David Bowie

David Bowie (f. David Robert Jones; 8. janúar 1947 – 10. janúar 2016) var breskur tónlistarmaður og lagahöfundur. Hann starfaði við tónlist í tæpa fimm áratugi. Fyrsta breiðskífan hans David Bowie kom út árið 1967 og sú síðasta Blackstar á dánarári hans, 2016.

David Bowie
Bowie árið 2002
Fæddur	David Robert Jones 8. janúar 1947(1947-01-08) London, England
Dáinn	10. janúar 2016 (69 ára) New York City, BNA
Störf	Söngvari lagahöfundur tónlistarmaður leikari
Ár virkur	1962–2016
Maki	Angie Barnett (g. 1970; sk. 1980) Iman (g. 1992)
Börn	2
Tónlistarferill
Stefnur	Rokk glysrokk popp raf
Hljóðfæri	Rödd gítar hljómborð saxófónn munnharpa
Útgefandi	ISO RCA Virgin EMI Columbia Deram Mercury BMG Pye Vocalion Parlophone Ryko
Áður meðlimur í	The Konrads The King Bees The Manish Boys The Lower Third The Riot Squad Hype Arnold Corns Tin Machine
Vefsíða	davidbowie.com

David Bowie á tónleikunum Rock am Ring árið 1987.

David Bowie (1967).

David Bowie of kona hans Iman á frumsýningu myndarinnar Moon (sem sonur hans tók þátt í að gera) árið 2009.

Bowie var áhrifamikill á þróun rokk og popptónlistar og hafði víðtæk áhrif á aðrar kynslóðir tónlistarmanna. David Bowie vildi ekki binda sig við eina stefnu tónlistar og gaf meðal annar út skífur undir áhrifum sýrurokks (psychedelic), glamrokks, raftónlistar, dansvænnar popptónlistar og fleiri tónlistarstefna. Hann hafði víðtæk áhrif á þróun glamrokks með útgáfu The Rise And Fall of Ziggy Stardust and the Spiders from Mars og þróun raftónlistar í samstarfi sínu við Brian Eno með Berlínar-þríleiknum svokallaða sem samanstóð af Low, Heroes og The Lodger. Aðrar frægar breiðskífur eftir hann eru meðal annar Hunky Dory, Scary Monsters (and Super Creeps) sem inniheldur hið vinsæla lag „Ashes to Ashes“, „Young Americans“ og „Let's Dance“.

Fyrstu ár

David Bowie ólst upp í hverfinu Brixton í suðurhluta London. Frá unga aldri hafði hann mikinn áhuga á tónlist og byrjaði að læra á saxófón þegar hann var 13 ára. Bowie varð fyrir miklum áhrifum frá eldri bróður sínum Terry sem kynnti hann fyrir heimi tónlistarinnar. Eftir að hafa hlustað á lagið Tutti Frutti með Chuck Berry sagði Bowie seinna: „I had heard God.“ Eitt sinn lenti David Bowie í slag með vini sínum og hlaut áverka á vinstra augað sitt. Eftir margar aðgerðir var ljóst að skaðinn myndi aldrei hverfa að fullu og var augasteinn hans varanlega fastur í útvíkkaðri stöðu.

Skrefin í átt að frægð

Þar sem nafn hans er fremur algengt og þá sérstaklega til að vera ekki ruglað saman við Davy Jones í hljómsveitinni The Monkees tók hann þá ákvörðun að taka upp listamannsnafn. Hann valdi eftirnafnið Bowie eftir Alamo-hetjunni Jim Bowie og hans fræga Bowie Knife.

David Bowie vakti fyrst athygli á sér haustið 1969 þegar hann gaf út smáskífuna „Space Oddity“, epískt rokklag sem fjallar um ævintýri Toms majors í geimnum. Hann gaf svo út skífurnar The Man Who Sold The World 1970 sem var undir áhrifum metalrokks og popp/rokk skífuna Hunky Dory 1971. Þó að Hunky Dory hafi ekki vakið víðtæka athygli er hún oft talin með bestu skífum Bowie en á henni eru meðal annars hin vinsælu lög „Changes“ og „Life on Mars“. Árið 1972 gaf hann út The Rise and Fall of Ziggy Stardust and the Spiders from Mars, sem hann tók upp ásamt hljómsveit sinni The Spiders From Mars. Sú plata vakti mikla athygli í Bretlandi. Auk þess vakti sviðsframkoma hans, klæðaburður og andlitsmálning líka mikla athygli.

Bowie hélt tónleika í Laugardalshöll árið 1996. Tónleikarnir voru hluti af Listahátíð.

Einkalíf

Bowie var giftur Angie Barnett frá 1970–1980 og eignuðust þau soninn Duncan (áður kallaður Zowie) sem hefur gert kvikmyndir. Þau skildu. Árið 1992 giftist hann síðan fyrirsætunni Iman Abdulmajid sem er af sómölskum ættum og eignaðist með henni dóttur, Alexandria Zahra Jones. Bowie lýsti því yfir í viðtali við Melody Maker árið 1972 að hann væri tvíkynhneigður.

Andlát

Bowie lést 10. janúar 2016, tveimur dögum eftir útgáfu plötu sinnar Blackstar og sextugasta og níunda afmælisdegi sínum. Hann lést úr lifrarkrabbameini á heimili sínu í New York en hann hafði verið greindur með sjúkdóminn átján mánuðum áður.

Breiðskífur

• David Bowie (1967)
• David Bowie (1969)
• The Man Who Sold the World (1970)
• Hunky Dory (1971)
• The Rise and Fall of Ziggy Stardust and the Spiders from Mars (1972)
• Aladdin Sane (1973)
• Pin Ups (1973)
• Diamond Dogs (1974)
• Young Americans (1975)
• Station to Station (1976)
• Low (1977)
• "Heroes" (1977)
• Lodger (1979)
• Scary Monsters (and Super Creeps) (1980)
• Let's Dance (1983)
• Tonight (1984)
• Never Let Me Down (1987)
• Black Tie White Noise (1993)
• The Buddha of Suburbia (1993)
• Outside (1995)
• Earthling (1997)
• Hours (1999)
• Heathen (2002)
• Reality (2003)
• The Next Day (2013)
• Blackstar (2016)