun importante lugar de peregrinación para os enfermos, que lle ofrecían corpos momificados de Ibis ou réplicas en barro dos membros ou órganos enfermos.

A súa tumba aínda non se atopou pero algúns manteñen que puidera ser a mastaba 3518 de Saqqara (que carece de inscricións).

Na Baixa Época foi común velo representado en figuriñas de bronce coma un escriba sentado desenrolando un papiro sobre os seus xeonllos. Unha delas foi encontrada en Menorca na década de 1970 durante a escavación dun sitio arqueolóxico da cultura talaiótica e hoxe encóntrase no Museo de Menorca. Foi fabricada no Antigo Exipto no século VII a. C. e é a única do mundo encontrada nun sitio arqueolóxico fóra de territorio exipcio.