Heroides

Heroides aut Epistulae heroidum liber est Ovidii carmina continens viginti et unum, quae sunt epistulae heroidum mythologicarum ab Ovidio fictae. Quattuordecim priora carmina certe Ovidio tribuuntur; quintum decimum, epistulam scilicet Sapphus Phaoni missam, Ovidium scripsisse pauci putant. Cetera sunt epistularum paria tria ita composita, ut epistula unaquaeque etiam sui responsum haberet. Hae certe aliquanto post sunt scriptae, sed utrum re vera Ovidius ille fuerit, qui scripsisset, nec ne, in controversia est. Omnia haec carmina distichis elegiacis composita sunt.

Hypsipyle Iasoni scribens. E versione Francogallica ab Octaviano de St.-Gelais scripta, 1496-1498; liber manuscriptus in biblioteca nationali Franciae invenitur.

Omnes hae epistulae materiam bene notam per libros antiquiores retractant: exempli gratia, epistula septima (Dido Aeneae) eandem fabulam narrat atque liber quartus Aeneidos.

Quia Ovidius in carmine quodam Amorum (Am. 2.18) harum epistularum meminit, scimus eas ante annum 14 a.C.n. scriptas esse, quo fere tempore Amores editi esse putantur.

Index

Epistulae sunt hae:

• Penelope Ulixi, qui bellum Troianum gerit
• Phyllis Demophoonti, Thesei filio
• Briseis Achilli, dum ipsa apud Agamemnonem moratur.
• Phaedra Hippolyto, privigno
• Oenone Paridi, qui eam reliquit et Helenam duxit
• Hypsipyle Iasoni, qui ex insula Lemno modo abiit
• Dido Aeneae, qui Carthagine modo abiit
• Hermione Oresti, a Pyrrho capta
• Deianira Herculi, aerumnas absolventi
• Ariadne Theseo, qui ex insula Naxo modo abiit
• Canace Macareo, fratri quem amat
• Medea Iasoni, qui novam feminam Creusam duxit
• Laodamia Protesilao, bello Troiano ineunte
• Hypermestra Lynceo, ea nocte ubi Hypermestra et sorores debent maritos interficere

• Sappho Phaoni, portitori Lesbiaco; hoc carminis a multis spurium habetur

• Paris Helenae et Helena Paridi
• Leander Heroni et Hero Leandro
• Acontius Cydippae et Cydippa Acontio

Imitationes

Baldericus Dolensis epistolas Paridis Helenae et vice versa novas conscripsit. Inter imitationes Ovidii Christianas Heroides Helii Eobani Hessi notissimae sunt, postea collectiones multae, e.g.

• Sacrarum Heroidum liber Claudii Espencaei (1564)
• Sacrarum Heroidum libri tres Andreae Aleni (1574)
• Heroidum epistolae Iacobi Bidermanni (1638)
• Sacrarum Heroidum epistolae Ioannis Vincartii (1640)

etc.

Bibliographia

• Bornecque, Henri, ed., et Marcel Prévost, tr. 1928 Ovide: Héroïdes. Lutetiae: Société d' édition Les Belles Lettres.
• Dörrie, Heinrich, ed. 1971 P. Ovidii Nasonis Epistulae Heroidum. Berolini–Novi Eboraci.
• Lingenberg, Wilfried, 2003 Das erste Buch der Heroidenbriefe. Echtheitskritische Untersuchungen. Paderbronnae.
• Knox, Peter E., ed. 1995 Ovid Heroides: Select Epistles. Cantabrigiae.
• Viarre, Simone, 1987 "Des poèmes d'Homère aux « Héroïdes » d'Ovide. Le récit épique et son interprétation élegiaque", Bulletin de l'Association Guillaume Budéː 2-11
• Jost Eickmeyer, Der jesuitische Heroidenbrief: Zur Christianisierung und Kontextualisierung einer antiken Gattung in der Frühen Neuzeit, Walter de Gruyter, 2012

Nexus externi

Vide Heroides apud Vicifontem.