Wladimir Michailowitsch Komarow

De Wladimir Michailowitsch Komarow (russesch: Владимир Михайлович Комаров); gebuer de 16. Mäerz 1927 zu Moskau a gestuerwen de 24. Abrëll 1967 am Oblast Orenburg, war e sowjetesche Kosmonaut an deen éischte Mënsch, dee bei enger Weltraummissioun gestuerwen ass.

Wladimir Michailowitsch Komarow
Gebuer	16. Mäerz 1927 Moskau
Gestuerwen	24. Abrëll 1967 Oblast Orenburg
Doudesursaach	Fligeraccident
Nationalitéit	UdSSR
Aktivitéit	Pilot, Astronaut, Offizéier, Ingenieur, Testpilot
Partei	Kommunistesch Partei vun der Sowjetunioun

Vun 1942 bis 1949 ass de Komarow an d'Moskauer Spezialschoul vun der Loftarméi gaangen, an uschléissend an d'Militärfligerschoul Bataisk. 1959 huet hien d'Ingenieurakademie vun der Loftarméi ofgeschloss.

1960 gouf hie fir déi éischt Kosmonautegrupp vun der Sowjetunioun ausgewielt.

Hie war mat der Walentina Jakowlewna Kiseljowa bestuet an hat mat hir zwee Kanner.

Raumflich

Woschod 1

Nodeem hien 1962 Ersatzmann fir de Pawel Popowitsch op Wostok 4 war, gouf 1964 de Fluch mat Woschod 1 seng éischt Missioun am Weltraum. Als Kommandant vu Raumschëffer hat hien de Ruffnumm „Rubin“.

Sojus 1

 Méi Informatioun doriwwer am Artikel: Sojus 1.

Den 23. Abrëll 1967 gouf d'Raumschëff Sojus 1 mam Komarow u Bord gestart. De Komarow hat wärend dem Fluch Funkgespréicher mam deemolege Premierminister Kossygin a senger Fra Walentina. Donieft huet hie Gréiss un d'sowjetescht Vollek geschéckt. No enger Rei vu Feelfunktioune vum neiaartege Raumschëff hat de Komarow de 24. Abrëll 1967 no 18 Äerdëmkreesungen d'Landumg ageleet. Leider ass de Fallschierm net opgaangen an de Komarow ass beim haarden Opschlag vu senger Kapsel gestuerwen.

Leeschtungen

Spezielles

• Éischte Fluch bei Woschod a Sojus
• Éischten am Asaz gestuerwene Kosmonaut

Éierungen an Auszeechnungen

D'Urn vum Komarow gouf an der Kremlmauer zu Moskau bäigesat.

De Komarow krut zweemol d'Auszeechnung Held vun der Sowjetunioun (19. Oktober 1964 an de 24. Abrëll 1967) an de Leninuerden“.

Den Asteroid (1836) Komarov, deen 1971 entdeckt gouf, souwéi e Krater um Äerdmound krute säin Numm, ausserdeem gouf e Kommunikatiounsschëff op den Numm Kosmonawt Wladimir Komarow gedeeft.

Kuckt och

Portal Astronomie

Um Spaweck

Commons: Wladimir Komarow – Biller, Videoen oder Audiodateien

• (ru) Planmäßig über Funk von Komarow abgegebene Grüße an das sowjetische Volk, wegen Empfangsproblemen wiederholt. (MP3; 1,1 MB)
• (en) Analys vum Sojus 1-Fluch vum Sven Grahn
• spacefacts.de: Biographie