Presidente de Irán

O Presidente de Irán (ریاست جمهوری اسلامی ایران) é o xefe de goberno da República Islámica de Irán. O Presidente é o máis elevado representante do estado popularmente elixido en Irán, malia que responde ante o Líder Supremo de Irán, que realiza as funcións de xefe de estado. O capítulo IX da Constitución da República Islámica de Irán establece as cualificacións para os candidatos presidenciais e os procedementos para a elección, así como os seus poderes e responsabilidades. Entre eles inclúense a sinatura de tratados e outros acordos con estados estranxeiros e organizacións internacionais, a administración do plan nacional, os orzamentos, os asuntos de emprego, e o nomeamentos de ministros baixo a aprobación do Parlamento.

Brasón de Irán.

Ó contrario que as figuras executivas doutros estados, o Presidente de Irán non exerce control sobre a política exterior, as forzas armadas ou a política nuclear, xa que son controlados polo Líder Supremo.

O Presidente de Irán é elixido por un período de catro anos por voto directo do pobo, e non pode servir no cargo por máis de dúas lexislaturas consecutivas, ou máis de 8 anos.

O actual Presidente de Irán é Ebrahim Raisi, que asumiu o cargo o 3 de agosto de 2021, despois das eleccións presidenciais dese mesmo ano. Sucedeu a Hassan Rouhani, que serviu 8 anos, de 2013 a 2021.

Presidentes de Irán

Nome	Imaxe	Inicio do mandato	Fin do mandato
Abdolhassan Banisadr		4 de febreiro de 1980	22 de xuño de 1981
Mohammad Ali Rajai		2 de agosto de 1981	30 de agosto de 1981
Ali Khamenei		13 de outubro de 1981	3 de agosto de 1989
Akbar Hashemi Rafsanjani		3 de agosto de 1989	2 de agosto de 1997
Mohammad Khatami		2 de agosto de 1997	2 de agosto de 2005
Mahmoud Ahmadinejad		3 de agosto de 2005	2 de agosto de 2013
Hassan Rouhani		3 de agosto de 2013	3 de agosto de 2021
Ebrahim Raisi		3 de agosto de 2021	presente

Véxase tamén

• Líder Supremo de Irán