Barbara Hepworth

Jocelyn Barbara Hepworth, Gravyor (1903–1975) o artydhes arnowedhieth.

Barbara Hepworth
Genys	10 Genver 1903  Wakefield
Mernans	20 Me 1975  Porth Ia
Kenedhlogeth	Ruvaneth Unys
Alma mater	Royal College of Art Leeds Arts University Wakefield Girls' High School
Galwesigeth	gravyer, lymner, delinyer, photographer, artydh, artydh gwelesek
Aswonnys rag	Conversations with Magic Stones, Figure Three, Elegy III, Sea Form
Gis	art tybel, public art
Movyans	Catalan modernism
Pries	John Skeaping, Ben Nicholson
Pewasow	Dame Commander of the Order of the British Empire, Commander of the Order of the British Empire
Gwiasva	https://barbarahepworth.org.uk/
Eseleth	Gorsedh Kernow

Hy men kov glas

Manylyon

Kesparow	John Skeaping (1923–1931;didhemedhys) Ben Nicholson (1938–1951;didhemedhys)
Fleghes	4

Bewnans

Kynsa rann hy bewnans

Genys yw Jocelyn Barbara Hepworth dhe’n 10ves a vis Genver 1903 yn Wakefield, Pow Evrek. Kynsa flogh Gertrude ha Herbert Hepworth o hi. Wosa an skol nessa hy a waynyas gront skoloryeth rag studhya y’n Skol Art Leeds a-dhia 1920. Ena y teuth ha bos aswonnys gans Henry Moore, neb o genys yn Pow Evrek ynwedh. Yth esa gorvynn ha kowethegeth yntredha dres lies bledhen.

Kynth o kales kavos le yn kerghynnedh art gwarthevys hwath gans an wer, Hepworth a waynyas gront skoloryeth rag studhya y’n Kolji Art Riel dhe Loundres, tyller may studhyas hi ynter 1921 ha 1924.

Dalleth hy resegva

Barbara Hepworth, Pierced Form, 1932 (alabaster gwynnrudh, distruys c. 1944)

Yn 1924 ha 1925 Hepworth a viajyas a-derdro Itali gans gravyer John Skeaping. Aga demedhyans a veu restrys dhe Florens dhe’n 13ves a vis Me 1925. Hag i yn Itali, Hepworth a dhyskas gravyans marbel gans dyskador-gravyer Giovanni Ardini. Yn 1931, wosa Hepworth dhe vos ha bos owth aswon gans lymner anpythek Ben Nicholson y trehevis kerensa yntredha; byttegyns demedhys ens i hwath. Hepworth ha Skeaping a omdhidhemedhis y’n vledhen na.

Dynyans Hepworth war-tu anpythekter ha movyansow art an tir meur yw dhe weles y’n ober hy hynsa termyn. Yn 1931 y tallathas gravya an kynsa furvow gwanys yw rann mar deythyek hy ober hi y’n kynsa le ha devnydhys wosa henna gans Moore ynwedh. Yn 1933, Hepworth a viajyas gans Nicholson dhe Bow Frynk ha godriga y’n studhleow Jean Arp, Pablo Picasso, ha Constantin Brâncuși.Y kemeras Hepworth ran y’n movyans Abstraction-Création (Anpythekter-Gwrians) yn Paris. Y’n keth bledhen hi a gesfondyas movyans art Unit One war-barth ha Nicholson, Paul Nash, Herbert Read, ha Wells Coates. Styr an movyans na o dhe gesunya Gorwirvosegeth hag anpythekter yn art an RU.

Hepworth a dhinythis tri gevel Rachel, Sarah, ha Simon yn 1934, Nicholson aga thas. Y sewenas pesya orth oberi yn-dann vaga hy fleghes. Herwydh Hepworth "Ny wra lettya artydhes na kegina na dinythi, na gwitha fleghes usi brygh rudh warnedha (na hogen mars yw tri anedha); dhe’n kontrari an bewnans rych ma a’s mag." Demedhyans Hepworth ha Nicholson a veu restrys yn mis Du 1938 dhe Hampstead wosa ev dh’omdhimedhi a’y gynsa gwreg. Rachel ha Simon a dheuth ha bos artydhyon ynwedh.

Nessa hanter hy bewnans

Trigys o Hepworth yn Kernow dres an nessa hanter hy bewnans.

Por’ Ia

Hepworth, Nicholson ha’n fleghes a omremovas dhe Gernow ha’n Nessa Bresel an Bys ow talleth yn 1939.

A-dhia 1949 bys hi dhe verwel yn 1975 trigva Hepworth o Studhleow Trewyn dhe Bor’Ia.  “Namna neppyth hudel o kavos Studhla Trewyn.” yn medh hi, “Otta ’th esa studhla, garth, lowarth may hyllys oberi a-ves ha gans spas.” Por’Ia re dhothya ha bos argel dhe lies artydh dres an vresel. Yn mis Hwevrer 1949, Hepworth ha Nicholson a gesfondyas Kowethas an Artys Pennwydh y’n diwotti Tavern an Kastel war-barth ha 17 artydh moy, Peter Lanyon ha Bernard Leach y’ga mysk.  

Tresyades skentel o Hepworth ynwedh. Wosa hy myrgh Sarah dhe vos gorrys dhe glavji yn 1944, Hepworth a dheuth ha omgowethhe gans leuvvedhek, Norman Capener y hanow, neb a ros dhedhi chons dhe vires orth dyghtyansow leuvvedhegel. Namna 80 delinyans a leuvvedhegvaow a wrug hi, ow tevnydhya krey, ynk ha pluven blomm. Dynys o Hepworth gans hevelepter a weli ynter maner oberi medhegow hag artydhyon.

