Sintra
Sintra esas urbo e municipo en la Lisboa-regiono di Portugal, situita an la Riviera di Portugal.
La habitantaro dil municipo en 2011 esis 377.835, en areo de 319,23 km2. Sintra esas importanta turisto-destino en Portugal, famoza pro sua pitoreskeso e pro sua multa historiala palaci e kasteli. Sintra esas anke un ek la maxim richa municipi en ta lando, e konocesas pro la notinda eventi qui eventis ibe, quala la Bilderberg-Konferi e la golfo-turniro Open de Portugal.
La historiala centro dil Vila de Sintra esas famoza pro sua 19ma-yarcenta romantikista arkitekturo, historial domeni e "villa"-i, gardeni, e multa rejala palaci e kasteli, qui rezultis en klasifiko dil urbo ed olua historiala paseyo kom Mondala Heredajo-Situo di UNESCO.
Sintra simile konocesas pro sua multa gardeni e naturo-parki, inkluze la Naturo-Parko Sintra-Cascais e la Sintra-Monti. Vidindaji en Sintra inkluzas la mezepokala Castelo dos Mouros, la romantikista Nacionala Palaco da Pena, e la Nacional Palaco di Sintra de la Portugalana Renesanco.
Sintra ofte rangizesas kom un ek la maxim richa e chera municipi en e Portugal e l'Iberiana Peninsulo. Sintra esas un ek la maxim chera e dezirinda imoblo-merkati di Portugal, famoza pro sua multa historiala "villa"-i, luxala domeni, e restorerii Michelin-stelizita. Ol esas anke hemo dil un ek la maxim granda ekmigrinto-komunesi alonge la Riviera di Portugal. Sintra anke konocesas pro sua alta vivo-nivelo; ol ofte rangizesas kom un ek la maxim bona rezideyi en Portugal.