Svíastríðin

Svíastríðin voru styrjaldir sem áttu sér stað milli Danmerkur og Svíþjóðar frá upplausn Kalmarsambandsins 1523 til loka Napóleonsstyrjaldanna 1814. Helsta deiluefni landanna voru yfirráð Danmerkur yfir Skáni og skipaleiðum í Eyrarsundi. Í byrjun naut Danmörk mikilla yfirburða en þegar stórveldistími Svíþjóðar hófst snerist taflið við. Eftir landvinninga á evrópska meginlandinu í Þrjátíu ára stríðinu gátu Svíar ráðist á Danmörku bæði úr suðri og austri. Þeir lögðu einnig undir sig lönd Dana í Eystrasalti: Gotland og Eysýslu og að lokum Skán. Þá lögðu þeir undir sig lönd í Noregi: Jämtland, Härjedalen, Bohuslän, Borgundarhólm og Þrándheim. Margar þessara styrjalda voru hluti af stærri evrópskum styrjöldum þar sem Danir og Svíar gerðu bandalög við andstæðar fylkingar.

Danir leggja virkið Älvsborg (Árborg) undir sig 1563

Núverandi landamæri Danmerkur, Svíþjóðar og Noregs eru að stórum hluta mörkuð af niðurstöðum þessara styrjalda.

	Heiti	Ár	Upphafsaðili	Sigurvegari	Friðarsamningar	Niðurstaða
	Norræna sjö ára stríðið	1563-1570	Danmörk	Danmörk	Friðarsamningar í Stettin	Svíþjóð greiddi 150.000 dali í lausnargjald fyrir Älvsborg
	Kalmarófriðurinn	1611-1613	Danmörk	Danmörk	Friðarsamningar í Knærød	Svíþjóð greiddi milljón ríkisdali í lausnargjald fyrir Älvsborg
	Torstensonófriðurinn (Stríð Horns) - hluti af Þrjátíu ára stríðinu	1643-1645	Svíþjóð	Svíþjóð	Friðarsamningar í Brømsebro	Svíþjóð fékk Jämtland, Härjedalen, Gotland og Eysýslu auk Hallands í 30 ár. Svíar fengu aukin tollfríðindi í Eystrasalti.
	Fyrra Karls-Gústafsstríðið	1657-1658	Danmörk	Svíþjóð	Hróarskeldufriðurinn	Svíþjóð fékk Skán, Blekinge, Halland, Borgundarhólm, Bohuslän og Þrándheim.
	Síðara Karls-Gústafsstríðið	1658-1660	Svíþjóð	Danmörk	Kaupmannahafnarfriðurinn	Danmörk fékk Þrándheim og Borgundarhólm aftur.
	Skánska stríðið	1675-1679	Danmörk	Hvorugt	Friðurinn í Lundi	Engir landvinningar
	Hluti af Norðurlandaófriðnum mikla	1700	Danmörk með árás á bandamenn Svía í Holsten-Gottorp	Svíþjóð	Traventhal-friðurinn	Danmörk neyddist til að segja sig úr árásarbandalaginu gegn Svíþjóð
	Hluti af Norðurlandaófriðnum mikla	1709-1720	Danmörk	Danmörk	Friðriksborgarfriðurinn	Svíar misstu tollfríðindi í Eyrarsundi, greiddu Danmörku 600.000 ríkisdali og neyddust til að hætta stuðningi við Holsten-Gottorp
	Títuberjastríðið	1788-1789	Svíþjóð með árás á bandamenn Dana í Rússlandi	Svíþjóð		Danmörk neyddist til að hætta vopnasendingum til Rússlands
	Stríð Danmerkur og Svíþjóðar 1808-1809 - hluti af Napóleonsstyrjöldunum og Finnlandsstríðinu	1808-1809	Danmörk studdi Frakkland og Rússland gegn Svíþjóð	Danmörk	Jönköping-friðurinn	Engir landvinningar
	Hluti af Napóleonsstyrjöldunum	1813-1814	Svíþjóð studdi bandalagið gegn Napóleoni	Svíþjóð	Kílarfriðurinn	Svíþjóð fékk Noreg í bætur fyrir Sænsku Pommern