Antifa

Antifa eða ANTIFA er bandarísk öfgahreyfing vinstrisinnaðra aðgerðarsinna sem berjast gegn fasisma. Hreyfingin samanstendur af sjálfstæðum hópum aðgerðarsinna sem stefna að því að ná fram markmiðum í stjórnmálum með beinum aðgerðum fremur en gegnum hefðbundnar umbótaleiðir. Aðgerðasinnar nota ýmis konar mótmælaaðferðir svo sem starfrænar aðgerðir, eignaspjöll og líkamlega valdbeitingu og ofsóknir gagnvart þeim sem eru taldir fasistar, rasistar eða öfga-hægrimenn. Félagar sem taka þátt í Antifa eru flestir andstæðingar kapítalisma og hallir undir ýmis konar hugmyndafræði svo sem anarkisma, maxisma, sósíalisma og jafnaðarstefnu.

Antifa-límmiði á bandarísku umferðarskilti.

Antifa eru ekki eiginleg samtök heldur regnhlífarhreyfing án sameiginlegrar forystu sem telur til sín margvíslega hópa og einstaklinga. Hreyfingin er aðeins lauslega tengd og lýtur engri sameiginlegri forystu né beinu samstæðu skipulagi. Samfélagshópar sem kenna sig við Antifa deila hins vegar með sér „úrræðum og upplýsingum um aðgerðir öfgahægrisinna yfir fylkis- og ríkislandamæri í gegnum lausleg tengslanet og óformleg trausts- og samstöðusambönd“. Aðgerðasinnar hafa gjarnan skipulagt viðburði undir formerkjum Antifa á samfélagsmiðlum og vefsíðum. Sumir aðgerðasinnar hafa þróað sérstök tengslanet eða dulmálsskilaboð eins og á skilaboðaþjónustunni Signal. Chauncey Devega, blaðamaður á fréttasíðunni Salon, lýsti Antifa sem „skipulagsaðferð“ fremur en sem hópi fólks. Antifa-hreyfingin hefur vaxið verulega frá því eftir forsetakosningarnar í Bandaríkjunum 2016. Í ágúst árið 2017 voru um 200 hópar til sem kenna sig við Antifa.

Antifa hefur verið kennt við ofbeldisfull mótmæli þar sem hægrisinnuðum einstaklingum er boðið að tala og þær aðgerðir hafa ollið því að Antifa sé sakað um notkun á fasískum aðferðum til að þagga niður í pólítískum andstæðingum sínum. Þann 29. júní 2019 voru meðlimir Antifa ásakaðir um að ráðast á þekktan blaðamann fyrir að fjalla um Antifa á neikvæðan hátt með því að kasta í hann mjólkurhristingi.

Ýmsar órökstuddar samsæriskenningar hafa orðið til um Antifa-hreyfinguna, meðal annars um að hún hafi átt sök á villieldum í Kaliforníu árið 2020 og að hún hafi borið sök á skemmdarverkum og ránum sem framin voru í George Floyd-mótmælunum árið 2020. Íhaldsmenn og hægrimenn í Bandaríkjunum hafa jafnframt margsinnis sakað meðlimi Antifa ranglega um að standa á bak við ofbeldisverk sem í raun voru framin af öfgahægrimönnum. Meðal annars var því haldið fram að Antifa hafi staðið á bak við manndráp á mótmælum hægrisinnaðra öfgahópa í Charlottesville árið 2017 sem í raun var framið af nýnasískum stuðningsmanni Donalds Trump Bandaríkjaforseta, auk þess sem haldið var fram að dulbúnir meðlimir Antifa hefðu staðið á bak við árás á Bandaríkjaþing árið 2021 þrátt fyrir að ótvírætt sé að sú árás hafi verið framin af hægrisinnuðum stuðningsmönnum Trumps.

Heimild

• Grein um Antifa á ensku Wikipedia.

Tilvísanir