Open University
The Open University (OU) esas publika universitato en Britania.
Ol esas resercho-universitato e la maxim granda universitato en Britania segun nombro de studenti.
La majoritato de la studenti dil OU esas en Britania e precipue studias heme; multa kursi (por studenti e gradiziti) esas anke studiebla de omnaloke en la mondo. Esas anke gradizita resercho-studenti che la 48-hektara universitato-tereno, ultre plu kam 1000 membri dil edukala e reserchala stabo e plu kam 2500 administrala, operacala e suportanta employati.
La OU establisesis en 1969 ed uzis l'originala televiziono-registrageyi ye Alexandra Palace, en norda London, recente vakigita da la BBC. La unesma studenti enrejistresis en januaro 1971.
La chefkontoro dil universitat-administro esas ye Walton Hall, Milton Keynes, komtio Buckinghamshire, ma esas administro-centri en altra parti de Britania. Ol anke havas prezenteso en altra europana landi. L'universitato grantas ordinara e gradizitala gradi, ultre ne-gradala qualifiki quala diplomi ed atesti.
Kun plu kam 174.000 studenti enrejistrita, inkluze cirkume 31% de nova studenti evanta sub 25 yari e plu kam 7400 studenti de exterlando, ol esas la maxim granda edukal institucuro en Britania (ed un ek le maxim granda en Europa) segun studento-nombri, e tale esas un ek la maxim grand universitati dil mondo. Depos olua fondeso, plu kam 2 milion studenti partoprenis olua kursi.
Ol rangizesis kom la maxim bona universitato en Anglia e Wals por studento-kontenteso en 2005, 2006 e 2012, e duesme en 2007. Ek 132 universitati e kolegi, la OU rangizesis 43ma en la Times Higher Education Table of Excellence en 2008. Ol rangizesis alte pri desegno, arto-historio, Angla, terala ed ambientala cienci, komputoro-cienco, developo-studii, sociala politiko e sociala laboro, e sociologio. Ol rangizesis 36ma nacionale e 498ma en la mondo da la Center for World University Rankings en 2018.
Historio
redaktarThe Open University fondesis da la Labour-guvernerio di prima ministro Harold Wilson. Wilson esis forta suportero, segun la viziono da Michael Young. Projeto komencis en 1965 dal eduko-ministro Jennie Lee, elqua establisis modelo por la OU kom plularjigar aceso a la maxim alta normi di eruditeso en alta eduko, ed establisis projeto-komitato qua konsistis ek vice-kanceleri, edukalisti e televizion-brodkasteri, prezidata da Sir Peter Venables.
La helpanta injenioro-direktisto dil British Broadcasting Corporation (BBC) tatempe James Redmond, obtenabis sua maxim multa qualifiki che nokto-skolo, e lua natural entuziasmo por la projeto multe helpis vinkar la teknikala desfacilesi di uzar televiziono por brodkastar doco-programi. Wilson imaginis The Open University kom granda parto de la skopo di la Labour-Partiso modernigar la britaniana socio. Il kredis ke ol helpus konstruktar plu konkurenciva ekonomio, dum anke avancigar plu granda egaleso di okaziono e "sociala movebleso". La projetita utiligo di televiziono e radio por brodkastar olua kursi anke vizis ligar The Open University kun la teknologiala revoluciono ja komencinta, qua segun Wilson helpus sua modernigo-skemi. Tamen, de-komence Lee renkontris multa skeptikeso e mem opozo de en ed exter la Labour-Partiso, inkluze seniora oficisti en la eduko-ministerio; la ministeriestro Anthony Crosland; la Fisko; ministrala kolegi, quala Richard Crossman; e komercala brodkasteri
The Open University realigesis pro la sencesa rezolvo e tenaceso di Lee dum 1965-67, konstanta suporto da Wilson, e la fakto ke previdita kusti, raportita a Lee e Wilson da Arnold Goodman, semblis tre modesta. Kande la vera, multe plu alta kusti evidenteskis, esis ja tro tarda por anular la naskanta universitato. L'universitato grantesis Rejala Charto ye 23 aprilo 1969.