Cheek to Cheek er fyrsta samstarfsplata bandarísku söngvaranna Tony Bennett og Lady Gaga. Platan var gefin út 19. september 2014 af Columbia og Interscope Records. Þetta er fimmtugasta og áttunda stúdíóplata Bennetts og fjórða stúdíóplata Gaga.
„I Can't Give You Anything but Love“ Gefin út: 19. ágúst 2014
Bennett og Gaga hittust fyrst á Robin Hood Foundation galahátíðinni í New York-borg árið 2011 og tóku síðar upp flutning á laginu „The Lady Is a Tramp“ sem þau gáfu út sem smáskífu af plötu Bennetts Duets II. Eftir það fóru þau að ræða áætlanir um að vinna að djasstónlist saman. Cheek to Cheek inniheldur klassísk djasslög eftir vinsæl tónskáld eins og George Gershwin, Cole Porter, Jerome Kern og Irving Berlin. Innblásturinn að baki plötunni var sú að Bennett og Gaga langaði til að kynna lögin fyrir yngri kynslóð, þar sem þau töldu lögin höfða til allra.
Í janúar 2013 tilkynntu þau bæði plötuna og upptökur hófust eftir að Gaga jafnaði sig eftir mjaðmaaðgerð. Platan var tekin upp í New York-borg, þar sem Bennett og Gaga sungu ásamt undirspili lifandi hljómsveitar og djasstónlistarmönnum sem tengdust þeim báðum. Gaga vék frá fyrri samtímapoppplötum sínum þar sem hún vildi í staðinn búa til djassplötu.
Útgáfudegi plötunnar var frestað mörgum sinnum og lokadagsetiningin var tilkynnt af Bennett og Gaga í The Today Show. Lagalistinn og plötukápan voru gefin út eftir það, þar á meðal lagalistar fyrir margar aðrar útgáfur af plötunni. Þau kynntu Cheek to Cheek með mörgum sýningum í og í kringum New York, þætti á Home Shopping Network (HSN) sem sýnir frá upptöku plötunnar, og sjónvarpstónleikum undir yfirskriftinni Tony Bennett og Lady Gaga: Cheek to Cheek Live! sem var sýnd á PBS í október 2014. Smáskífurnar „Anything Goes“ og „I Can't Give You Anything but Love“ komu út áður en platan var gefin út og þær komust báðar í fyrsta sæti á Billboard Jazz Digital Songs vinsældarlistanum í Bandaríkjunum.
Cheek to Cheek fékk almennt jákvæða dóma við útgáfu, þar sem tónlistargagnrýnendur lofuðu hversu vel raddir Bennetts og Gaga hljómuðu saman. Á 57. Grammy-verðlaunahátíðinni hlaut platan verðlaun fyrir Best Traditional Pop Vocal Album. Cheek to Cheek fór beint í efsta sæti bandaríska Billboard 200 vinsældarlistans með 131.000 eintök seld í fyrstu vikunni samkvæmt Nielsen SoundScan, og hefur síðan þá selst í 773.000 eintökum í Bandaríkjunum. Platan varð önnur plata Bennetts, og þriðja plata Gaga í röð, til að komast í efsta sæti vinsældarlistans í Bandaríkjunum. Með því varð Gaga fyrsta tónlistarkonan til að eiga þrjár plötur í efsta sæti á vinsældarlista á 2. áratugi 21. aldar í Bandaríkjunum, en Bennett framlegndi metið sitt sem elsti tónlistamaðurinn til að eiga plötu sem kemst í fyrsta sæti vinsældarlistans. Platan komst á topp tíu í Ástralíu, Kanada, Grikklandi, Ítalíu, Japan og Bretlandi. Önnur samstarfsplata tvíeykisins, Love for Sale, kom út 30. september 2021.
