Mediteranea klimato

Mediteranea klimato esas klimato kun sika someri e moderema e pluvoza vintri. Ca klimato recevas la nomo di Mediteranea baseno, regiono en qua ol esas la tipala klimato. Mediteranea zoni ordinare jacas inter la latitudi 30° e 45°, norde e sude de Equatoro.

Regioni kun mediteranea klimati, Csa e Csb

Arbusti che insuleto Peñón de Alhucemas.

La vejetantaro en regioni di Mediteranea klimato esas busharo nomizita maquis en Europa, chaparral en Nord-Amerika, fynbos en Sudafrika, mallee en Australia, e matorral en Chili. En ca regioni ordinare kultivesas vitoberi, frumento ed olivieri. Multa historiala urbi che Mediteranea baseno jacas en regioni kun Mediteranea klimato, inkluzite Aljer, Athina, Barcelona, Beirut, Kazablanka, İzmir, Ierusalem, Lisboa, Marseille, Monako, Napoli, Roma, Tunis, Valencia, e Valletta. Altra granda urbi kun Mediteranea klimato exter Mediteranea baseno esas Adelaide, Kapstadt, Dushanbe, Los Angeles, Perth, Porto, San Diego, San Francisco, Santiago, Tashkent e Victoria.