Bolak

Bolak (')
Creada par:	Léon Bollack
Anio:	1899
Tota parlores:
Familia:	Linguas construida  lingua aidante internasional
Fonte:
State ofisial
Regulada par:
Sifras
ISO 639-1:	[1]
ISO 639-2:	[2]
ISO 639-3:	[3]
SIL:	[4]
Mapa
La bandera de bolak.
Vide ance: Lingua – Lista de linguas

Bolak es un lingua aidante internasional inventada par Léon Bollack. La nom de la lingua sinifia "un crea injeniosa" (bol = injenia, -ak = fada con, bolak = fada con injenia), e, natural, refleta ance la nom de sua creor. Bolak es ance nomida "la lingua blu", de la color de la sielo, cual covre tota umanas.

Bollack ia scrive tre libros sur sua lingua:

• La Langue Bleue Bolak: langue internationale pratique (1899)
• Abridged Grammar of the Blue Language (1900).
• Premier vocabulaire de la langue bleue Bolak (1902)

Bollack ia ave un "filosofia" per la crea de sua lingua, cual el ia nomi "La lege de oto":

• un letera, un sona
• un parola, un sinifia
• un clase de parolas, un aspeta
• un frase, un construi

Alfabeta

Bolak usa sola 19 leteras:

a b ч d e f g i k l m n o p r s t u v

Los es pronunsiada como en lfn o afi, esetante per ч (de cirilica) = [tʃ] como tx en elefen.

Spesies de parolas

La usas diversa de parolas es indicada par sua strutur:

• parolas de espresa emosial: un vocal, o du repeteda
• "parolas laborante" (no, si, ce, plu, min, etc): du vocales diferente, o du consonantes plu -u
• juntas: la presentia de la vocales i o o
• pronomes: la presentia de la vocales a o e
• nomes e numeros: un o du consonantes, un vocal, e un o du consonantes plu (ma no fini con -ч o -d)
• verbos: un nom, plu -a, -e, -i, -o final
• ajetivos: un verbo, plu -d final
• averbos: un verbo, plu -ч final

Determinantes

• an = un
• ad = de un
• al = a un
• ane = ~ alga
• ade = de alga
• ale = a alga
• lu = ~ la
• -u = -s (plural)
• u- = fema (pe kval = cavalo, ukval = cavalo fema)

Numeros

• nol = 0
• ven = 1
• dov = 2
• ter = 3
• far = 4
• kel = 5
• gab = 6
• чep = 7
• lok = 8
• nif = 9
• dis = 10
• diven = 11
• didov = 12
• dovis = 20
• teris = 30
• (ven) son = 100
• dovson = 200
• mel = 1000
• mlon = 1000000
• mlar = 1000000000

• -u = per deveni nomes o per indica la ora
• -em = ordinal
• -emu = ordinal plural
• -ip = grupos
• -om = fratos
• -olt = veses
• -erl = numero de spesies
• -am = colies

La dias de la semana e menses de la anios es creada par ajunta -tag o -mes:

• ventag = lundi
• dovtag = martedi
• tertag = mercurdi
• venmes = janero
• dovmes = febrero
• termes = marto
• etc

Pronomes

La pronomes personal:

• me = me
• te = tu (familial)
• ve = tu (cortes)
• se = el (mas)
• le = el (fema)
• чe = el (neutra)
• ne = nos
• pe = vos (familial)
• ge = vos (cortes)
• be = los (mas)
• fe = los (fema)
• de = los (neutra)

Varias de la pronomes personal:

• per la acusativa (ojeto direta): ma, ta, va, etc
• per la dativa (ojeto nondireta): ama, ata, ava, etc
• per la jenitiva/ablativa (forma de "de"): ema, eta, eva, etc
• per la vocativa: em, et, ev, etc
• per asentua: eme, ete, eve, etc
• pronomes de posese: mea, tea, vea, etc
• pronomes de posese plural: mae, tae, vae, etc

Pronomes de relata: ra (sing), re (plural)

Pronomes de demanda e esclama: ka (sing), ke (plural)

Pronomes de mostra:

• aч = el/esta/acel
• ag = esta
• af = acel
• aчe = los/estas/aceles
• age = estas
• afe = aceles

