Era commun
Le era commun (abbreviate in EC, con su contrario ante era commun, aEC), cognite anque como le era vulgar (EV) o era «anno Domini», es le era le plus utilisate in le mundo, secundo le qual le anno actual es 2024. Le prime anno de iste era esseva seligite per Dionysio Exiguo pro representar le incarnation de Jesus Christo; iste evento deberea totevia haber advenite plure annos antea, secundo multe commentatores biblic. Il ha nulle anno 0 in iste computation; le anno ante 1 es simplemente le anno 1 ante le Era Commun. Datationes anno Domini deveniva plus commun post lor utilisation per Beda le Venerabile.
In anglese, le utilisation del notationes «CE» (pro Common Era) o «AD», e del correspondente «BCE» (before the Common Era) o «BC» (before Christ), es subjecte a polemicas. Alcunes utilisa le notation «CE» pro evitar un referentia christologic,[1] alteres precisemente como «un rememoration del preeminentia de Christo e Su evangelio in le historia del mundo».[2] In altere linguas, iste controversia non existe. In francese, polonese, hungaro, inter alia, on se servi currentemente de locutiones equivalente a «de nostre era» e «ante nostre era». Un uso analogic in germano (unserer Zeitrechnung e vor unserer Zeitrechnung) es politicamente contestate.
Le abbreviation EC pro «era commun» pote equalmente esser explicate como «era christian» o «era currente».
Referentias
modificar- ↑ Pro exemplo, judeos anglophone evita sovente le notationes AD e BC (e isto desde longe tempore). Jewish Calendar: Numbering of Jewish Years. Jewish Virtual Library. Recuperate le 2 de septembre 2007. (anglese)
- ↑ On Retaining The Traditional Method Of Calendar Dating (B.C./A.D.). Southern Baptist Convention (junio 2000). Archivo del original create le 2011-04-22. Recuperate le 8 de maio 2010. “[...] a reminder of the preeminence of Christ and His gospel in world history [...].” (anglese)