Pacifismo
Pacifismo esas ensemblo di doktrini qui opozas milito e violento. La termino vortifis da Émile Arnaud (1864–1921) ed adoptesis da altra pacala aktivisti dum la 10ma kongreso pri paco, qua eventis en Glasgow, Skotia, la yaro 1901.[1] Relata termino esas Sanskrita ahimsa, signifikanta "facar nula domajo", qua esas centrala filozofio en religii kun Indiana origino, exemple Budhismo, Hinduismo e Jainismo.
La skopo di pacifisti esas solvar konflikti per diplomacal agadi, civila desobedio, boikoto kontre ti qui defensas violento, ed altra agadi qui povas preventar la komenco o durado di militi. L'ideo pri finar la militi anke aparas en l'introdukto di la charto dil Unionita Nacioni. Ol dicas: "Ni, la populi dil Unionita Nacioni, determinita a prezervar la sequanta generacioni de la plago di la milito, qua dufoye dum nia vivi produktis nekalkulebra chagreni kontre la homaro...", "..., e, kun tala skopi, praktikar toleremeso e kunvivar paceme quale bona vicini..."[2]
Referi
redaktar- ↑ The Abolition of War: the Peace Movement in Britain, 1914-1919 by Keith Robbins. University of Wales Press, 1976. ISBN 9780708306222 (p.10).
- ↑ Preamble|United Nations - URL vidita ye 20ma di novembro 2020. Idiomo: Angla.