Madre Tera
Madre Tera (acc "madre natur") es un nom jeneral per un personi o divini de natur, madria, fertilia, crea, e ideas simil. Spesial, la nom refere a la aspeta de natur cual foca sur la pari e nuri de vive - plantas, animales, e umanas. El es ance comun videda como la madre de multe otra dios e divas e otra esentes. Como la nom sujesta, lo es esensal identifiada con la mundo intera, la Tera se mesma. Otra espresas, estra la nomes de divas spesifada de la cultures variosa de la mundo, es la diva de tera, madre de natur, o la prinsipe fema. An si la conseta es comun, el no es universal, e alga cultures no ave un conseta o nom corespondente.
Madre Tera es multe antica. El ia es probable representada en Eurasia par la scultetas de Venus, scultetas de la eda paleolitica cual depinta un fema, tipal con senos e gluteos grande, pd un esajera de un imaje de femia. La plu de esta figures dati de la cultur gravetian (24,000 a 19,000 aec), con esemplos (pe la Venus de Hohle Fels) de 33,000 aec (la cultur aurignasian) a otras (pe la Venus de Monruz) de 9,000 aec (la cultur magdalenian). Los es algas de la obras de arte la plu vea.
Un poca min vea es la divas de tera de la cultures de Mesopotamia, pe Ki e Ninhursag. En mitolojia elinica antica, la tera es personida como Gaia, corespondente a Terra de Impero Roman, Prithvi o Bhumi de India, e Jord de Scandinavia, tipal relatada a un "Padre Sielo" en la relijio de la protoindoeuropeanes. La mitolojia egiptian antica difere: lo ave un diva de la sielo e un dio de tera.
En mitolojia elinica antica, Persefone funsiona como un diva de natur. La fia de Demetre (diva de la colie), el ia es saisida par Hades (la dio de la mor), e prendeda a la mundo suteran como sua rea. Demetre ia es tan turbada ce no cultivas pote crese, e tota umanas ta mori de fame, si Zeus no ia deveni consernada. El forsa ce Hades reenvia Persefone a sua madre, ma cuando en la mundo suteran, Persefone ia come semes de la granada, la comeda de la mor, e donce el debe spende parte de cada anio con Hades. La lamenta par Demetre per sua fia es refletada en la menses steril de inverno, e sua joia cuando sua fia reveni es refletada en la menses fertil de inverno.
Madre Tera - plu comun Ava - es ance un tema comun en la mitolojias de la americanes orijinal. Per esemplo, lejendas de la Algoncianes dise ce la Madre Tera abita su la neblas, e de el es derivada la acua de vive, e a sua senos, plantas, animales, e umanas nuri se. Un de la nomes comun per Madre Tera es Nokomis ("ava").
En mitolojia de la incas, Mama Pacha o Pachamama es un diva de fertilia ci rena sur planta e colie. An si Pachamama es tipal traduida como Madre Tera, un tradui plu leteral ta es Madre Universo. El e sua spos, Inti, es la divines la plu bonvolente es es adorada en partes de la montes de la Andes.
Otra divas simil inclui estas:
- Anatolia: Cibele
- Elas: Gaia, Rea, Demetre, Persefone
- Roma: Ceres, Ops, Magna Mater
- Scandinavia: Jord, Frigg, Freia
- Europa este: Mat Zemlya
- Asia sude: Prithvi, Bhumi
- Asia sude-este: Dharani, Thorani
- Americanes orijinal: Ava, Ava Arenia