Otra pronomes:

• ab = tal
• am = la mesma
• ap = cualce
• as = serta
• at = intera
• av = otra
• sta = on
• spa = cada
• ske = multe
• kla = alga
• mre = nun
• tle = tota
• pna = no cosa

(los formi la plural par ajunta -e o par cambia -a a -e)

Pronomes jeneral nondeterminada: ea (sing), ae (plur)

Verbos

La tempos e aspetas de lov (la ama):

• infinitivas:
  • lovi = ama sempre
  • love = ama en la pasada
  • lovo = ama en la presente
  • lova = ama en la futur
• comun: presededa par sujeto
  • me lovi = me ama sempre
  • me love = me ia ama
  • me lovo = me ama
  • me lova = me va ama
  • me ulovi = me es amante
  • me ulove = me ama ja, me ia ama ja
  • me ulovo = me ia ama ja
  • me ulova = me va ama ja
• pasiva: interpone -u-:
  • me lovui = me es sempre amada
  • me lovue = me ia es amada
  • etc

Refletante: me su lovo = me ama me mesma

Comanda: presededa par un pronom vocativa (et lovo = ama!)

Sujuntiva: presededa par ku

Ipotesal: usa la forma comun

Demanda: presede la verbo con la particula du

La nega: presede la verbo con la particula nu, cual combina con otra particulas

• • knu = ce no (sujuntiva)
  • snu = se no
  • tnu = ce no?

Verbos nonpersonal: usa la pronom чe (pe, чe plovo = pluva)

Verbos aidante:

• oa = comensa
• eo = fini
• ia = vole
• ai = desira
• oe = debe
• ei = pote
• ie = frecuente
• ao = rara

Ajetivos

La plu de ajetivos fini con -ed. Pe, bon (bonia) > boned (bon)

La partisipios:

• -id = partisipio ativa, eternal
• -od = partisipio ativa, presente
• -ed = partisipio pasiva, presente
• -ad = partispio pasiva, futur (con la sinifia de posiblia o dinia)

Compara:

• aloved = la min amada
• oloved = min amada
• eloved = plu amada
• iloved = la plu amada
• uloved = amada la mesma

Esta idea es ance usada con nomes e verbos:

• alov = manca de ama
• olov = alga ama
• elov = multe ama, pasion
• ilov = tro multe ama, idolia

Averbos

Averbos fini como la ajetivos, ma con -ч (plu comun -eч) en loca de -d. Los pote es ance derivada de la partisipios:

• boneч = bon, con bonia
• loviч = amante
• loveч = con ama
• lovaч = en modo amable

Alga averbos deriva direta de nomes:

• releч = par ferovia

Averbos primitiva (nonderivada):

• geч = ier
• daч = oji
• morч = matina
• toч = pronto
• tarч = tarda
• steч = sempre
• moч = a tota locas
• maч = multe
• pliч = plu
• leч = min
• si = si
• no = no

Preposadas

La preposadas ave sinifias plu esata ca la plu de linguas european, incluinte elefen:

• di = de (composada de)
• of = de (orijina personal)
• om = de (orijina fisical)
• in = a (loca), en
• to = a (dirije)
• id = a (tempo)

Bolak ave ance un preposada multe jeneral io.

Tota preposadas de loca ave la forma vocal-consonante, e on pote ajunta -i o -u final per indica dirije:

• ib = sur, ibi = de un loca supra, ibo = a un loca supra
• ot = esta, oti = de un loca estra, oto = a un loca estra (sorti)
• ol = asta, oli = de un loca asta, olo = a un loca asta

Preposadas pote es usada ance como averbos, pe ib sinifia ambos "supra" e "a supra", e in ambos "en" e "a en".

Juntas

• it = e
• or = o
• ni = no e
• if = si
• bo = ma
• gi = donce
• ko = ce
• ob = car
• чo = car
• po = afin
• so = mesma como
• fi = an si
• fo = cuando

Ordina de parolas

La ordina de parolas es fisada:

• frase: sujeto - verbo - ojeto - completantes
• formula nomal: determinantes - nom - ajetivos
• averbos segue verbos e presede ajetivos o otra averbos
• proposas suordinada segue proposas major

Per esemplo (par Bollack mesma): Markesin beled, vae logu beled mortigo ma fri lov = Marcesa bela, tu oios bela fa ce me mori de ama.

