Jahoda

Jahoda je z jeničkeho płódnika nastaty zawěracy płód, při kotrymž płodowa sćěna (perikarp) hišće při zrałosći je brěčkata abo zmjeńša mjasna. Jahoda je často kulowata a sylnje barbjena. Zwjetša wobsahuje wjele symjenjow.

Čerwjena janska jahodka (Ribes rubrum) je na rozdźěl wot truskalcy prawa jahoda

Jeli je zwonkowna woršta twjerda, kaž pola banjowcow abo kórkow, rěči so wo pancerowej jahodźe (němsce Panzerbeere). Jeli wobsedźi kćenje wjacore płódniki, wot kotrychž kóždy jahodowy płód wutwori, nastanje kompleksna jahoda.

Jahody hraja rólu za wariaciju zežiwjenja a su wažne jako dodawar witaminow, mineralow, nitkow a rostlinskich barbiznow (flavonoidy).

K jahodam liča:

• janska jahodka
• kosmačka
• holanska jahodka
• brusnica
• winowa jahoda
• banana
• datla
• banja (kirbs) inkl. cukini
• melona
• kórka
• płody wjele wrónidłowych rostlinow (paprika, tomata, tamarilo, běrnowa jahodka, oberžina, čorne wrónidło, hórkosłódke wrónidło)
• kaki
• kiwi
• guawa
• papaja
• granatowe jabłuko
• awokado
• citrusowe płody (citrona, oranža, limeta)
• kakawowy płód
• shea-worjech
• marakuja a druhe ćerpjenkowe płody

Z botaniskeho wida žane jahody njejsu:

• truskalca (je kompleksny worjechowy płód)
• malena a ćernjowka (stej kompleksne póčkate płody)
• bozanki (su póčkate płody)
• wjerjebinki (su jabłukowe płody)
• jałorcowe jahodki (su hable)