Peter Lanyon

George Peter Lanyon (8 Hwevrer 1918 – 31 Est 1964) o lymner a Gernow. Moyha aswonnys ywa rag tirwedhow gans gnasow tybel. Lanyon o onan a’n lymnoryon posekka dhe dhos dhyworth Breten wosa Nessa Bresel an Bys. Korf y oberyow yw yn-mysk an dasvreusyans moyha gwreydhek ha posek yn neb le. Warbarth ha lymnansow, Lanyon a wrug drehevyansow art, priweyth ha collage.

Peter Lanyon
Genys	8 Hwevrer 1918  Porth Ia
Mernans	31 Est 1964  Taunton
Kenedhlogeth	Ruvaneth Unys
Alma mater	Kolji Clifton
Galwesigeth	lymner, gwynaneller, priweythydh, artydh
Movyans	arnowydhieth
Fleghes	Andrew Lanyon
Eseleth	Gorsedh Kernow

Bewnans ha resegva

Genys veu Peter Lanyon yn Porth Ia yn 1918. Ev o unnik mab W H Lanyon, skeusenydh bodhesik hag ilewydh. Adhyskys veu yn Kolji Clifton, Bristol. Ev a gavas dyskansow wosa skol gans Robert Borlase Smart. Yn 1937 ev a vetyas Adrian Stokes, a gomendyas lymna ha gravya arnowydh dhodho., ow kampolla dhodho y tal dhodho mos dhe studhya yn Skol Euston Road yn-dann Victor Pasmore. Yn 1936-37 ev eth dhe Skol Lymna Pennsans. Yn 1939 ev a vetyas lymnoryon a vri kepar ha Ben Nicholson, Barbara Hepworth ha Naum Gabo a removsa dhe Borth Ia wosa dalleth Nessa Bresel an Bys. Lanyon a gavas dyskansow privedh gans Nicholson. Gnas y ober a janjyas yn tien, hag ev a dhallathas gul drehevyansow art. Ynter 1940-45 ev a servyas gans an Ayrlu Riel y’n Difeythdir West, Palestayn hag Itali.

Yn 1946 ev a dhemedhis Sheila St John Browne (1919 – 18 Du 2015). I a gavas hwegh flogh ynter 1947-57, Andrew, Jane, Matthew, Martin, Anna ha Jo.

Yn 1946 ev a dheuth ha bos esel gweythresek a Vagas Artydhyon Crypt, hag esel fondya Kowethas Artys Pennwydh yn 1948. Yn hav 1950 ev ha’y wrek a dravalyas a-derdro Itali, ow tos ha bos artydh a vri yn Bagas Artydhyon Porth Ia.

Ynter 1951-57 ev a dhyskas yn Akademi Art Karvadhon. Gelwys veu dhe gevranna taklow dhe omdhiskwedhyans Konsel Artys Breten Veur yn 1950 yn Gool Breten. Lies enor a sewyas gans omdhiskwedhyansow yn Loundres, Evrek Nowydh ha tylleryow erel. Yn Evrek Nowydh yn 1957 ev a vetyas Mark Rothko. Fest da o ganso ober Rothko, ha hemm ha bern nowydh yn gwynanellans a’n ledyas dhe lymnansow moy iger ha frynk.

Lanyon a gemmeras gwynanella avel hobi, owth usya an prevyans dhe wul lymnansow a ros golokva a’n ayr yn y lymnansow. Ev a verwis a shyndyansow wosa droglam gwynanella. Ynkleudhys yw yn korflan Eglos San Euny yn Lannanta. Yn 1961 etholys veu avel Kaderer Kowethas Artydhyon Lulyn, ha berdhys avel bardh Gorsedh Kernow. Y hanow barhdek o Marghak an Gwyns