La Graciosa

Para outras páxinas con títulos homónimos véxase: Graciosa.

La Graciosa é unha illa que pertence á provincia das Palmas, nas Canarias (España). Forma parte do arquipélago Chinijo, xunto cos illotes de Montaña Clara, Roque del Este, Roque del Oeste e Alegranza, que pertence ao concello de Teguise, en Lanzarote. A economía insular está baseada principalmente no turismo.

La Graciosa

Localización
29°15′N 13°30′O
Estado	España
Comunidade autónoma	Illas Canarias
Provincia	Las Palmas
Concello	Teguise
Capital	Caleta de Sebo
Poboación
Poboación	723 (2023) (24,89 hab./km²)
Xeografía
Parte de	Arquipélago Chinijo
Superficie	29,05 km²
Lonxitude da costa	30,395 km
Bañado por	Océano Atlántico
Altitude	266 m
Identificador descritivo
Fuso horario	UTC±00:00

Está situada ao noroeste de Lanzarote, illa da que depende administrativamente e da que a separa un brazo de mar coñecido como El Río. Tamén está relativamente próxima á costa continental africana.

Status

O 26 de xuño de 2018 a Comisión Xeral das Comunidades Autónomas do Senado aprobou por unanimidade unha moción que recoñece a La Graciosa como a oitava illa habitada das Canarias​ deixando de ser considerada como un illote.​ Con todo, esta medida non a equipara ao resto das illas do arquipélago, pois La Graciosa continúa pertencendo ao municipio lanzaroteño de Teguise e tampouco conta con cabido insular propio (órgano político imprescindible para a súa equiparación ao resto de illas do arquipélago).

Con esta medida, o status de La Graciosa é de illa con pedanía, é dicir, de entidade local menor con personalidade xurídica. Conta cun orzamento propio que se inviste directamente nos servizos públicos necesarios para os veciños. Esta medida recoñece a La Graciosa como a oitava illa habitada do arquipélago canario, pero continúa dependendo administrativamente de Lanzarote.

Historia

Foi conquistada en 1402 polo explorador normando Jean de Béthencourt, baixo o vasallaxe de Henrique III de Castela.

A orixe da poboación remóntase ao século XIX. En 1861 o Goberno permite á empresa anglo-española Cappa y Maqueda o establecemento dunha factoría de salgadura de peixe. Este establecemento implicou a construción dos almacéns e as primeiras casas da illa. A finais do século XIX, co afán por establecer as pesqueiras canario-africanas na illa, formouse a aldea de Caleta de Sebo.​

Xeografía

La Graciosa é a maior das illas e illotes que compoñen o Arquipélago Chinijo, cunha superficie duns 29 km². Ao sur predominan largas praias de areas claras, como as da Cocina e a dos Franceses. Tamén no litoral atópanse os seus dous asentamentos urbanos: Caleta de Sebo, núcleo de poboación orixinario e capital da illa, e Pedro Barba, unha pequena urbanización turística. Igual que o resto das illas Canarias, a súa orixe é volcánica.

Entre os seus puntos xeográficos destacan os seguintes:

• Agujas Grandes (266 m)
• Agujas Chicas (189 m)
• Montaña del Mojón (188 m)
• Montaña Amarilla (172 m)
• Montaña Bermeja (157 m)
• Praia de Las Conchas

Demografía

Segundo datos do INE, en 2019 tiña unha poboación de 737 habitantes, distribuídos da seguinte maneira:

• Caleta de Sebo: 733 hab.
• Pedro Barba: 3 hab.
• Diseminado: 1 hab.

Variación demográfica de La Graciosa (INE)

2000	2001	2002	2003	2004	2005	2006	2007	2008
626	615	626	621	630	637	658	640	648

Administración e política

A diferenza das outras sete illas das Canarias, La Graciosa non conta con cabido insular propio. A illa depende administrativamente do concello lanzaroteño de Teguise, no que posúe un concelleiro.

Comunicacións

A illa é accesible unicamente por mar, a través do porto de Caleta de Sebo, que comunica La Graciosa coa localidade lanzaroteña de Órzola, no concello de Haría. Tamén posúe un heliporto situado moi preto de Caleta de Sebo.

Festas

No referente aos festexos populares que se celebran na illa destaca a Festa da Virxe do Carme tamén chamada Virxe do Mar, patroa de La Graciosa. A festa celébrase na Igrexa da nosa Señora do Carme que é igrexa parroquial de Caleta de Sebo, a capital da illa. Nesta festa destaca a embarcación da Virxe que se celebra ao redor do 16 de xullo.

Panorama

Vista de La Graciosa con Caleta de Sebo en primeiro termo. Ao fondo Montaña Clara e Alegranza.