Orth Biennale Venys  1950 rann a’y oberow a veu diskwedhys y’n babel an RU war-barth hag oberow Matthew Smith ha John Constable. Dew ober moy, Contrapunctal Forms ha Turning Forms, a veu diskwedhys orth Gool Breten Veur  dhe Loundres yn 1951. Y’n keth bledhen Hepworth ha Nicholson a omdhidhemedhis.  Bys y’n eur na Hepworth re ravsa kyns oll men ha prenn, mes lemmyn y tallathas oberi gans brons ha pri keffrys. Yn fenowgh y hyllys gweles hy oberow bras gwrys a vrons yn hy lowarth.

Mernans hy mab Paul

Hy flogh an kottha, Paul, a verwis dhe’n 13ves a vis Hwevrer 1953 yn Pow Tai hag ev ow soodha y’n ayrlu an RU. Yma gravyans dh’y gov, Madonna ha Flogh y hanow, y’n eglos pluw Ia.

Drefen hi dhe vos gorskwith wosa mernans hy mab Hepworth a viajyas dhe Bow Grek gans hy howethes Margaret Gardiner yn mis Est 1954.An vyaj a dhelenwis an ober a dhallathas pan dhewelis dhe Bor’Ia ha gravya prenn kales dhyworth Nigeria a’n eghen guarea.

Bri geswlasek

Kales o kowethyans Hepworth gans maynoryon y’n SU, mes wortiwedh Arthur ha Madeleine Lejwa a restras yn Evrek Nowydh an diskwedhyans a’y ober yn unnik esa hwans bras dhedhi anodho. Wosa henna y feu hi dewisys rag gwruthyl ober dhe gov Dag Hammarskjöld, nessa Skrifennyas-Ollgemmyn an Kenedhlow Unys.  

Diwettha rann hy resegva  

A –dhia 1960, wosa Hepworth dhe brena cinema-donsva dheges Palais de Danse esa a-dal a’n studhla Trewyn, yth esa spas dhedhi rag oberow bras aga myns. Ha diweth hy resegva ow nesa hi a wrug arbrovow gans mendresennegeth ynwedh.

Barbara Hepworth a verwis awos tan yn hy studhleow dhe’n 20ves a vis Me 1975 ha hi 72 bloodh.

Yn mis Est 2001 Tite Kubo a dhismygas an manga Bleach delenwys gans ober Hepworth.

Mirvaow ha leow erell mayth yw diskwedhys hy ober ynna

Yma dew withti henwys rag Hepworth ha gans kuntellow posek a’y ober. An kynsa yw Gwithti Barbara Hepworth  yn Por’Ia,  hag a via hy thre, dyghtys a-dhia 1980 gans Mirva Tate. An nessa yw an gwithti Hepworth Wakefield yn Pow Evrek, ranndir may feu genys, ygerys yn 2011.

Y hyllir mires orth oberow erell gwrys gensi y’n leow a sew:

• Birmingham Museum and Art Gallery, Pow Sows
• Glebelands, Harlow, Essex, Pow Sows (an ober Contrapuntal Forms)
• Pennskol Lerpol^, Pow Sows
• Pennskol Birmingham^, Pow Sows
• Pennskol Keresk, Campus Streatham, Pow Sows
• Pennskol Southampton, Pow Sows
• St Catherine's College, Rysoghen, Pow Sows
• Skol Ilow Pennskol Kerdydh, Kembra
• Yorkshire Sculpture Park in West Bretton, Pow Sows
• Clare College, Kergront, Pow Sows
• Churchill College, Kergront, Pow Sows
• Murray Edwards College, Kergront, Pow Sows
• Snape Maltings, Snape, Suffolk, Pow Sows
• Kenwood House, Loundres
• Yn lann Penneglos,Kerwyns, Pow Sows  
• Leeds Art Gallery, Pow Sows
• Mirva Gallery, Loundres
• Kröller-Müller Museum, Otterlo, Iseldiryow
• Pier Arts Centre, Stromness, Orkney, Alban
• Museum of New Zealand Te Papa Tongarewa dhe Wellington, Mordir Nowydh
• Lynden Sculpture Garden, Milwaukee, Wisconsin, Statys Unys
• Harrison Sculpture Garden y’n Minnesota Landscape Arboretum^, SU
• Kimbell Art Museum, Fort Worth, Texas SU
• Art Institute of Chicago, Chicago, Illinois SU
• Dallas Museum of Art, Dallas, Texas SU
• Kettle's Yard, Kergront, Pow Sows
• Mirva Ostrali Soth, Adelaide, Ostrali

Mirva

• 
  Monolith-Empyrean, 1953.
• 
  Winged Figure, 1963, war fos gwerthji John Lewis, Holles Street hag Oxford Street, Loundres.
• 
  Sphere with Inner Form, 1963, yn Gwithti Kröller-Müller, Otterlo, Yseldiroedd.
• 
  Achaean, c. 1963, St Catherine's College, Rysoghen.
• 
  Dual Form Guildhall, Porth Ia.
• 
  Single Form (Memorial) Battersea Park, Loundres.
• 
  Rock Form (Porthcurno), 1964, Franklin Parkway, Philadelphia, Pennsylvania.
• 
  Construction (Crucifixion): Homage to Mondrian, 1966, a-ves dhe Benneglos Kerwyns.
• 
  Two Forms, 1969, Porth Ia.
• 
  Four-Square (Walk Through), 1966, Churchill College, Kergront.
• 
  Corinthos 1954–55, y'n Tate, Lerpol.