Pong
Pong é un videoxogo arcade de deportes baseado no tenis de mesa, con gráficos bidimensionais sinxelos. Foi fabricado por Atari e lanzado orixinalmente o 29 de novembro de 1972. É un dos primeiros videoxogos de arcade; foi creado por Allan Alcorn como un exercicio de adestramento que lle encargou o cofundador de Atari Nolan Bushnell, mais Bushnell e o cofundador de Atari Ted Dabney quedaron sorprendidos pola calidade do traballo de Alcorn e decidiron fabricar o xogo. Bushnell baseou o concepto do xogo nun xogo electrónico de ping-pong incluído na Magnavox Odyssey, a primeira consola de videoxogos doméstica. En resposta, Magnavox demandou máis tarde a Atari por infracción de patentes.
Pong foi o primeiro videoxogo con éxito comercial,[1] e axudou, xunto co Magnavox Odyssey, a establecer a industria dos videoxogos. Pouco despois do seu lanzamento, varias compañías comezaron a producir xogos que imitaban este. Finalmente, os competidores de Atari lanzaron novos tipos de videoxogos que se desviaban do formato orixinal de Pong en distintos graos, e isto, á súa vez, levou a Atari a animar o seu persoal a ir máis aló de Pong e producir eles mesmos xogos máis innovadores.
Atari lanzou varias secuelas de Pong que se basean no xogo do orixinal engadindo novas funcións. Durante a tempada de Nadal de 1975, Atari lanzou unha versión doméstica de Pong exclusivamente a través das tendas Sears. A versión doméstica tamén foi un éxito comercial e levou a numerosos clons. O xogo foi reeditado en numerosas plataformas domésticas e portátiles despois do seu lanzamento. Pong forma parte da colección permanente do Instituto Smithsoniano debido ao seu impacto cultural.
Mecánica do xogo
editar
Pong é un xogo deportivo bidimensional que simula unha partida de tenis de mesa. O xogador controla un pau movéndoo verticalmente polo lado esquerdo ou dereito da pantalla. Pode competir contra outro xogador que controla un segundo pau do lado contrario. Os xogadores usan os paus para golpear unha pelota adiante e atrás. O obxectivo é que cada xogador chegue aos once puntos antes que o rival; os puntos gañan cando un non lle devolve a pelota ao outro.[2][3][4]
Notas
editar- ↑ "Atari PONG". The Centre for Computing History. Consultado o 17 de febreiro de 2024.
- ↑ "Pong". Killer List of Videogames. Consultado o 22 de outubro de 2008.
- ↑ Sellers, John (agosto de 2001). "Pong". Arcade Fever: The Fan's Guide to The Golden Age of Video Games. Running Press. pp. 16–17. ISBN 0-7624-0937-1.
- ↑ Kent, Steven (2001). "And Then There Was Pong". Ultimate History of Video Games. Three Rivers Press. pp. 40–43. ISBN 0-7615-3643-4.
Véxase tamén
editarWikimedia Commons ten máis contidos multimedia na categoría: Pong  |
Bibliografía
editar- Cohen, Scott (1984). Zap! The Rise and Fall of Atari. McGraw-Hill. ISBN 978-0-07-011543-9.
- Herman, Leonard (1997). Phoenix: The Fall & Rise of Videogames. Rolenta Press. ISBN 978-0-9643848-2-8.
- Kline, Stephen; Dyer-Witheford, Nick; De Peuter, Greig (2003). Digital Play: The interaction of Technology, Culture and Marketing. McGill-Queen's Press. ISBN 978-0-7735-2591-7.
- Lowood, H. (2009). "Videogames in Computer Space: The Complex History of Pong". IEEE Annals of the History of Computing 31 (3): 5–19. doi:10.1109/MAHC.2009.53. Parámetro descoñecido
|s2cid=ignorado (Axuda)
Ligazóns externas
editar- Pong-story.com, páxina web sobre Pong e as súas orixes
- The Atari Museum
- Pong Flyer
