Intersectionalitate

Le intersectionalitate, theoria intersectional o feminismo intersectional es le studio del interaction de multe formas de discrimination al nivellos individual, interpersonal, e social. Nominate in 1989 per le erudita juridic Kimberlé Williams Crenshaw, le theoria stude le identitates socialmente opprimite que occurre insimul e le systemas connexe de oppression, domination e discrimination.

Le theoria intersectional identifica e examina le interaction, a nivellos multiple e frequentemente simultanee, de varie categorias biologic, social e cultural, como genere, racia, classe, capacitate, orientation sexual, religion, caste, etate, nationalitate, e altere axes sectari de identitate. Le theoria propone que on considera cata elemento o tracto de un persona como inseparabilemente ligate a tote le altere elementos pro comprender completemente su experientia. Iste quadro pote esser usate pro comprender le natura multidimensional del injustitia systemic e inequalitate social. Le intersectionalitate mantene que le conceptos classic de oppression social, como racismo, sexismo, classismo, capacitismo, homophobia, transphobia, xenophobia, e odio basate super credentia non age independentemente. In vice, iste formas de oppression interage, creante un systema de oppression que reflecte le "intersection" de multiple formas de discrimination.

Ben que le theoria era nominate in 1989, on frequentemente applica le termino intersectionalitate retroactivemente a alicun manieras de pensamento feminista o protofeminista ante alora. Per exemplo, jam in 1851 Sojourner Truth pronunciava le oration "Ain't I A Woman?" ("Non es io un femina?"), que criticava le concentration del movimento pro le liberation de feminas circa le feminas blanc.