Masóvía
Masóvía er sögulegt hérað staðsett þar sem nú er norðausturhluti Póllands. Héraðið skiptist í þrjár sýslur með höfuðstaðina Varsjá, Płock og Rawa Mazowiecka og er að stærstum hluta (en þó ekki öllu leyti) innan núverandi Masóvíuhéraðs. Þetta hérað var til frá miðöldum fram að skiptingum Póllands undir lok 18. aldar. Upphaflega var Płock aðalborg héraðsins en á árnýöld varð Varsjá mikilvægari. Á 12. öld varð Masóvía hertogadæmi Piastættar og varð ekki hluti af löndum pólsku krúnunnar fyrr en á 15. og 16. öld.
