Okkar tímatal
Okkar tímatal, ásamt hugtökunum fyrir/eftir okkar tímatal (skammstafað f.o.t. og e.o.t.), er aðferð til að vísa til þess tímatals sem miðast við fæðingu Krists á trúhlutlausari hátt. Okkar tímatal er þannig ekki annað tímatal en það sem á uppruna sinn í Kristni heldur aðeins önnur aðferð til að vísa til ára í því tímatali. Heitin 27 f.o.t. og 27 f.Kr. eru því jafngild og vísa til sama árs.
Á ensku hefur lengi verið notast við hugtökin Common Era (skst. CE og BCE) eða Vulgar Era. Eftir Frönsku byltinguna var tekið upp á því að nota Notre ère í frönsku, sem varð unserer Zeitrechnung í þýsku. Þaðan er íslenska hugtakið komið. „Fyrir okkar tímatal“ hefur verið notað lengi í íslensku en „eftir okkar tímatal“ og skammstafanirnar e.o.t. og f.o.t. tóku fyrst að sjást undir lok 20. aldar.
