Filipin

A̱byin Filipin (Filipino: Pilipinas; Shong: The Philippines /ˈfɪləpiːnz/), á̱ lyen ma̱ng a̱lyoot a̱gwomna̱ti ka nang Ri̱pobi̱lik Filipin wu (Filipino: Republika ng Pilipinas; Shong: Republic of the Philippines), yet a̰byin ka̱ yet sot bibyin a̱ka̱wa̱tyia̱ a̱sa̱khwot kya a̱ni, di̱ fam a̱byin A̱tak-A̱tyin A̱siya. Ka̱ shyia̱ di̱ fam jenshyung A̱gba̱ndang Kyai A̱sa̱khwot Pasi̱fi̱k wu wa, ka̱ si̱ byia̱ bibyin a̱ka̱wa̱tyia̱ a̱sa̱khwot kpa̱mkpaan ma̱ng 7,640, nang á̱ ka̱u sak susot tsat ca̱caat ma̱ng lili wun hu kyiak neet a̱za naat a̱tak: Luzon, Visa̱yat, ma̱ng Mi̱nda̱nawo. A̱byin Filipin ka byia̱ a̱gi̱gak ma̱ng Kyai A̱sa̱khwot Caina A̱tak hu di̱ fam jenshyung hu, Kyai A̱sa̱khwot Filipin hu di̱ fam a̱tyin hu, ma̱ng Kyai A̱sa̱khwot Selebet hu di̱ fam a̱tak-jenshyung hu, a̱wot ka̱ si̱ byia̱ a̱gi̱gak a̱sa̱khwot ma̱ng bibyin Taiwan di̱ fam a̱za hu, Ja̱pan di̱ fam a̱za-a̱tyin hu, Pa̱la̱u di̱ fam a̱tyin hu ma̱ng a̱tak-a̱tyin, Ndonisiya di̱ fam a̱tak hu, Malesiya ma̱ng Brunei di̱ fam a̱tak-jenshyung hu, Viyetnam di̱ fam jenshyung hu, ma̱ng Caina di̱ fam a̱za-jenshyung hu. A̱byin Filipin ka kup shi kyai a̱byin kilomita a̱ma̱ntanaai 300,000 (met a̱ma̱ntanaai 120,000) a̱wot, ma̱ a̱lyia̱ 2020, ka̱ byia̱ shi á̱niet kpa̱mkpaan ma̱ng miliyon 109, ka̱ si̱ yet a̱byin 12 ka̱ lan byia̱ á̱niet mi̱ swanta hu a̱ni. Ka̱ yet a̱byin nnwap ma̱ a̱di̱di̱t kya, ma̱ng nnwap ma̱ng taada nvwuom na̱ kaai a̱mgba̱m bibyin a̱ka̱wa̱tyia̱ a̱sa̱khwot nka hu. A̱keang Manila kya yet a̱keangtung nka ka, a̱wot Quezon City kya si̱ yet a̱gba̱ndang a̱keang a̱ swak ma̱ng shi a̱ni, bi̱ri̱ng ma̱ng a̱nia, a̱ka̱keang a̱feang na myian di̱ fam dandi Metro Manila hwa.

Ri̱pobi̱lik Filipin Republika ng Pilipinas (Filipino)

Ta̱si̱la a̱byin Filipin

Tuta a̱byin Filipin

A̱lama a̱byin Filipin

A̱gba̱ndang A̱timi Filipin wu A̱gba̱ndang A̱timi Filipin wu