Vocabulo

La vocabulo jeneral de bolak es "a posteriori", pd orijinante en linguas natural, xef franses e engles. Ma, como en volapük, la parolas deveni cuasi nonreconosable:

• bolv = strada (de boulevard)
• tlaf = telegraf
• stit = constitui (nom)
• flist = felisi (nom)

Bollack ia usa an jargon franses a alga veses:

• pif = nas
• paf = ebria

E alga parolas ave fontes oscur:

• lalm = universia (de "alma mater")
• plin = istoria natural (de Plinius)
• vivl = xovinisme (de "vive la...")
• vovs = fini, reali (vovs es la parola final de la disionario de bolak)

Crea de parolas:

Par ajunta -a, -e, -i, o -o a un nom, on crea la verbo, con la sinifia...

• "es" = pe, bono = es bon
• "es a la state de" o "ave", pe, fami = fami, ave famia
• "acompli la ata" = pe, beti = aposta
• "usa" = pe, bilbi = jua con un bilboquet (jua de tas e bal)
• "cria como (un animal)" = pe, dogi = abaia

Sufisas:

• -an = abitor de (Parian = Parisian)
• -in = sposa de (reksin = rena)
• -as = grandi (mesras = cotela grande, sabre)
• -et = peti (kvalet = cavaleta)
• -ist = laboror (panist = panor)
• -ost = cliente (panost = cliente de la paneria)
• -erk = comersa (birerk = comerse de bir)
• -ik = arte, siensa, fabrica (birik = la art de bir)
• -ort = loca de fabrica o vende (birort = bireria)
• -or = ator o ajente (tansor = dansor)
• -il = util o strumente (banil = banio)
• -ef = resulta de un ata (dogef = un abaia)
• -ir = deveni (krantiri = grandi, deveni grande)
• -ig = fa (krantigi = grandi, causa ce alga cosa grandi)
• -enk = comensa de un ata (dormenki = vade dormi)
• -art = un peso de (panart = un peso de pan)
• -alg = un maladia (kopvalg = un dole de testa)
• -olb = un colpa de (fotolb = colpa de pede)
• -olm = un arbor (rosolm = arbor de la rosa)
• -olv = loca de plantes (rosolv = jardin de rosas)
• -osm = colie (libosm = biblioteca)
• -ism = sistem de ideas (librism = libralisme)

Alga parolas peti servi como cuasi prefisas:

• stu = mas (stu kval = cavalo mas)
• pu = superior en un ierarcia
• чu = inferior en un ierarcia
• plu = plural (plu gon = poligon)
• tu = totalia (tu slavism = panslavisme)
• fku = contra, oposante (fku lov = odi)
• ru = repeteda
• sru = a retro
• pru = sustituida
• sku = semblante
• pnu = nonsemblante

La lingua ave an particulas per espresa gustas:

• gu = un gusta fisical (pe gu fem = un fem ci on gusta en modo fisical)
• kvu = un gusta nonfisical
• pfu = un nongusta fisical
• mu = un nongusta nonfisical

Final, on pote crea parolas par composa:

• dormukar = vagon de dormi
• vintumilv = molin de vente

Esemplos

• Se venko om sit = El ariva a la site.
• Spa lanta oe sarfi sea lant = Cada sitadan debe servi sua pais.
• Me upreko mea leg = Me ia rompe mea gama.
• Aч per lovo moч sea fant lalged = Esta padre ama multe sua enfante malada.
• Me givo aч vads asa = Me dona esta orolojia a el.
• Se spiko bolak = El parla bolak.

Nea Per (Nosa Padre)

Nea per, ev ra seri in silu,

vea nom eч santigui;

vea regn eч komi;

vea vil eч makui ib gev so in sil;

ev givo daч nea pan taged ana,

it ev solvi nae fansu ana

so ne solvo aчe re ufanso na;

it ev nu lefti na to temt,

bo ev bevri na om mal.

Fonte

• Couterat, L. e Leau, L (1903). Histoire de la Langue Universal. Paris: Librairie Hachette.