Cimri
|
| Bandera de Cimri |
|
| Loca en Europa |
|
Cimri (cimrica: Cymru /ˈkəmrɨ/ o /ˈkəmri/) es un pais cual es un parte de la Rena Unida e la isola de Britan. Lo es bordada par England a la este, la Mar Eres a la norde e ueste, e la Streta Bristol a la sude. Lo ia ave 3 063 456 abitores en 2011, e ave un area intera de 20 779 km². Lo ave plu ca 2700 cilometres de costa e es jeneral montaniosa, con sua montes la plu alta en la areas norde e sentral, incluinte Snowdon (Yr Wyddfa), sua monte la plu alta. La pais es en la zona temperada norde e ave un clima maral variante.
La identia nasional cimrica ia emerji entre la briteses celta pos la retira roman de Britan en la sentenio 5, e on regarda Cimri como un de la nasiones celta moderna. La mori de Llywelyn ap Gruffudd en 1282 ia marca la completi de la concista de Cimri par Edward 1 de England, ma Owain Glyndŵr ia restora autonomia a Cimri per un tempo corta en la temprana de la sentenio 15. Tota de Cimri ia es proprida par England e asorbeda en la sistem legal engles su la Ata de Leges en Cimri 1535–1542.
Un politica propre cimrica ia developa en la sentenio 19. Libralisme cimrica, esemplida en la temprana de la sentenio 20 par Lloyd George, ia es deslocada par la crese de sosialisme e la Partito de Labora. Sentis nasional cimrica ia crese tra la sentenio; Plaid Cymru ia es formida en 1925 e la Sosia de la Lingua Cimrica en 1962. Instituida su la Ata de Governa de Cimri 1998, la Asembla Nasional per Cimri es encargada con temas diversa de politica devoluida.
A la comensa de la Revolui Industrial, developa de la industrias mineral e metalurjial ia muta la pais de un sosia cultival a un nasion industrial. La esplota de la Campo de Carbon de Cimri Sude ia causa un crese rapida de la cuantia de abitores. Du-tris de la persones abita en Cimri sude, xef en e sirca la capital Cardiff (cimrica: Caerdydd /kaɪrdɪð/), Swansea e Newport, e en la vales prosima. Car la industrias tradisional de la pais declina o ia desapare, la economia de Cimri depende de la campo publica, industrias lejera e serval, e turisme.
An si Cimri comparti prosima sua istoria political e sosial con la resta de Britan, e la majoria vasta de la popla parla engles, la pais ia reteni un identia cultural distinguida, e es ofisial bilingual. Plu ca 560 000 parlores de la lingua cimrica abita en Cimri, e la lingua es parlada par un majoria de la popla en partes de la norde e ueste. De la tarda de la sentenio 19, Cimri ia gania sua reputa como "la pais de canta", partal par causa de la tradision de la festas eisteddfod.
A multe avenis internasional de sporte, como la Copa Mundal FIFA, la Copa Mundal de Rugbi e la Juas de Comunia, Wales ave sua propre ecipos nasional, ma a la Juas Olimpial, atletas cimrica compete como un parte de la ecipo de Britan. Rugbi es regardada como un simbol de la identia cimrica e un espresa de la consensia nasional.