Bayo Guanabara
La bayo Guanabara esas naturala bayo en la stato Rio de Janeiro, Brazilia. Ol jacas inter urbi Rio de Janeiro weste, Duque de Caxias nord-weste, Magé norde, Guapimirim ed Itaboraí nord-este, e São Gonçalo e Niterói este.
Ol deskovresis ye la 1ma di januaro 1502 da Portugalano Gaspar de Lemos, qua ne exploris ol. La bayo recevis la nomo Rio de Janeiro ("rivero di januaro") nam Portugalani konfundis ol kun la boko di larja fluvio. Indijeni nomizis la regiono Iguaá-Mbara (iguaá = marala stretajo, mbará = maro), origino di la nuna nomo.
La tota surfaco di la bayo esas cirkume 412 km². Lua maxima larjeso esas 28 km e la minima larjeso esas 1,6 km (1600 metri). La longeso maxima esas 31 km, del eniro addope. La mezavalora profundeso di la bayo esas 3 metri addope, 8,3 metri proxim Ponto Rio-Niterói e 17 metri an lua eniro. La vejetantaro dope de la bayo konsistas ek per manglieri.
La portuo di Rio de Janeiro, un ek la maxim importanta portui de Brazilia, jacas interne ol. Sur insulo Governador, la maxim granda insulo en la bayo, jacas l'Internaciona Aeroportuo di Rio de Janeiro, aeroportuo Tom Jobim, anke konocata kom aeroportuo Galeão.
Omnadie, katamarani e hidrofolii trairas la bayo, liganta placo Praça 15 en urbo Rio de Janeiro al insuli Paquetá e Governador, ed al urbo Niterói, transportanta pasajeri qui rezidas en ica regioni e laboras en la centrala quartero di Rio de Janeiro. Ponto Rio-Niterói, inaugurita en 1974 e longa de 13,8 km, ligas Rio de Janeiro a Niterói sur la bayo, e posibligas acesar chosei qui ligas Rio de Janeiro al stato Espírito Santo, a la Nord-estala regiono di Brazilia ed anke a la plaji de tale nomizita Região dos Lagos.